¹ Tanume eng ke’e eiy ni Tuhan ta Yesus Kristus wo eng kine’e erur ta ampit Nisia nikeiy keiy makiwee wia nikoo, patuari waya, ² rio kouw te’a repet malikoko wo balisa, le’os kaa e ilham e roh, ka’apa tu’u kaa em paabaran ka’apa en surat neiy i lila’la waki nikeiy, tanu mokan e nendo ni Tuhan em bia mouw. ³ Te’a mouw kouw mewewee en toumu ni’i seipla ni tou ampit eng kenaramen kumura tu’u kangkasi! Karengan nu reiy’pe’ e Nendo ni’itu e lewo’ sa reiy’ mouw meiype’ ketareanna e murtad wo e lewo’ sa reiy’ mouw i papaloo’o-loo’ola ketareanna sitou durhaka, si lewo’ sa reiy’ mapuneng, ⁴ nyi’a i ti’i si kesaru merakekla en tou witu natas e reiy’ sa mina’asa patotoren ka’apa em pasempen tanume si Empung. Awes tare nisia si rimuber witu em bait ni Empung wo pa’ar mapaloo’o-loo’ola en tou tanu si Empung. ⁵ Reiy’ ku’a re’en ghinenang miouw, kaa eng kapualitan i ti’i e re’ereghouw i peila’kula wia nikouw, katoroan niaku nu mewali-walipe’ ampit nikouw? ⁶ Wo en teakan nikouw kouw mete’u sapa en timaang nisia, i ka’ayo sia tare mouw i te laa mapaloo’o-loo’ola en tou witu e nedo neiy mouw i tantula i wee nisia. ⁷ Karengan kaa eng kenaramen pengiro-ngirong eng kadurhaka’an e mamuleiy mouw mepa’ayang, ta’an en teakan waweane’ si timaang. Sa si timaang nyi’a i ti’i si neiy mouw i singkirla, ⁸ witu e nedo ni’itu mouw si dumedurhaka si tare mouw i te laa mapaloo’o-loo’ola en touna, ta’an si Tuhan Yesus si laa munu’ nisia ampit e nasengan en suma-Na wo laa rume’ila nisia, sa Sia meiy sumeup. ⁹ Eng ke’e eiy ni dumedurhaka i ti’i nyi’a mouw em pepa’ayangen ni Iblis, wo laa i pewali e minegheghioan pasiwo-siwon makalikokon, eng kowa’-kowa’ wo e mujizat-mujizat palsu, ¹⁰ ampit e minegheghioan em biles lewo’ wia se tou-tou se lewo’ sa reiy’ mapuneng karengan nisea se reiy’ simungkul wo mineupusla eng kaulitan en toro lumawirla nisea. ¹¹ Wo e ni’itu mouw eng karenganna si Empung si minapa eiy eng kaseipan wia nisea, en tumuanala nisea ma’eman witu en towo, ¹² rio ukumen em baya ne tou se reiy’ ma’emanla eng kaulitan wo se pa’ar eng kalewo’an. ¹³ Ta’an laa nikeiy keiy lewo’ sa reiy’ maena-ena’ matotor en syukur wia si Empung karengan nikouw, patuari waya, si’i koupusla ni Tuhan, karengan si Empung wakipe’ eng ketareanna si minelengouw nikouw kaa laa pelelawiren witu e Roh eng kimudusla nikouw wo witu eng kaulitan e nieman miouwla. ¹⁴ Iwee e ni’itu mouw Nisia si kimeretouw nikouw kaa e Injil neiy i abar meiyla, i ka’ayo kouw toro maka’ato eng kamulia’an ni Yesus Kristus, Tuhan ta. ¹⁵ Kaa ni’itu, rumedeiy mouw te’etep wo tumiboiyouw witu en teturu’-teturu’ eng kina’atoan niouw wia nikeiy, le’os eng kenaramen ni’i peila’la ka’apa tu’u eng kenaramen neiy i kepatik. ¹⁶ Wo Nisia, si Tuhan ta Yesus Kristus, wo si Empung, Ama’ ta, witu e nupus karunia-Na si mineupusola nikita wo si minanugerah mola em pangiboran abadi wo em paarapen le’os wia nikita, ¹⁷ satorona e mibor wo eng kumeterla e natemu witu em pepa’ayangen wo en tetotoren le’os.