1
Waki si Paulus, Silwanus wo si Timotius, wia se jema’at ne tou-tou Tesalonika witu si Ama’ Empung ta wo witu si Tuhan Yesus Kristus.
2
E nupus karunia wo en dame sejahtera waki si Empung, Ama’ ta, wo waki si Tuhan Yesus Kristus e rumapitla nikouw.
3
Nikeiy keiy lewo’ sa reiy’ maena-ena’ matotor en syukur wia si Empung karengan nikouw, patuari waya. Wo memang waarouw tuana, karengan e imanmu maka awesouw wo e nupusmu siesa wia se walina e maka ente’ mouw witu e nelet miouw,
4
I ka’ayo witu se jema’at-jema’at ni Empung meiy nuesa se mesawa’la tanume nikouw karengan eng katentemannu wo e imannu witu e reiy’ sa mina’asa pasiasa’an wo em palotoiyan pineme’itan niouw:
5
e nesa bukti tanume em paadilan ni Empung, e minapaloo’o-loo’ola kaa nikouw kouw waar mamuali warga eng Keraja’an ni Empung, nikouw en teakan nu peme’itan karengan eng Keraja’an i ti’i.
6
Karengan memang adil wia si Empung kaa laa mesesuli’la em palotoiyan wia nisea se malotoiy nikouw
7
wo kaa laa meweweela kapenasan wia nikouw nu neiy i lotoiy, wo kangkasi wia nikeiy, witu e nedo si Tuhan Yesus waki ghorem en sorga si minapaloo’o-loo’ola en tou-Na minewali ampit se malaikat-malaikat-Na, witu eng kuasa-Na, witu e napi melaya-layas,
8
wo simuli’la wia nisea se reiy’ pa’ar sumine’u si Empung wo se reiy’ melale’la e Injil ni Yesus, Tuhan ta.
9
Nisea i yi’i se laa kumelang witu e nukuman kapunengan eng keure-urena, se i wa’akatla waki hadirat ni Tuhan wo waki kamulia’an eng kaante’an-Na,
10
sakawisa Sia meiy witu e nendo i ti’i kaa laa pelelo’orela witu e nelet ne tou-tou kudus-Na wo kaa laa epungen em baya ne tou ma’eman, karengan eng kasairian niali meiymi wia nikouw e nieman miouw mola.
11
Kaa ni’itu nikeiy keiy reiy’ maena-ena’ masombayang kangkasi i wee nikouw, rio si Empung ta si mapokeiyla nikouw kouw waar witu eng kineretan-Na wo ampit eng kaketeran-Na lumekepla eng kepa’arannu kaa laa sumiwo le’os wo lumekepla e reiy’ sa mina’asa pepa’ayangen e imanmu,
12
i ka’ayo e ngaran ni Yesus, Tuhan ta, e lino’orla witu nikouw wo nikouw witu Nisia, i ki’it e nupus karunia ni Empung ta wo ni Tuhan Yesus Kristus.