¹ Kaa ni’itu, heiy oki’ku, mamuali mouw ente’ kaa e nupus karunia witu si Kristus Yesus. ² Sapa e liningamu mola wia niaku witu en sinaru ne kelaker sairi, i emanola i tu wia se tou-tou toro emanela, wo kangkasi se sigha’ mawee teturu’ wia se tou walina. ³ Kumi’itouw peme’itan tanume siesa prajurit le’os waki si Kristus Yesus. ⁴ Siesa prajurit kasuatan mame’inakut si reiy’ mepepusingla en touna ampit eng kapualitan-kapualitan pengidopanna, rio ampit en tuana nisia si mekepa’aren wia si komandanna. ⁵ Siesa olaragawan si toro i te maka’ato mahkota tanume si juara, sakawisa sia melelowa’an i ki’it e natoran-natoran olahraga. ⁶ Siesa tumetani’ si mepa’ayang mengente’ si lewo’ sa reiy’ mouw kumetare kumeipi e wu’ana em pine’inakutna. ⁷ Weeanola ghenang sapa e neiyku i lila’la; Tuhan si laa meela wia nikoo em pangartian witu e reiy’ sa mina’asa wo’o sapa. ⁸ Ghenangenouw e nyi’i: Yesus Kristus, si timo’oromi waki elet ne tou minate, si neiy mouw i patoula tanume si see’ ni Daud, ni’itu mouw e neiyku i abarla witu e Injilku. ⁹ Karengan em paabaran e Injil i yi’i mouw o ku peme’itan, awes tare ku tinorongku tanu siesa lumelewo’, ta’an e nuwu’ ni Empung e reiy’ minatorongku. ¹⁰ Kaa ni’itu niaku ku sabaar minesa’an em baya nyi’a i ti’i i wee se tou-tou pineleng ni Empung, rio nisea kangkasi se maka’ato eng kelawiran witu si Kristus Yesus ampit eng kamulia’an kekal. ¹¹ Nulitouw e lelila’an i yi’i: “Sa kita mate ampit Nisia, nikita tu’u kita laa tumou ampit Nisia: ¹² sa kita tumentem, nikita tu’u kita laa kumi’it merenta ampit Nisia; sa kita sumangkal Nisia , Nisia tu’u si laa sumangkal nikita; ¹³ sa kita reiy’ lale’, Nisia si minena-ena’ lale’, karengan Nisia si reiy’ mete’u kumelong en tou-Na.” ¹⁴ I ghenange’la wo i sani’pe’la em baya nyi’a i ti’i ampit e makauli-ulit wia nisea witu en sinaru ni Empung, rio te’a sea mepepureiyan e lelila’an, karengan eng kapualitan i ti’i eng kasa reiy’ si ka’ara’an, awes tare eng kumaceula se tou liminga nyi’a. ¹⁵ Pe’inakutenola rio koo waar witu en sinaru ni Empung tanume siesa tou memema’ayang te’a mouw meirang, makaredeiy maabarla e lelila’an eng kaulitan i ti’i. ¹⁶ Ta’an liseiyenola e lo’odegh wo e reiy’ suci e maawes i tela eng kefasikan. ¹⁷ E lelila’an nea maanap tanu e rumara kanker. Witu e nelet nea neiy i kaghorem si Himeneus wo si Filetus, ¹⁸ se sime’epangomi waki eng kaulitan ampit maturu’la kaa eng kinato’oran ta eng kimelangouw wo ampit en tuana en tumerila e iman ne esa nga weteng tou. ¹⁹ Ta’an en to’otolan neiy i reta’la ni Empung i ti’i en te’etep wo e wa’ilna nyi’a mouw: “Tuhan si sumine’u seiy si kapunya’an-Na” wo “Susur tou si matotor e ngaran ni Tuhan satorona si tumele’ula eng kalewo’an.” ²⁰ Witu e wale wangko’ reiy’ i te atoan em perabot mas wo em perak, ta’an i te kangkasi eng kayu wo en tana’; eng ketare-tare pinake kaa e maksud mulia wo eng kesampetanna kaa e maksud reiy’ kasa mulia. ²¹ Sa siesa tou si sumucila en touna waki kapualitan-kapualitan e lewo’, nisia si laa mamuali perabot em bale kaa e maksud mulia, nisia si kinudusla, si linoo’ waar laa paken ni tuangna wo neiy i sadiala witu en susur pepa’ayangen mulia. ²² Kaa ni’itu wa’akatenola en serit ne tou muda, ki’itenouw eng ka’adilan, eng kelale’an, e nupus wo en dame mewali-wali ampit nisea se maaleiy wia si Tuhan ampit e nate murni. ²³ Liseiyenola em poong-poong penero-neron, e we’engel wo e reiy’ waar. Nikoo koo mete’u kaa em poong-poong i ti’i e lumentutla pe’isingan, ²⁴ kasuatan siesa hamba ni Tuhan si reiy’ toro me’ising, ta’an si lewo’ sa reiy’ rinda wia em baya ne tou. Nisia si lewo’ sa reiy’ sigha’ mawee teturu’, sabaar ²⁵ wo ampit e rinda si toro tumeper sitou pa’ar masu’usuk, karengan wo’o wona’ si Tuhan si meweweela kalempotan wia nisea kaa laa makedo’ wo ma’aka-aka wia nisea i ka’ayo sea sumine’u eng kaulitan, ²⁶ wo ampit en tuana nisea se minawena’as sumeup, karengan se neiy i kareta’mi waki we’etes ni Iblis e mina’akesouw nisea witu eng kepa’aranna.