¹ Katoroan si Apolos nu wakipe’ Korintus, Paulus si kemere mola en daerah-daerah tewa wo i ka’ayola waki Efesus. Witu e niatoanna se pirala murid. ² Pokeiyna wia nisea: “Kouw minaka’ato mola e Roh Kudus, katoroa kouw nu mina eman?” Ta’an nisea se miningkot nisia: “Reiy’pe’, awesla keiy reiy’pe’ ma’an mekasa liminga, kaa wawean e Roh Kudus.” ³ Laa o pokeiy ni Paulus wia nisea: “Sa tuana ampit em baptisan wisa re’en kouw binaptisla?” Wingkot nea: “Ampit em baptisan ni Yohanes.” ⁴ Pokeiy ni Paulus: “Baptisan ni Yohanes nyi’a mouw em pebaptisan se tou mina kedo’ mouw, wo sia lumila’ wia se tou kelaker, kaa nisea se lewo’ sa reiy’ ma’eman wia Nisia si mineiy eng kamurian ta’an nisia, nyi’a i ti’i si Yesus.” ⁵ Katoroan sea nu liminga eng kapualitan i ti’i, nisea se minee en tou nea baptisen witu e ngaran ni Tuhan Yesus. ⁶ Wo katoroan si Paulus nu limelerla e lawas witu e natas nea, tu tumumpa mouw e Roh Kudus witu e natas nea, wo muleiy mouw sea melila-lila’ witu em baasa roh wo mawetik. ⁷ Eng kelaker nea wo’o wona’ mapulu’ o rua tou. ⁸ Eng kaurean telu nga sumedot Paulus si limalesla e wale ibadat witu wo mawee teturu’ ampit em berani. Kaa em paabaranna nisia si me’inakut mapa’emanla nisea tanume eng Keraja’an ni Empung. ⁹ Ta’an wawean se pirala tou se ente’ e natena. Nisea se reiy’ pa’ar pe’e emanela, awes tare se mengedo-ngedo lewo’ e Lalan ni Tuhan witu en sinaru ne tou kelaker. Kaa ni’itu Paulus si timele’ula nisea wo tima’atasla se murid-muridna wia nisea, wo susur e nendo masusuiy witu e woang kuliah ni Tiranus. ¹⁰ Eng kapualitan i yi’i en tinuananala rua nge te’un eng keurena, i ka’ayo em baya ne penduduk Asia se liminga e nuwu’ ni Tuhan, le’os se tou Yahudi ka’apa tu’u se tou Yunani. ¹¹ Kaa si Paulus Empung si simiwola e mujizat-mujizat luar biasa, ¹² awesla se tou se minali e lenso ka’apa roko’ em pernah mouw pinakela ni Paulus wo rumeta’la nyi’a witu e natas ne tou-tou rara’an, takar e minere’i mouw e rumara nea wo rumo’u mouw se roh-roh lewo’. ¹³ O kangkasi se pirala dumedoti ne Yahudi, se makelang maledong em banua i ti’i, se mewewa’awa’ metetotor e ngaran ni Tuhan Yesus witu se sinelaran e roh lewo’ ampit minaleiy, pokeiyna : “ Niaku ku tumiwa’la nikoo demi e ngaran ni Yesus e neiy i abarla ni Paulus.” ¹⁴ Nisea se timuanala eng kapualitan i ti’i nyi’a mouw se pitu oki’ wia siesa imam kepala Yahudi si mekengaran Skewa. ¹⁵ Ta’an si roh lewo’ i ti’i si miningkot: “Yesus si kasine’uangku, wo si Paulus si kete’uangku, ta’an nikouw, seiy re’en kouw?” ¹⁶ Wo sitou si sinelaran ni roh lewo’ i ti’i si rima’akep nisea wo kimontoiyla wia nisea nu waya wo kimalala nisea, i ka’ayo sea tumingkasi waki wale ni tou i ti’i ampit se poteiy wo pepali’ mokan. ¹⁷ Eng kapualitan i ti’i eng kinete’uan ne minapekasa penduduk Efesus, le’os se tou Yahudi ka’apa se tou Yunani, takar kineide’anouw sea nu waya wo eng kasa mouw kasine’uala e ngaran ni Tuhan Yesus. ¹⁸ Laker se witu e nelet nea se mina emanouw, se mineiy o minakaredeiyla witu en sinaru ne tou kelaker, kaa nisea se pernah timuanala em pasiwo-siwon tanu e ni’itu. ¹⁹ Laker kangkasi se witu e nelet nea, se pernah timuanala en sihir, se minerurla eng kitab-kitab nea laa o tumunula nyi’a witu en sinaru em beren em baya ne tou. E narga eng kitab-kitab i ti’i en tinakser e lima nga pulu’ nga riwu loit perak. ²⁰ Ampit e lalan i yi’i eng kasa mouw neiy i ka’abarla e nuwu’ ni Tuhan wo kasa mouw makuasa. ²¹ Kamurian witu em baya nyi’a i ti’i Paulus si meke pa’ar me’a waki Yerusalem tumoro e Makedonia wo e Akhaya. Pokeiyna: “ Niaku nu limalesola witu niaku ku lewo’ sa reiy’ lumoo’ e Roma kangkasi.” ²² Laa o sia rumeo se rua sumesawangna , nyi’a i ti’i si Timotius wo si Erastus, rumeriorla nisia mea waki Makedonia, ta’an sia nuesa si minena pirala eng keure kasi waki Asia. ²³ Wo’o wona’ en toro ni’itu e limentut eng huru-hara wangko’ en tanume e Lala ni Tuhan. ²⁴ Karengan wawean siesa tou mekengaran Demetrius, siesa tou meneniwo perak, si simiwo eng kuil-kuilan ni dewi Artemis em perak o siwon. Em pine’inakutna i ti’i e minapa’eiyla wua’ e reiy’kan i te toyo’ i wee se sumesiwo-sumesiwona. ²⁵ Nisia si minerurla nisea mewali-wali ampit se memema’ayang-memema’ayang walina witu em pe’inakutan i ti’i wo lumila’: “Patuari waya, kete’uan niouw, kaa eng kemakmuran ta nyi’a mouw e wua’ em pe’inakutan i yi’i! ²⁶ Teakan kouw nuesa kouw limoo’ wo liminga, kumura si Paulus, reiy’kan i te waki Efesus, ta’an kangkasi ta’arouw wia e minapekasa Asia si minelurouw wo simeipla kelaker tou ampit e limila’la, kaa sapa en siniwo e lawas ni tou e reiy’ tu dewa. ²⁷ Ampit e lalan en tuana e reiy’kan i te em pe’inakutan ta e witu em bahaya kaa en sero’an ne tou, ta’an kangkasi eng kuil Artemis, ni dewi wangko’ i ti’i, witu em bahaya e laa kaliongan em penoronna. Wo si Artemis nuesa, Artemis si pasempen ne minapekasa Asia wo ne minapekasa eng kaoatan beradab, e laa kaliongan eng kewangko’anna.” ²⁸ Liminga e ni’itu tu tumeroa’ mouw e nupi’ nea, laa o sea mereke-rekeiy, pokeiy nea: “Wangko’ mouw si Artemis dewi ne tou Efesus!” ²⁹ E minapekasa emg kota e minekaceu wo nisea se mareo-reok minutala eng gedung kesenian ma’an makeong si Gayus wo si Aristarkhus, sea nu rua se tou Makedonia wo se ka’ampit esa pakela-kelangan ni Paulus. ³⁰ Paulus si me’a witu eng kauneran ne rakyat i ti’i, ta’an se murid-muridna se reiy yimonla nisia. ³¹ Awesla se pirala pemangko’ se asal waki Asia se mekalo ampit si Paulus, se minapa’ali em peringatan wia nisia, rio sia te’a megheghorem witu eng gedung kesenian i ti’i. ³² Kasuatan e ni’itu se tou minerur witu eng gorem eng gedung i ti’i se mereke-rekeiy; siesa si meila’la e nyi’i wo se walina se meila’la ni’itu, karengan eng kumpulan i ti’i eng kacau-balau wo kelakeran wia nisea se reiy’ mete’u kaa en sapa sea o merur. ³³ O laa siesa tou mekengaran Aleksander si neiy i todola ne tou-tou Yahudi witu muka. Nisia si minaka’ato katerangan wia se tou kelaker tanume en sapa e minamuali. Makarengan sia minee tanda ampit e lawasna wo si pa’ar mewewee penjelasan tanume en sawang witu en sinaru ne rakyat i ti’i. ³⁴ Ta’an katoroan sea nu mete’ula, kaa nisia sitou Yahudi, o rumekeiy mouw sea mewali-wali wo’o wona’ dua jam eng keurena: “Wangko’ mouw si Artemis dewi ne tou Efesus!” ³⁵ Ta’an laa si panitra kota si simabaarla se tou kelaker i ti’i wo limila’: “Heiy rou Efesus! Seiy ku’a si wia eng kaoatan i yi’i si reiy’ mete’u, kaa eng kota Efesusouw e mapiara makale’os eng kuil ni dewi Artemis, eng kasawangko’, ka’apa tu’u em patongna en timumpami waki langit? ³⁶ Eng kapualitan i ti’i e reiy’ mete’u i pero, kaa ni’itu mouw satorona kouw sabaar wo te’a mouw matuyu-tuyu mewewinta’. ³⁷ Karengan nikouw kouw minali momi se tou-tou i yi’i wia nyi’i, ma’anouw tu’u sea se reiy’ rimampok eng kuil ni dewi taw o reiy’ minojat e ngaranna. ³⁸ Jadi sa si Demetrius wo se meneniwo-meneniwona se rimapotla siesa tou, reiy’ ku’a e wawean en sidang-sidang paadilan wo wawean gubernur, jadi satorona se rua nga weteng se ma’ayola en teturean nea mea witu. ³⁹ Wo sa wawean wo’o sapa walina eng kepa’ar miouwla, le’osouw eng kepa’armu i ti’i ni’i sampetla witu en sidang rakyat sah. ⁴⁰ Karengan nikita ta witu em bahaya laa i ture, kaa nikita ta limentutla eng huru-hara wia e nendo i yi’i, karengan reiy’la si to’otolan en toro i pa’ayola kaa laa mapaulitla eng kumpulan kaceu-baleu i yi’i.” ⁴¹ Wo ampit e lelila’an-lelila’an i ti’i sia kumawusla eng kumpulan ne rakyat i ti’i.