¹ Kamurian Paulus si timele’ula e Atena, laa o mea waki Korintus. ² Waki Korintus sia masungkul ampit siesa tou Yahudi mekengaran Akwila, si asal waki Pontus. Nisia si werukan mineiy waki Italia ampit si Priskila, ka’awuna, karengan si kaisar Klaudius si minerenta mola, rio em baya ne tou Yahudi se tumele’ula e Roma. Paulus si timuli witu em bale nea. ³ Wo karengan nisea se matuanala em pepa’ayangen masuat, nisia si minena’ mewali-wali ampit ni sea. Nisea se mepa’ayang mewali-wali, karengan nisea se mewali-wali meneniwo dasing. ⁴ Wo susur e nendo Sabat Paulus si meila’ witu e wale ibadat wo si me’inakut me’e emanla se tou-tou Yahudi wo se tou-tou Yunani. ⁵ Katoroan si Silas wo si Timotius nu mineiy se waki Makedonia o meiy, Paulus ampitouw eng kasa mengente’ si toro maabarla e nuwu’, witu e wisa sia mawee kasairian wia se tou-tou Yahudi, kaa si Yesus nyi’a mouw si Mesias. ⁶ Ta’an katoroan se tou-tou i ti’i nu simu’usukla nisia wo maojat, nisia si mini’ipikla e riawu witu e labungna wo lumila’ wia nisea: “Ma’anouw e raa’mu ni’i katoa’ witu e natas eng kokongmu sandiri; niaku ku weresi, reiy’ simelok. Muleiymi teakan niaku ku laa mea wia se bangsa-bangsa walina.” ⁷ Takar rumou’ momi sia witu, laa o meiy witu em bale ni esa tou mekengaran Titus Yustus, si maraghes wia si Empung , wo em balena e mina esa nga weka’an ampit e wale ibadat. ⁸ Ta’an si Krispus, si kepala e wale ibadat i ti’i, si mina eman wia si Tuhan mewali-wali ampit se esa nga pumpun em balena, wo laker wia se tou-tou eng Korintus, se limingala em paabarla ni Paulus, se mina eman wo mineela en tou nea baptisen. ⁹ Witu em bengi mekasa mee mola nuwu’ si Tuhan wia si Paulus witu e nesa pineleloo’: “Te’a meide’! Mapawee-wee mouw maabarla e nuwu’ wo te’a makapenes! ¹⁰ Karengan Niaku ku matepe-teper nikoo wo reiy’la siesa tou tu’u si laa lumeler wo sumiasa nikoo, karengan laker se umat-Ku wia eng kota yi’i.” ¹¹ Takar mena’ mouw si Paulus witu eng kaurean esa nge te’un enem nga sumedot wo sia maturu’la e nuwu ni Empung witu e nuner nea. ¹² Ta’an si Galio nu mina muali mouw gubernur waki Akhaya, tumo’orouw se tou-tou Yahudi mewali-wali sumaru si Paulus, laa o mali nisia witu en sinaru em pengadilan. ¹³ Pokeiy nea : “ Nisia i yi’i si me’inakut me’e emanla se tou kaa laa rumaghes wia si Empung ampit e lalan minasu’usukan ampit e nukum Taurat.” ¹⁴ Katoroan si Paulus nu muleiy mouw melelila’, lumila’ mouw si Galio wia se tou-tou Yahudi i ti’i : “ Heiy tou-tou Yahudi, sa wona’na en tetureannu en tanume e nesa pelanggaran ka’apa kalewo’an, e waarna mouw niaku sumungkulla em perkaramu, ¹⁵ ta’an sa eng kapualitan i ti’i e nyi’a mouw em pinesali’isi’an en tanume en tetotoren ka’apa ngaran ka’apa e nukum em pepakene’ witu e nelet miouw, takar satorona nikouw nuesa kouw murus nyi’a; niaku ku reiy’ menee mamuali akim witu em perkara tuana.” ¹⁶ Laa o sia mure’ nisea waki woang paadilan. ¹⁷ Takar se tou i ti’i nu waya simerbu si Sostenes, si kepala wale ibadat, laa o mewe nisia witu en sinaru em paadilan i ti’i; ta’an si Galio si kasa reiy’ minadungla eng kapualitan i ti’i. ¹⁸ Paulus si minena’ pirala nga endo kasi waki Korintus. Laa o lumila’la me’a mouw wia se patuari-patuari witu, wo moleme waki Siria, sia nu simukurola em bu’ukna waki Kengkrea, karengan nisia si tima’arouw. Si Priskila wo si Akwila se tumeper nisia. ¹⁹ Laa o i ka’ayo mola sea waki Efesus. Paulus si timele’ula si Priskila wo si Akwila witu. Sia nuesa si ghimorem witu e wale ibadat wo mesesusuiy ampit se tou-tou Yahudi. ²⁰ Nisea se makiwee wia nisia sa toro mena’pe’ lebe ure witu, ta’an nisia si reiy’ mineneela nyi’a. ²¹ Nisia si limila’la me’a mouw wo lumila’: “Niaku ku laa marengi wia nikouw, sa si Empung si mepa’arla nyi’a.” Laa o tumodo momi sia waki Efesus. ²² Sia ma’ayola waki Kaesaria wo sia nu limongkotouw witu eng ketana’an wo mee tabea wia se jema’at, sia mae waki Antiokhia. ²³ Ni’itu nu pira mola nga endo eng keurena sia maana’ witu, sia mae tu’u, laa o sia kumerela e minapekasa en tana’ Galatia wo em Frigia kaa metete’etepla e nate em baya ne murid. ²⁴ Kasuatan e ni’itu meiy mouw waki Efesus siesa tou Yahudi mekengaran Apolos, si asal waki Aleksandria. Sia siesa tou sigha’ meila-ila’ wo si kasa mete’u witu en so’al-so’al Kitab Suci. ²⁵ Nisia si simungkulouw en teturu’ witu e Lalan ni Tuhan. Ampit en semangat sia meila’ wo ampit en teliti sia mawee teturu’ tanume si Yesus, ta’an nisia si mete’u i tela em baptisan ni Yohanes. ²⁶ Nisia si muleiy mawee teturu’ ampit em berani witu e wale ibadat. Ta’an si Priskila wo si Akwila nu liminga mola nyi’a, sea mali nisia waki wale nea wo ampit en teliti se minitarla wia nisia e Lalan ni Empung. ²⁷ Karengan si Apolos si pa’ar melelewetla waki Akhaya, se patuari-patuari waki Efesus se minapa’ali surat i wee se murid-murid witu, rio sea sumungkul nisia. I kekeka’ayola waki Akhaya takar sia, kaa e nupus karunia ni Empung, si minamuali esa tou kasa paka’ara’an i wee se tou-tou ma’eman. ²⁸ Karengan ampit e reiy’ masenso-senso’ sia si mapero se tou-tou Yahudi witu en sinaru ne tou kelaker wo minuktila witu eng Kitab Suci kaa si Yesus nyi’a mouw si Mesias.