¹ Kete’uanola kaa witu e nendo-nendo kesampetan e laa meiy e masa kapedisan. ² Sitou si laa meupusla en touna nuesa wo mamuali hamba e loit. Nisea se laa lumo’odegh wo tumingkeiyla en tou, nisea se laa mamuali menenero’, nisea se laa rumangu wia se tu’a wo se reiy’ mete’u metarumakase, se reiy’ mepadungla e agama, ³ se reiy’ tongkoupusen, se reiy’ pa’ar medamean, se pa’ar mewewu’ulela sitou, se reiy’ mete’u mali en tou, se lela’, se reiy’ pa’ar e le’os, ⁴ se pa’ar makhianat, se reiy’ maghenang e labot, se ma’asar-asar se mete’u, se lebe maki’itla en serit ta’an i te maki’itla si Empung. ⁵ Eng kenaramen lahiriah nisea se makelangla e raghes nea, ta’an witu e nulitna nisea se makelongla eng kaente’an nyi’a. Wa’akatenola sea i ti’i! ⁶ Karengan witu e nelet nea niatoan se tou-tou ghimorem memene-menes witu em bale ne tou walina wo me’etes se wewene-wewene lewea’ se winuta’an ampit en dosa wo se kinuasa’ala e minegheghioan serit, ⁷ se ma’anouw tu’u reiy’ maena-ena’ pa’ar turu’un ta’an se reiy’ makasine’u eng kaulitan. ⁸ Masuat tanu si Yanes wo si Yambres se simu’usuk si Musa, en tuanakan kangkasi nisea se simu’usuk eng kaulitan. Akal nea en teri wo iman nea e reiy’ taang uji. ⁹ Ta’an tantu mouw nisea se reiy’ lumaa lebe maju, karengan tanu witu eng kapualitan ni Yanes wo ni Yambres, eng kawe’engelan nea tu’u e laa pakaloo’o-loo’ola i wee em baya ne tou. ¹⁰ Ta’an nikoo koo kimi’itouw en teturu’ku, eng kenaramen em patou-touangku, em pendiriangku, e imanku, eng kasabaarangku, e nupusku wo eng katentemangku. ¹¹ Nikoo koo kimi’itouw em pineme’itan pasiasa’an wo eng kapedisan tanu em pine’anku mouw waki Antiokhia wo waki Ikonium wo waki Listra. Em baya em pasiasa’an i ti’i em pine’anku wo si Tuhan si rimeta’ momi niaku witu nyi’a. ¹² Memang susur tou si pa’ar tumou rumaghes witu si Kristus Yesus si laa peme’itan en siasa, ¹³ Kasuatan sitou lewo’ wo si le’ekok si laa maka’awesla eng kalewo’, nisea se maseipla wo i seipla. ¹⁴ Ta’an satorona koo minena-ena’ timiboiy witu eng kaulitan sinungkulmu mola wo e niemanmula, ampit e reiy’ maena-ena’ maghenang sitou timuru’ mola nyi’a wia nikoo. ¹⁵ Ghenangenola kangkasi kaa waki nu oki’pe’ nikoo koo simine’u mouw eng Kaol Suci en toro meela hikmat wia nikoo wo tumeper nikoo witu eng kelawiran kaa e iman wia si Kristus Yesus. ¹⁶ Reiy’ sa mina’asa em patik neiy i ilhamla ni Empung e memang maka ka’ara’an kaa laa mewewee teturu’, kaa laa mapaloo’o-loo’ola eng kaselokan, kaa laa mapalele’osla eng kalakuan wo kaa laa dumidik sitou witu eng kaulitan. ¹⁷ Ampit en tuana susur tou si kapunya’an ni Empung si laa pakalekepela i wee en susur pasiwo-siwon le’os.