¹ Tumodongla nyi’a, patuari waya, sumombayangouw i wee nikeiy, rio e nuwu’ ni Tuhan e maka’ato kamajuan wo e lo’oren, masuat tanu e minamuali mola witu e nelet miouw, ² wo rio keiy i kewayami waki se sumeserok wo se tou-tou lewo’, karengan reiy’ em baya ne tou se minaka’ato e iman. ³ Ta’an si Tuhan nyi’a mouw si lale’. Nisia si laa kumeterla e natemu wo miara nikouw witu en sinaru e lewo’. ⁴ Wo nikeiy keiy ma’eman witu si Tuhan, kaa en sapa neiy i ower meiyla wia nikoo, en tinuana miouwla wo e laa tuanan niouwla. ⁵ Satorona si Tuhan si minena-ena’ mapatorola e natemu witu e nupus ni Empung wo witu eng katenteman ni Kristus. ⁶ Ta’an nikeiy keiy maower wia nikoo, patuari waya, witu e ngaran ni Tuhan Yesus Kristus, rio kouw ma’akatla en tou waki se susur patuari reiy’ matuanala em pepa’ayngenna wo se reiy’ maki’it en teturu’ sinungkul miouw mola wia nikeiy. ⁷ Karengan nikouw nuesa kouw mete’u, kumura kouw nu lewo’ sa reiy’ kumi’itla em pa’asa-asaran neiy, karengan nikeiy keiy reiy’ pepar mepa’ayang witu e nelet miouw, ⁸ wo reiy’ kumaan e roti ne tou ampit e reiy’ sipenoron, ta’an nikeiy keiy me’inakut wo mengente’ me’ulit oat o wengi, rio te’a mamuali pemesa’anen wia si seiy i te tu’u witu e nelet miouw. ⁹ E reiy’ karengan nikeiy keiy reiy’ mekehak i wee e ni’itu, ta’an i te karengan nikeiy keiy pa’ar mesesiwola en tou meiy pa’asa-asaran i wee nikouw, rio ki’itan niouw. ¹⁰ Karengan, kangkasi e nedo nikeiy nu witu e nelet miouw, nikeiy keiy minee e nge’enge’ i yi’i wia nikouw: sa siesa tou si reiy’ pa’ar ma’ayang, te’a mouw sia mekekaan. ¹¹ Nikeiy keiy limila’la e nyi’i karengan nikeiy keiy liminga, kaa wawean tou si reiy’ tertib em patou-touanna wo si reiy’ mepa’ayang, ta’an i te si maringangar ampit eng kapualitan-kapualitan reiy’ sika’ara’an. ¹² Se tou-tou tuana se ni’iwetan neiyla wo ngine’enge’ala witu si Tuhan Yesus Kristus, rio sea minena-ena’ lompon matuanala em pepa’ayangen nea wo ampit en tuana si kumaan eng kekaanenna nuesa. ¹³ Wo nikouw, patuari waya, te’a mouw masenso-senso’ masiwo sapa e le’os. ¹⁴ Sa wawean tou si so’o melelingala sapa e neiy meiy i lila’la witu en surat i yi’i, tanda’ala sia wo te’a makasewok ampit nisia, rio sia meirang, ¹⁵ ta’an te’a mouw mapokeiyla nisia tanu si kesaru, ta’an togorenouw sia tanume siesa patuari. ¹⁶ Wo Nisia, si Tuhan en dame sejahtera, satorona si kumaruniala en dame sejahtera-Na mangapawewee-wee, witu e reiy’ sa mina’asa kapualitan, wia nikouw. Tuhan si rumapitla nikouw nu waya. ¹⁷ Tabea waki niaku, Paulus. En tabea i yi’i neiyku i patik ampit e lawasku nuesa. E nyi’i mouw eng kowa witu en susur en surat: teinti’i mouw em patikangku. ¹⁸ E nupus karunia ni Yesus Kristus, Tuhan ta, e rumapitla nikouw nu waya!