¹ Se pirala tou se mineiy waki Yudea meiy waki Antiokhia wo maweela teturu’ wia se patuari-patuari witu: “Sa kouw reiy’ sunaten i ki’it eng kenaramen neiy i warisla ni Musa, nikouw kouw reiy’ mete’u lawirela.” ² Ta’an si Paulus wo si Barnabas ampit eng kakete masu’usuk wo makelong eng genang nea i ti’i. Eng kesampetanna e neiy tantula, rio si Paulus wo si Barnabas ma’an se pirala tou walina wia se jema’at i ti’i mea wia se rasul-rasul wo se penatua-penatua waki Yerusalem kaa mea mesesusuiyla em poong i ti’i. ³ Nisea se nialila ne jema’at i ka’ayola waki luar kota, laa o sea kumelang timoro em Fenisia wo en Samaria, wo witu en tampa-tampa i ti’i nisea se simusuiyla en tanume em pakedo’an ne tou-tou se reiy’ makasine’u si Empung. Eng kapualitan i ti’i eng kasa limaya’la e nate ne patuari-patuari witu. ⁴ I kekeka’ayola waki Yerusalem sea se sinungkul ne jema’at wo ne rasul-rasul wo ne penatua-penatua, laa o sea sumusuiyla e reiy’ sa mina’asa wo’o sapa en tinuanala ni Empung ampit e nieletan nea. ⁵ Ta’an se pirala tou wia se golongan Farisi, se mina’emanouw, mineiy wo lumila’: “Se tou-tou reiy’ Yahudi se lewo’ sa reiy’ sunaten wo se lewo’ sa reiy’ kumi’itla e nukum ni Musa.” ⁶ Takar sumidangouw se rasul-rasul wo se penatua-penatua kaa laa mesesusuiyla em poong i ti’i. ⁷ Ni’itu nu pirala mola nga edo eng keurena se mineno’o-no’oran eng genang en tanume em poong i ti’i, o rumedeiy mouw si Petrus wo lumila’ wia nisea: “Heiy patuari waya, kouw mete’u, kaa e rengane’ eng ketarena si Empung mineleng niaku witu e nelet miouw, rio ampit e nieletan en sumaku se bangsa-bangsa walina se luminga e Injil wo ma’eman. ⁸ Wo si Empung, si sumine’u e nate ni tou, si minapa’ato mola eng kepa’aran-Na sumungkul nisea, karengan Nisia si kimarunia mola e Roh Kudus kangkasi wia nisea masuat tanu e wia nikita, ⁹ wo Nisia si kasa reiy’ minange’anla nikita ampit nisea, Sia nu limenasola e nate nea kaa e iman. ¹⁰ Sa tuana, ka’a koo pa’ar mewewa’awa’la si Empung ampit e rimeta’la witu e lee’ ne murid-murid i ti’i e nesa bongkouw, e reiy’ mete’u kapesa’anan, le’os se nene moyang ta ka’apa tu’u nikita nuesa? ¹¹ Eng kapurikitna, nikita ta ma’eman, kaa e nupus karunia ni Tuhan Yesus Kristus nikita ta laa maka’ato eng kalawiran masuat tanu nisea kangkasi.” ¹² Takar menesouw se minapekasa umat i ti’i, laa o sea lumingala si Paulus wo si Barnabas simusuiyla e reiy’ sa mina’asa kowa’ wo e mujizat en tinuanala ni Empung ampit e nieletan nea witu e nuner ne bangsa-bangsa walina. ¹³ Nu reiy’ mouw si Paulus wo si Barnabas nu simampetla meila’, lumila’ mouw si Yakobus: “Heiy patuari waya, linganola niaku: ¹⁴ Simon si simusuiyola, kaa e rengane’ eng ketarean si Empung si minapa’ato mola e rahmat-Na wia se bangsa-bangsa walina, nyi’a i ti’i ampit e minelengla esa umat witu e nelet nea i wee e ngaran-Na. ¹⁵ Eng kapualitan i ti’i e minatoroan ampit en tetotoren-tetotoren ne nabi en tanu neiy i patik: ¹⁶ Kamurian Niaku ku laa marengi wo rumedeiyla sumeup em pondok Daud neiy mouw i karonga’, wo e riberekna e laa Kuiredeiy sumeup wo e laa Kute’etepela, ¹⁷ rio em baya se tou walina se sumero si Tuhan wo se reiy’ sa mina’asa bangsa se reiy’ sumine’u si Empung, se patotoren-Ku kapunya’an-Ku tuana mouw e nuwu’ ni Tuhan si timuanala em baya nyi’a i yi’i, ¹⁸ eng kinakete’uanola rengane’ waki eng ketareanna. ¹⁹ Kaa ni’itu niaku ku maka ghenang, kaa nikita ta reiy’ toro lumentutla eng kapedisan wia nisea waki se bangsa-bangsa walina se minurikit wia si Empung, ²⁰ ta’an nikita ta lewo’ sa reiy’ matikla surat wia nisea, rio sea ma’akatla en tou witu eng kekaanen eng kinewurola em berhala-berhala, witu em pesa’amekan, witu e le’ona ni tekapen minate kino’omes wo witu e raa’. ²¹ Kaa e rengane’ en zaman dulu e nukum ni Musa e neiy i abarla wia en susur kota, wo ma’ayomi yi’i e nukum i ti’i ni’i pewacala susur nendo Sabat witu e wale-wale ibadat.” ²² Takar se rasul-rasul wo se penatua-penatua ma’an se minapekasa ne jema’at i ti’i se minedo kaputusan kaa mepepeleng witu e nelet nea se pirala tou se laa i petetoke waki Antiokhia mewali-wali si Paulus ampit si Barnabas, nyi’a i ti’i si Yudas si patotoren Barsabas wo si Silas. Sea nu rua se tou paloo’o-loo’on witu e nelet ne patuari-patuari i ti’i. ²³ Wia nisea neiy i sarakanla en surat en teinti’i palingan: “Tabea waki se rasul-rasul wo se penatua-penatua, o waki se patuari-patuarimu i wee se patuari-patuari waki Antiokhia, Siria wo Kilikia e nasal waki se bangsa-bangsa walina. ²⁴ Nikeiy keiy liminga mouw, kaa wawean se pirala tou witu e nelet meiy, se reiy’ minaka’ato e nower wia nikeiy, e minalisa mola wo e minoghe mola e natemu ampit en teturuan nea. ²⁵ Kaa e ni’itu ampitouw en tabuleleng e nate nikeiy keiy timantu mola kaa laa meleng wo tumoke se pirala tou witu nikouw mewali-wali ampit si Barnabas wo si Paulus se i koupus meiyla, ²⁶ nyi’a i ti’i se rua tou se simaelangola e nyawa nea krengan e ngaran ni Tuhan ta Yesus Kristus. ²⁷ Takar keiy timoke mouw si Yudas wo si Silas, ampit e lumila’la se laa ma’ayola e nower neiy i patik i yi’i kangkasi wia nikouw. ²⁸ Karengan e nyi’a mouw eng kaputusan e Roh Kudus wo eng kaputusan neiy, rio wia nikouw te’a i pesa’anla e lumantouwla eng kelaker em pemesa’anen witu em pemandungen i yi’i: ²⁹ nikouw kouw lewo’ sa reiy’ ma’akatla en tou witu eng kekaanen e neiy i sempela witu em berhala, witu e raa’, witu e le’ona ne tekapen minate kino’omes wo witu em pesa’amekan. Sa koo mapiara en tou witu eng kapualitan-kapualitan i yi’i, koo masiwo e le’os. Tuana mouw, selamat.” ³⁰ Sea nu limila’ mola, Yudas wo si Silas minae waki Antiokhia. Witu sea kumeret se minapekasa jema’at merur, laa o sumarakan en surat i ti’i wia nisea. ³¹ Sea nu minaca mola en surat i ti’i, se jema’at se mepa’a-pa’ar karengan em pumpunna e makaiboren. ³² Yudas wo si Silas, sea se nabi kangkasi, se ure minange’enge’la se patuari-patuari i ti’i wo minente’la e nate nea. ³³ Wo nu reiy’ mouw em pirala nga edo sea nu rua se minena’ witu, se patuari-patuari i ti’i se rimeta’la nisea witu en dame kaa se mareng wia se timoke nisea. ³⁴ [Ta’an si Silas si timantula si mena’ witu.] ³⁵ Paulus wo si Barnabas se minena’ pirala eng keure waki Antiokhia. Nisea se mewali-wali ampit se kelaker tou walina mawee teturu’ wo maabarla e nuwu’ ni Tuhan. ³⁶ Ta’an em pirala nga edo kamurian o lumila’ mouw si Paulus wia si Barnabas: “Le’osouw ta mareng wia se patuari-patuari ta wia en susur eng kota, waki wisa kita minabarola e nuwu’ ni Tuhan, kaa laa lumoo’, sa kumura eng ka’ada’an nea.” ³⁷ Barnabas si pa’ar ma’ali kangkasi si Yohanes si patotoren Markus; ³⁸ ta’an si Paulus ampit en tegol limila’, kaa e reiy’ le’os maali sitou si timele’u mola nisea waki Pamfilia wo si reiy pa’ar kumi’it ma’ayang mewali-wali ampit nisea. ³⁹ Eng kapualitan i ti’i e limentutla pesali’isi’an tarem, i ka’ayo sea mineta’atasan wo si Barnabas si minali si Markuskangkasi ma’an nisia moleme waki Siprus. ⁴⁰ Ta’an si Paulus si mineleng si Silas, wo nu reiy’ mouw nu neiy i sarakanla ne patuari-patuari i ti’i witu e nupus karunia ni Tuhan ⁴¹ o mae mouw sia lumedongla en Siria wo eng Kilikia kasuatan mateguhla se jema’at-jema’at witu.