1
1 Ta’an tanume en zaman wo e masa, patuari waya, reiy’ perlu i pepepatikla wia nikoo,
2
2 karengan nikouw nuesa kouw mete’u uli-ulit, kaa e nedo ni Tuhan e meiy tanu si rongkit witu em bengi.
3
3 Sakaiwsa sea lumila’la: Em baya nyi’a en dame wo e aman – takar i kasenge’mi se tinoro eng kapunengan, tanu siesa wewene megandong si tinoro rumara matimea’ – nisea se tantu mouw reiy’ laa i kaliseiy.
4
Ta’an nikouw, patuari waya, kouw reiy’ matou-tou witu eng kareiydeman, i ka’ayo e nendo ni’itu i kasenge’mi e mineiy mouw nikouw tanu si rongkit,
5
karengan nikouw nu waya nyi’a mouw kouw oki-oki’ en terang wo oki-oki’ e noat. Nikita kita reiy’ mouw tou-tou em bengi ka’apa tou-tou eng kareiydeman.
6
Kaa ni’itu le’osouw te’a kita tumekel tanu se tou-tou walina, ta’an mategha-tegham wo mawena-wena’as.
7
Karengan nisea se timekel, timekel e nedo wengi wo nisea se tinoek, tinoek e nedo wengi.
8
Ta’an nikita, nyi’a mouw ta tou-tou oat, le’osouw ta mawena-wena’as, mekelabungzirahla e iman wo e nupus, wo maka seipa’la em paarapen kelawiran.
9
Karengan si Empung si reiy’ timantula nikita kaa laa toron e nupi’, ta’an kaa laa maka’ato eng kelawiran ni Yesus Kristus, Tuhan ta,
10
si minate mouw i wee nikita, rio andi ta mategha-tegham, andi ta timekel, nikita ta matou-tou mewali-wali ampit Nisia.
11
Kaa ni’itu nge’enge’anola siesa wia se walina wo mewewangunanola kouw tanu e memang patuanan niouwla.
12
Nikeiy keiy makiwee wia nikoo, patuari waya, rio kouw masighi’la nisea nu mepa’ayang mengente’ witu e nelet miouw, si ma’aka-aka nikouw witu si Tuhan wo si matogor nikouw;
13
wo rio kouw makauli-ulit sumu’un nisea witu e nupus karengan em pepa’ayangen nea. Tumou mouw reiy’ maena-ena’ witu en dame siesa ampit se walina.
14
Nikeiy kangkasi keiy mange’enge’la nikouw, patuari waya, togorenouw sea nu matou-tou reiy’ tertib, iborenouw sea nu tewang ate, rapitanouw nisea nu lepe, sumabaarouw wia em baya ne tou.
15
Weeanola ghenang, rio te’a wawean tou si sumuli’ e lewo’ ampit e lewo’, ta’an pe’inakutenola reiy’ siena’na e le’os, wia nikouw siesa o siesa wo wia em baya ne tou.
16
Mepa’a-pa’arola reiy’ maena-ena’.
17
Mena-ena’mouw masombayang.
18
Tumotorouw en syukur witu e reiy’ sa mina’asa kapualitan, kaa ni’itu mouw e neiy i kepa’arla ni Empung witu si Kristus Yesus i wee nikouw.
19
Te’a mouw pesesewuan e Roh,
20
20 wo te’a mouw papokeiyla kumeng e wenti’-wenti’.
21
Ujinouw e reiy’ sa mina’asa wo’o sapa wo tiboiyanouw maka le’o-le’os.
22
I wa’akatola en toumu waki e reiy’ sa mina’asa jenis kalewo’an.
23
Satorona si Empung en dame sejahtera si kumudusla nikouw nu waya wo satorona e roh, e imukur wo e nouwakmu minapiara lekep ampit e reiy’ siwalulang witu eng ke’e eiy ni Yesus Kristus, Tuhan ta.
24
Nisia si kimeret nikouw nyi’a mouw si lale’, Nisia kangkasi si laa lumekepla nyi’a.
25
Patuari waya i sombayangola nikeiy.
26
I pa’ayo mola en tabea meiy wia em baya se patuari ampit en siong kudus.
27
Demi e ngaran ni Tuhan niaku ku ampit eng kasa makiwee wia nikoo, rio en surat i yi’i ni’i wacala wia em baya se patuari.
28
E nupus karunia ni Yesus Kristus, Tuhan ta, e rumapitla nikouw!