¹ Witu en sinaru ni Empung wo ni Kristus Yesus si laa ma’akimla se tou matou-tou wo se minate, niaku ku maower ampit e maka uli-ulit wia nikoo demi em pinapaloo’o-loo’oan-Na wo kaa eng Keraja’an-Na: ² I abarola e nuwu’, tumiro-tiro’ mouw e le’os ka’apa reiy’ le’os e nedona, i papaloo’o-loo’o mola sapa en selok, togorenouw wo nge’enge’anola ampit e reiy’ sa mina’asa kasabaaran wo en teturu’. ³ Karengan e laa meiy e nedona, sitou si reiy’ mete’u kasi sumungkul en teturu’ segaya’, ta’an nisea se laa merurla se guru-guru i ki’it eng kepa’aran nea kaa laa mapateu-teula eng kepa’aran en talinga nea. ⁴ Nisea se laa lumengela en talinga nea witu eng kaulitan wo muka’ nyi’a i wee e ne’umanen. ⁵ Ta’an kuasa’anola en toumu witu e reiy’ sa mina’asa kapualitan, sumabaarouw peme’itan, tuananola em pepa’ayangen mengengabar e Injil wo lekepenola e lukar pelayanannu! ⁶ Tanume en touku, e raa’ku muleiy mouw i patiisla tanume en sesempe wo noras eng kepepateku en tawi mouw. ⁷ Niaku ku simampetola em palowa’an e le’os, niaku ku mina’ayo mola e warot kesampetan wo niaku ku miniara mola e iman. ⁸ Teakan en tiniro’ mouw i wee niaku e mahkota eng kaulitan e laa i karuniala ni Tuhan wia niaku, Akim si adil, witu e nendo-Na; ta’an reiy’kan i te wia niaku, ta’an i te kangkasi wia em baya ne tou malelola eng ke’e eiy-Na. ⁹ Me’inakutouw rio makarengan meiy wia niaku, ¹⁰ karengan si Demas si mineupusola eng kaoatan i yi’i wo tumele’ula niaku. Nisia si minae mouw waki Tesalonika. Si Kreskes si minea mouw waki Galatia wo si Titus si minea waki Dalmatia. ¹¹ Lukas i te si minena’ ampit niaku. Eanomi si Markus wo alinomi sia wia nyi’i, karengan em pelayananna em pe’uku-ukumen i wee niaku. ¹² Si Tikhikus si neiyku mouw i papa’ali mea waki Efesus. ¹³ Sa koo meiy wia nyi’i alini kangkasi eng karaiy neiyku i tele’umi waki Troas witu em bale ni Karpus wo kangkasi eng kaol-kaolku, eng kasa i paketa-ketare em perkamen i ti’i. ¹⁴ Aleksander, si sumesiwo tambaga i ti’i, si lakerouw simiwo eng kalewo’an wia niaku. Tuhan si laa sumuli’la nisia i ki’it em pasiwo-siwonna. ¹⁵ Satorona nikoo kangkasi koo mategha-tegham wia nisia, karengan nisia si kasa masu’usuk en teturu’ ta. ¹⁶ Witu e nedo perapitangku eng kasa ketare e reiy’ siesa tou tu’u si simawang niaku, em baya nea se timele’ula niaku – satorona eng kapualitan i ti’i te’a i pepepesa’anla wia nisea –, ¹⁷ ta’an si Tuhan si timeperola niaku wo kimeterola niaku, rio ampit e nieletangku e Injil ni’i abarla ampit eng kawutana wo em baya ne tou reiy’ Yahudi se lumingala nyi’a. Ampit en tuana niaku ku neiy’ i kareta’mi waki suma ni singa. ¹⁸ Wo si Tuhan si laa mayami niaku waki susur em pe’inakuten e lewo’. Nisia si laa lumawirla niaku, i ka’ayo ku ghumorem witu eng Keraja’an-Na waki sorga. I wee Nisia mouw eng kamulia’an eng keure-urena! Amin. ¹⁹ Tabea wia si Priska wo si Akwila wo wia se me’urang ni Onesiforus. ²⁰ Erastus si minena-ena’ waki Korintus wo si Trofimus si neiyku i tele’ula witu eng ka’ada’an rara’an waki Miletus. ²¹ Me’inakutouw meiy wia nyi’i nu reiy’pe’ noras eng ge’egher. Tabea waki si Ebulus wo si Pudes wo si Lanus wo si Klaudia wo waki em baya ne patuari. ²² Tuhan si rumapitla e rohmu. E nupus karunia-Na e rumapitla nikouw!