¹ Eng kesampetanna, patuari waya, nikeiy keiy makiwee wo mange’enge’la nikouw witu si Tuhan Yesus: Nikouw kouw liminga mola wia nikeiy kumura kouw lewo’ sa reiy’ tumou rio mekepa’aren wia si Empung. Eng kapualitan i ti’i memang eng kini’itan niouw mouw, ta’an e le’osouw kouw tumuanala nyi’a eng kasa makauli-ulite’ kasi. ² Nikouw kouw mete’u kangkasi en teturu’-teturu’ wisa e neiy mouw i wee meiyla wia nikoo witu e ngaran ni Tuhan Yesus. ³ Karengan e nyi’i mouw eng kepa’aran ni Empung: em pengudusannu, nyi’a i ti’i rio kouw ma’akatla em pesa’amekan, ⁴ rio kouw siesa o siesa medo siesa wewene mamuali tu’awewenemu nuesa wo tumou witu em pengudusan wo em paormatan, ⁵ reiy’ witu eng kepa’aran eng hawa nafsu, tanu en siniwo ne tou-tou reiy’ makasine’u si Empung, ⁶ wo rio witu eng kapualitan-kapualitan i yi’i sitou te’a matuanala si patuarina ampit e reiy’ le’os ka’apa maponge’la nisia. Karengan si Tuhan nyi’a mouw si sumesuli’ witu em baya nyi’a i yi’i, tanu e neiy mouw i lila’ meiyla wo i ledosla eng ketare wia nikoo. ⁷ Empung si kimeret nikita reiy’ kaa laa metetuanala sapa eng kewur, ta’an i te sapa eng kudus. ⁸ Kaa ni’itu seiy si masede’ e nyi’i reiy’ kaa mesesede’ sitou, ta’an i te mesesede’ si Empung si minee mola kangkasi e Roh-Na kudus wia nikouw. ⁹ Tanume e nupus pepatuarian reiy’ perlu i patikla wia nikoo, karengan nikouw nuesa kouw minajarola meupus o meupusla waki si Empung. ¹⁰ Eng kapualitan i yi’i en tinuana miouwla kangkasi wia em baya ne patuari waki e minapekasa wilayah Makedonia. Ta’an nikeiy keiy ngume’enge’la nikouw, patuari waya, rio kouw makauli-ulite’ kasi matuanala nyi’a. ¹¹ Wo papokeiyola tanume e nesa kaormatan kaa laa tumou lompon, kaa laa me’urus eng kinapoongan-kinapoongan nuesa wo ma’ayang ampit e lawas, tanu e neiy mouw i ower meiyla wia nikoo, ¹² i ka’ayo kouw tumou tanume se tou-tou sopan witu em beren ne tou luar wo reiy’ kumayong wia nisea. ¹³ Tumodongla nyi’a nikeiy keiy so’o, patuari waya, kaa nikouw kouw reiy’ mete’ula en tanume nisea se timayan, rio kouw te’a mengasi’ tanu se tou-tou walina se reiy’ makapunyala em paarapen. ¹⁴ Karengan sa wona’ kita ma’eman, kaa si Yesus si minate mouw wo si timo’orouw, takar kita ma’eman kangkasi kaa nisea se timayanouw witu si Yesus se laa eruren ni Empung mewali-wali ampit Nisia. ¹⁵ E nyi’i ni’i lila’ meiyla wia nikoo ampit e nuwu’ ni Tuhan: nikita si matou-tou, si timele’upe’ i ka’ayo eng ke’e eiy ni Tuhan, ma’an mekasa ta reiy’ laa rumeriorla nisea se timayanouw. ¹⁶ Karengan witu e nedo eng kowa’ ni’i wee, nyi’a i ti’i witu e nedo si kokong ne malaikat nu maaleiy wo en sesebungen ni Empung e lumegu’, Takar si Tuhan nuesa si laa tumumpami waki sorga wo nisea se minate witu si Kristus se laa kumetare tumo’or; ¹⁷ nu reiy’ mouw i tu, nikita si matou-tou, si timele’upe’, ta laa popon mewali-wali ampit nisea witu e linaak mesesungkul si Tuhan waki angkasa. En tuana mouw nikita ta laa eng keure-urena mewali-wali ampit si Tuhan. ¹⁸ Kaa ni’itu iborenola siesa wia se walina ampit e lelila’an-lelila’an i yi’i.