¹ “Heiy patuari waya wo se ama-ama’, linganola, sapa ni’i pelelila’kula wia nikouw tanume e rerapitan en tou.” ² Katoroan se tou kelaker i ti’i liminga sia nu meila’ witu em baasa Ibrani, maka lomponola sea. Sia lumila’: ³ “Niaku ku tou Yahudi, minatou waki Tarsus waki tana’ Kilikia, ta’an minasela wia eng kota i yi’i; dinidik ampit eng kasa maato’ato witu em pa’aka-aka’an ni Gamaliel witu e nukum ne nene moyang ta, i ka’ayo niaku ku minamuali esa tou lali’iket mepepa’ayang i wee si Empung masuat tanu nikouw nu waya wia e nedo i yi’i. ⁴ Wo niaku ku simiasa mola se maki’i-ki’it e Lalan ni Tuhan i ka’ayo sea minate; tuama wo wewene se sinikopku wo i sarakankula witu eng gorem em penjara. ⁵ Tanume eng kapualitan i ti’i le’os se Imam Wangko’ ka’apa tu’u se Majelis Tua-tua se toro meela kasairian. Waki nisea niaku ku minalimi surat-surat i wee se patuari-patuari waki Damsyik wo niaku ku minea mouw maname kaa mesesikop se maki’i-ki’it e Lalan ni Tuhan, se niato kangkasi witu wo mali nisea waki Yerusalem kaa neiy ukumen. ⁶ Ta’an witu em pakela-kelanganku mea maname, katoroan niaku nu tawi mouw en Damsyik, nyi’a i ti’i e nedo marorake, i kasenge’mi e rimesikomi en sena makasilauen waki langit e limedongla niaku. ⁷ Takar i karewa mouw niaku witu en tana’ wo niaku ku liminga e nesa suara limila’ wia niaku: Saulus, Saulus, ka’a ku’a koo masiasa Niaku? ⁸ Wingkotku: Seiy ku’a re’en Koo, Tuhan? Pokeiy-Na: Niaku mouw si Yesus, tou Nazaret, si pasiasannu i ti’i. ⁹ Wo nisea se mewali-wali niaku, memang se limoo’ en sena’ i ti’i, ta’a en suara Nisia, e limila’ wia niaku, e reiy’ lininga nea. ¹⁰ Takar pokeiyku: Tuhan, sapa re’en e lewo’ sa reiy’ siwongku? Pokeiy ni Tuhan wia niaku: Tumo’orouw wo mea mouw waki Damsyik. Maname e laa i pakite’ula wia nikoo e reiy’ sa mina’asa wo’o sapa ni’i lukarla wia nikoo. ¹¹ Wo kerengan niaku ku reiy’ mete’u lumoo’ karengan en sena’ makasilauen em beren i ti’i, takar se ka’ampit-ka’ampit esa pakela-kelangan o niaku se timiboiy e lawasku wo tumeper niaku mea waki Damsyik. ¹² Witu wawean siesa tou mekengaran Ananias, siesa tou saleh sa i ki’it e nukum Taurat wo si kasa kasine’uan le’os witu e nelet em baya ne tou Yahudi se witu. ¹³ Sia si mineiy rumedeiy witu e retanku wo lumila’: Saulus, patuariku, wuka’anouw em berennu wo lumoo’ mouw! Wo eng katoroan i te ni’itu kangkasi niaku ku maloo’ mouw sumeup wo tumu’us nisia. ¹⁴ Laa o pokeiyna: Si Empung ne opo’ ta si timantu mola nikoo kaa laa mamete’ula eng kapa’aran-Na, kaa laa lumoo’ E Nulit wo kaa laa luminga en suara e rime’umi witu en suma-Na. ¹⁵ Karengan nikoo koo lewo’ sa reiy’ mamuali sairi-Na wia em baya ne tou tanume en sapa linoo’mu wo e liningamu. ¹⁶ Wo teakan, ka’a koo meware-warenge’? Tumo’orouw, i wee mola en toumu baptisen wo en dosa-dosamu e lenasela kasuatan maaleiy witu e ngaran ni Tuhan! ¹⁷ Nu reiy’ mouw niaku nu marengi waki Yerusalem wo katoroan niaku nu masombayang witu eng gorem em bait ni Empung, e rohku en sinongkouwi eng kuasa ilahi. ¹⁸ Niaku ku limoo’ Nisia, si limila’ wia niaku: Meriorouw, makarenganouw i tele’ula e Yerusalem, karengan nisea se reiy’ laa sumungkul eng kasairiannu en tanume Niaku. ¹⁹ Wingkotku: Tuhan, nisea se mete’u, kaa niaku mouw si timele’ula e wale ibadat esa mea witu e wale ibadat walina wo si ghimoremla nisea se ma’eman wia-Nikoo witu eng gorem em penjara wo mewe nisea. ²⁰ Wo katoroan e raa’ ni Stefanus, si sairi-Mu i ti’i, neiy i toa’la, niaku ku witu wo miniyonla em pasiwo-siwon i ti’i wo niaku ku timayurla witu e labung ne minunu’ nisia. ²¹ Ta’an pokeiy ni Tuhan wia niaku: Mea mouw, karengan Niaku ku laa tumoke nikoo wa’akate wia e nyi’i wia se bangsa-bangsa walina.” ²² Rakyat se limingala si Paulus i ka’ayo witu e lelila’an i ti’i ; ta’an nu reiy’ mouw i tu, sea muleiy rumekeiy, pokeiy nea : “ Re’inla sitou i yi’i wia en saruan em bumi! Sia si reiy’ waar matou-tou!” ²³ Nisea se reiy’ mena’ marekeiy kasuatan melawala eng karaiy nea wo maserala e riawu wia natas. ²⁴ Kaa ni’itu si kepala pasukan si minee perenta laa mali si Paulus waki markas wo rimeo sumoisap wo mewe nisia, rio toro kakete’uala sapa eng karenganna se tou kelaker i ti’i se mereke-rekeiy en tuana wia nisia. ²⁵ Ta’an katoroan si Paulus nu neiy i talo’aiyla kaa pewewewen, o lumila’ mouw sia wia si perwira malukar: “Toro ku’a kouw mewe siesa tou warga negara Rum, sapape’ kasi si reiy’pe niadilla?” ²⁶ Liminga e lelila’an i ti’i si perwira i ti’i si rimapotla nyi’a wia si kepala pasukan, pokeiyna: “Sapa re’en e laa pesesiwonnu? Sitou i ti’i si warga negara Rum.” ²⁷ Takar meiy mouw si kepala pasukan i ti’i wia si Paulus wo lumila’: “I lila’ momi, ulit re’en koo warga negara Rum.” Wingkot ni Paulus: “Ulit.” ²⁸ Laa o pokeiy ni kepala pasukan i ti’i: “Eng kewarganegara’an i ti’i en tinelesku ampit e narga kemaal.” Wingkot ni Paulus: “Ta’an niaku ku makapunya hak e ni’itu karengan eng kinatouanku.” ²⁹ Takar nisea se lewo’ sa reiy’ mewe nisia, se makarengan minundur; wo si kepala pasukan i ti’i kangkasi si meide’, sia nu minamete’u mola, kaa si Paulus, si neiy i reona wa’akesen i ti’i, sitou Rum. ³⁰ Ta’an si kepala pasukan i ti’i si pa’ar mamete’ula ampit en teliti sapa e neiy i turela ne tou-tou Yahudi wia si Paulus. Kaa ni’itu witu e nendo kawo’odoanna sia rumeo edon si Paulus waki penjara wo minerentala, rio se imam-imam kepala wo se minapekasa Mahkamah Agama merur. Laa o sia mali si Paulus rumou’mi waki markas wo sumarula nisia wia nisea.