¹ Nikeiy keiy reiy’ mouw meketaang kasi, kaa ni’itu keiy minedo kaputusan laa mena’ maesa-esa waki Atena. ² Laa o keiy mapa’ali si Timotius, si patuari mepa’ayang ampit nikeiy i wee si Empung witu em paabaran e Injil ni Kristus, kaa laa mekeketerla e natemu wo mengenge’enge’la nikouw tanume e imanmu, ³ rio te’a wawean tou si moghe e imanna karengan eng kasusa’an-kasusa’an i yi’i. Nikouw nuesa kouw mete’u, kaa nikita kita neiy i tantula i wee e ni’itu. ⁴ Karengan, o kangkasi e nedo nikeiy nu mewali-wali ampit nikouw, e neiy mouw i lila’ meiyla wia nikouw, kaa nikita ta laa me’anla eng kasusa’an. Wo eng kapualitan i ti’i, tanu eng kete’uan niouw, e minamuali mouw. ⁵ Ni’itu mouw eng karenganna, takar niaku, karengan ku reiy’ mouw meketaang kasi, niaku ku minapa’ali mouw nisia, rio ku mete’u en tanume e imannu, karengan niaku ku lieiy sa wo’o wona’ kouw wina’awa’anouw ni memilot wo sa wo’o wona’ em pe’inakuten neiy e minaghio. ⁶ Ta’an en teakan, nu reiy’ mouw si Timotius nu minurikiti waki nikouw wo maali-ali e nabar mekepa’aren tanume e imanmu wo e nupusmu, wo kaa nikouw kouw reiy’ siena’na mawee kenang-kenangan e le’os wia nikeiy wo pa’ar laa maatoan ampit nikeiy, tanu nikeiy kangkasi nu pa’ar laa maatoan ampit nikouw, ⁷ takar nikeiy kangkasi, patuari waya, witu e reiy’ sa mina’asa kase’esekan wo eng kapedisan nikeiy keiy minaibor kaa nikouw wo kaa e imanmu. ⁸ En teakan nikeiy keiy timou sumeup, asal i te kouw te’etep rimedeiy witu si Tuhan. ⁹ Karengan en totor syukur sapa ku’a re’en en toro i sempe meiyla wia si Empung witu e reiy’ sa mina’asa kepa’a-pa’aran, eng kina’atoan neiy kaa nikouw, witu en sinaru ni Empung ta? ¹⁰ Oat o wengi keiy masombayang makauli-ulit, rio kita mawerenan wo ma’awesla sapa e reiy’pe’ awes witu e imanmu. ¹¹ Satorona Nisia, Empung wo si Ama’ ta, wo si Yesus, Tuhan ta, si muka’la nikeiy lalan mea wia nikouw. ¹² Wo satorona si Tuhan si sumiwola nikouw maawes-maawes wo maka kalokonan e nupus siesa wia se walina wo wia em baya ne tou, masuat en tanu nikeiy kangkasi nu moupusla nikouw. ¹³ Satorona Nisia si kumeterla e natemu, rio reiy’ siwalulang wo eng kudus, witu en sinaru ni Empung wo ni Ama’ ta witu e nedo eng ke’e eiy ni Yesus, Tuhan ta, ampit em baya ne tou kudus-Na.