¹ Telu nga endo nu neiy mouw i ka’ayola waki propinsi i ti’i o mae mouw si Festus waki Kaesaria mea waki Yerusalem. ² Witu se imam-imam kepala wo se tou-tou Yahudi parerio-rerior se mineiy sumaru nisia wo ma’ayola en teturean wia si Paulus. ³ Wia nisia se kimiwee e nesa anugerah, rumugila si Paulus, nyi’a i ti’i kaa merereo si paulus meiy waki Yerusalem. Karengan nisea se kasuatan masiwo rencana kaa mewewunu’ nisia witu nuner e lalan. ⁴ Ta’an si Festus si miningkot, kaa si Paulus si minena-ena’ taangen waki Kaesaria wo kaa nisia nuesa si mekemaksud makarengan mareng maname. ⁵ Pokeiyna: “Kaa ni’itu le’osouw se tou-tou maka kuasa witu nelet miouw se kumi’it maname mewali-wali ampit niaku wo ma’ayola en teturean wia nisia, sa wawean eng kaselokanna.” ⁶ Festus si minena’ reiy’ lumantouwla witu e nuwalu ka’apa mapulu’ nga endo waki Yerusalem. Nu reiy’ mouw i tu sia mareng waki Kaesaria. Witu e nendo kawo’odoanna sia tumuanala en sidang paadilan, wo rumeo i sarula si Paulus. ⁷ Paulus nu neiy mouw i ka’ayola witu, em baya ne tou Yahudi waki Yerusalem o meiy se rimedeiy limedongla nisia wo sea ma’ayola eng kelaker teturean wuter wia nisia e reiy’ kabuktianneala. ⁸ Kapurikitna si Paulus si merapitla en touna, pokeiyna: “Niaku ma’an oki’ i te tu’u ku reiy’ siselok, le’os witu e nukum Taurat ne tou Yahudi ka’apa tu’u witu em Bait ni Empung ka’apa wia si Kaisar.” ⁹ Ta’an si Festus si ma’edo e nate ne tou Yahudi, si miningkot si Paulus, pokeiyna: “Sapa ku’a re’en koo pa’ar mea waki Yerusalem, rio koo akimen maname witu en sinaruku tanume em perkara i yi’i?” ¹⁰ Ta’an pokeiy ni Paulus: “Niaku en teakan ku rimedeiy wia nyi’i wia en sinaru em paadilan ni Kaisar wo wia nyi’i mouw aku lewo’ sa reiy’ akimela. Tanu nikoo nuesa koo mete’u uli-ulit, ma’an oki’ i te tu’u niaku ku reiy’ simiwo selok wia se tou Yahudi. ¹¹ Jadi, sa aku uli-ulit simelok wo simiwo wona’ kaselokan waar ampit e nukuman paten, niaku ku pa’ar mate, ta’an, sa sapa em pature neala i ti’i wia niaku eng keulitla e reiy’ ulit, reiy’la siesa tou tu’u si mekehak sumarakan niaku tanume e nesa anugerah wia nisea. Niaku ku lumongkot em banding wia si Kaisar!” ¹² Nisia nu rimundingola ampit se anggota-anggota paadilan, Festus si miningkot: “Nikoo koo limongkotouw em banding wia si Kaisar, jadi nikoo koo lewo’ sa reiy’ mea sumaru si Kaisar.” ¹³ 13 Em pira mola nga endo kamurian o meiy mouw si raja Agripa ampit si Bernike mineiy waki Kaesaria kaa laa mesesiwola e lalesna eng kaormatan wia si Festus. ¹⁴ 14 Karengan nisea se pirala nga endo eng keurena mena’ witu, Festus si minitarla em perkara ni Paulus wia si raja i ti’i, pokeiyna: “Wia nyi’i wawean siesa tahanan si neiy i tele’ula ni Feliks witu e nedo nisia nu mea. ¹⁵ 15 Katoroan niaku nu waki Yerusalem, se imam-imam kepala wo se tu’a-tu’a ne tou Yahudi se mina’ayola en teturean wia sitou i ti’i wo makiwee rio sia ukumen. ¹⁶ 16 Niaku ku miningkot nisea, kaa reiy’ ku’a kenaramen wia se tou-tou Roma kaa laa mesesarakanla siesa tou neiy i ture tanume siesa anugerah nu reiy’pe’ nisia nu neiy i sarula ampit se tou-tou mature nisia wo wineean kalempotan laa rumapitla en tou witu en teturean i ti’i. ¹⁷ Kaa ni’itu nisea se kimi’iti mewali-wali ampit niaku wia nyi’i. Witu e nendo kawo’odoanna niaku ku makarengan tumuanala en sidang paadilan wo rumeo sumarula sitou i ti’i. ¹⁸ Ta’an eng katoroan se mature nu rumedeiy witu eng kaledongna, nisea se reiy’ mina’ayola esa teturean tu’u tanume em pasiwo-siwon lewo’ tanu eng kinatika’angku mouw. ¹⁹ Ta’an nisea se minasali’isi’an i te eng genang ampit nisia tanume em poong-poongna e agama nea, wo en tanume siesa tou mekengaran Yesus, si minate mouw, kasuatan si Paulus nu meila’la ampit en tantu mouw, kaa Nisia si matou-tou. ²⁰ Karengan niaku ku meware-wareng kumura ku lewo’ sa reiy kumumisi em perkara-perkara tanu ni’itu, niaku ku minueiyla sapa ku’a sia pa’ar mea waki Yerusalem, rio em perkarana e nakimela witu. ²¹ Ta’an si Paulus si limongkot em banding. Nisia si makiwee, rio sia minena’ tinaang wo ma’ena’, i ka’ayo em perkarana putusela ni Kaisar. Kaa ni’itu niaku ku rimeo tumaang nisia i ka’ayo ku toro mapa’ali nisia wia si Kaisar.” ²² Pokeiy ni Agripa wia si Festus: “Niaku ku pa’ar melelingala wia sitou i ti’i nuesa.” Wingkot ni Festus: “Wo’odo koo laa luminga nisia.” ²³ Witu e nendo kawo’odoanna o meiy mouw si Agripa wo si Bernike ampit e reiy’ sa mina’asa kewangko’an wo nisea nu ghimoremola witu e woang paadilan mewali-wali ampit se kapala-kapala pasukan wo se tou-tou pamuka-muka witu eng kota i ti’i, Festus si minee perenta, rio si Paulus si i sarula. ²⁴ Festus si limila’: “Ya raja Agripa ampit em baya ne wia nyi’i mewali-wali ampit nikeiy. Loo’onouw sitou i yi’i, si’i pature em baya ne tou Yahudi, le’os se waki Yerusalem, ka’apa tu’u se wia nyi’i. Nisea se mineiy mouw wia niaku wo kasuatan mereke-rekeiy se meila’la, kaa nisia si reiy’ mete’u tumou lebe ure. ²⁵ Ta’an neiy kaloo’angkula, kaa nisia si reiy’ simiwola sapa tu’u e waar ampit e nukuman paten wo eng karengan nisia si limongkot em banding wia si Kaisar, niaku ku minutusla laa mapa’ali nisia sumaru si Kaisar. ²⁶ Ta’an reiy’la sapa-sapa en tantu e lewo’ sa reiy i patikku wia si Kaisar en tanume nisia. Ni’itu mouw eng karenganna niaku ku simarula nisia wia nyi’i wia nikouw nu waya, kasa ketarena wia nikoo, raja Agripa, rio, ni’itu nu kinumisianola, niaku ku toro matikla wo’o sapa. ²⁷ Karengan witu e ru’utku reiy’ mouw waar kaa laa mapa’alila siesa tou tinaang ampit e reiy’ minapaloo’o-loo’ola en teturean-teturean neiy i pa’ayola wia nisia.”