¹ Lima nga endo kamurian meiy mouw si Imam Wangko’ Ananias mewali-wali ampit se pirala tu’a-tu’a wo siesa pengacara mekengaran Tertulus. Nisea se simarula si wali em banua wo mina’ayola en teturean nea wia si Paulus. ² Paulus si kineret sumaru wo si Tertulus si muleiy mature nisia, pokeiyna: “Feliks si mulia, kaa em pe’inakutennu nikeiy keiy reiy’ maena-ena’ mape’anla eng kasenangan, wo kaa eng kabijaksana’annu e laker kasa e line’osola i wee se bangsa meiy. ³ Em baya nyi’a i ti’i e reiy’ mena’ wo wisa i te keiy sumungkul ampit eng kasa matarumakase. ⁴ Ta’an rio te’a taleus laker ma’apula e nedomu, niaku ku makiwee, rio koo lumingala nikeiy reiy’ ure ampit eng kamura’an e natemu eng kasa kasine’uan i ti’i. ⁵ Em pinakaloo’o-loo’o mouw i wee nikeiy, kaa sitou i yi’i nyi’a mouw si rumara menganup, sitou mapalentutla eng karungkea’an witu nelet em baya ne tou Yahudi wia minapekasa eng kaoatan se maka adab, wo kaa nisia mouw siesa tou paki’i-ki’itan waki sekte ne tou Nasrani. ⁶ Awesla nisia si mewa’awa’ melelangkoiyla eng kalenasan em Bait ni Empung. Kaa ni’itu mouw keiy simikop nisia wo laa ma’akimla nisia i ki’it e nukum Taurat meiy. ⁷ Ta’an si kapala pasukan Lisias si mineiy malouw nisia wo rumo’obit nisia ampit eng kaketean witu lawas meiy, ⁸ laa o rumeo se tumeture meiy sumaru nikoo. Sa nikoo nuesa koo kumumisi nisia, toro mouw koo mamete’ula e reiy’ sa mina’asa wo’o sapa ni’i pature meiyla wia nisia.” ⁹ Wo kangkasi se tou-tou Yahudi masu’un en teturean i ti’i ampit meila’la, kaa eng kapualitan i ti’i e nuli-ulit tuana. ¹⁰ O laa si wali em banua i ti’i si minee tanda wia si Paulus, kaa nisia si toro lumila’. Takar lumila’ mouw si Paulus: “Niaku ku mete’u, kaa mina te’u-te’unouw eng keurena nikoo koo minamuali akim wia se bangsa i yi’i. Kaa ni’itu niaku ku reiy’ meware-wareng merapitla em perkaraku i yi’i witu en sinarumu: ¹¹ Nikoo koo toro tumantula, kaa e reiy’ lebe witu mapulu’ o rua nga endo limangkoiyla niaku ku mineiy wia Yerusalem kaa meiy mereraghes. ¹² Wo reiy’ ma’an mekasa se tou minatola niaku ku kasuatan me’ising ampit siesa tou ka’apa matuanala eng huru-hara, le’os witu eng gorem em Bait ni Empung, ka’apa tu’u witu eng gorem e wale ibadat, ka’apa witu en tampa walina waki kota. ¹³ Wo nisea se reiy’ i katuru’la wia nikoo sa sapa en teakan ni’i pature neala wia en touku. ¹⁴ Ta’an niaku ku makaredeiyla wia nikoo, kaa niaku ku malukar wia si Empung nene moyang meiy ampit maki’it e Lalan ni Tuhan, nyi’a i ti’i e Lalan patotoren nea sekte. Niaku ku ma’eman witu e reiy’ sa mina’asa wo’o sapa neiy’ i kepatik witu e nukum Taurat wo witu eng kaol ne nabi-nabi. ¹⁵ Niaku ku minee paarapen wia si Empung, masuat tanu nisea kangkasi, kaa e laa wawean kato’oran em baya ne tou minate, le’os se tou-tou ulit ka’apa tu’u se tou-tou reiy’ ulit. ¹⁶ Kaa ni’itu niaku ku reiy’ maena-ena’ me’inakut laa matou-tou ampit e nate nurani murni witu en sinaru ni Empung wo ni tou. ¹⁷ Wo nu reiy’ mouw em pirala nge te’un eng keurena niaku ku mineiy sumeup waki Yerusalem kaa laa ma’alila em petaber i wee se bangsaku wo kaa laa mesesempela en sesempe-sesempe. ¹⁸ Kasuatan niaku nu matuanala em baya nyi’a i ti’i, se pirala tou Yahudi waki Asia se minatola niaku witu eng gorem em Bait ni Empung, nu reiy’ mouw niaku nu limenasla en touku, reiy’ ampit se tou kelaker wo reiy’ ampit eng karungkea’an. ¹⁹ Nisea mouw se kaulitna se lewo’ sa reiy’ sumaru nikoo wia nyi’i wo ma’ayola en teturean nea, sa sea makapunyala wo’o sapa witu niaku. ²⁰ Ta’an ma’anouw se tou-tou himadir wia nyi’i en teakan se mapa’atola eng kalewo’an sapa ku’a re’en e niato neala, katoroan niaku nu neiy i sarula wia e Mahkamah Agama. ²¹ Ka’apa wo’o wona’ ku’a re’en karengan e maesa-esana en tetotoren neiyku i aleiyla, katoroan niaku nu rimedeiy witu eng keuneran nea, nyi’a i yi’i : Karengan eng kapualitan kato’oran ne tou-tou minate, niaku e nendo i yi’i ku neiy i sarula wia nikoo.” ²² Ta’an si Feliks si mete’u uli-ulit e Lalan ni Tuhan, si limodokla em perkara nea, pokeiyna: “I kekeka’ayomi ni kapala pasukan Lisias wia nyi’i, niaku ku laa medo kaputusan witu em perkaramu.” ²³ Laa o sia rumeo si perwira i ti’i mena’ tumaang si Paulus, ta’an ampit eng kawure’an, wo reiy’ toro maape’ se kalo-kalona melayanela nisia. ²⁴ Wo ni’itu nu pira mola nga endo o meiy mouw si Feliks mewali-wali ampit si ka’awuna Dursila, siesa tou Yahudi; sia rumeo kumeret si Paulus, laa o luminga wia nisia tanume em pa’emanen wia si Yesus Kristus. ²⁵ Ta’an eng katoroan si Paulus nu mesesusuiy tanume eng kaulitan, pangakekuasa’an en tou wo em paakiman e laa meiy, Feliks si mineide wo lumila’: “Toro mouw ee lalo wo mea mouw en teakan; sakawisa wawean kalempotan le’os, niaku ku laa rumeo kumeret nikoo.” ²⁶ Kasuatan ni’itu nisia si maarap, kaa si Paulus si laa meela loit wia nisia. Kaa ni’itu sia si re’eregh kumeret nisia meiy menusu-nusuiy ampit nisia. ²⁷ Ta’an ni’itu nu lekepouw rua nge te’un, Feliks si sinawelan ni Perkius Festus, wo kaa ma’edo e nate ne tou Yahudi, nisia si minayala si Paulus minena’ witu em penjara