¹ Nikouw nuesa tu’u kouw memang mete’u, patuari waya, kaa eng kine’e eiy meiy witu nelet miouw e reiy’ minaghio. ² Ta’an ma’anouw tu’u keiy nu reiy’pe’ nyi’a, tanu eng kete’uan niouw, nikeiy keiy siniasa mola wo sinero’an waki Filipi, ta’an ampit en tulungan ni Empung ta, nikeiy keiy minaka’ato eng kaberanian kaa ma’abarla e Injil ni Empung wia nikouw witu em pe’inakutan wuter. ³ Karengan e nge’enge’ meiy e reiy’ timoumi waki kaseipan ka’apa waki maksud reiy’ murni wo kangkasi reiy’ rinapitla em biles. ⁴ Eng kapurikitna, karengan si Empung si minokeiy mola nikeiy keiy waar kaa laa mapa’emanla e Injil wia nikeiy, kaa ni’itu mouw keiy masusuiy, reiy’ kaa laa mangimpa’arla sitou, ta’an i te kaa laa mangimpa’arla si Empung si meuji e nate ta. ⁵ Karengan nikeiy keiy reiy’ ma’an mekasa makasuma emis – eng kapualitan i ti’i eng kinete’uan niouwla – wo reiy’ ma’an mekasa makapunyala e maksud loba neiy i kakirong – Empung nyi’a mouw si sairi – ⁶ o kangkasi reiy’ ma’an mekasa keiy masero pujian wia sitou, le’os wia nikoo, ka’apa tu’u wia se tou-tou walina, ma’anouw tu’u keiy toro sumiwo en tuana e nasar se rasul-rasul ni Kristus. ⁷ Ta’an nikeiy keiy masiwo-siwo e rinda witu e nelet miouw, masuat tanu siesa ina’ si meurus wo mapiarala se oki’na. ⁸ En tuana mouw nikeiy, witu e nupus o rendem wangko’ wia nikouw, reiy’kan i te rela meweweteng e Injil ni Empung ampit nikouw, ta’an kangkasi em petou-touan neiy nuesa ampit nikouw, karengan nikouw kouw neiy mouw i koupus meiyla. ⁹ Karengan e ghinenang miouwpe’, patuari waya, em pine’inakut wo em bedu meiy. Kasuatan nikeiy nu mepa’ayang oat o wengi, rio te’a mamuali pemesa’anen wia si seiy i te tu’u kangkasi witu e nelet miouw, nikeiy keiy maabarla e Injil ni Empung wia nikouw. ¹⁰ Nikouw mouw si sairi, tuanakan kangkasi si Empung, kumura eng kesaleh, adil wo e reiy’ siwalulangna keiy matuanala witu e nelet miouw, nu ma’eman. ¹¹ Kete’uan niouw, kumura nikeiy, tanu si ama’ wia se oki’na, ngime’enge’ mola nikouw wo kimeterola e nate miouw siesa demi siesa, ¹² wo ampit eng kasa makiwee, rio kouw matou-tou minatoroan ampit eng kepa’aran ni Empung, si kimeret nikouw witu eng Keraja’an wo eng kamulia’an-Na. ¹³ Wo kaa ni’itu mouw o keiy reiy’la siena’na matotor en syukur kangkasi wia si Empung, karengan nikouw kouw simungkulouw e nuwu’ ni Empung neiy i abar meiyla i ti’i, reiy’ tanu e lelila’an ni tou, ta’an – wo memang eng kasa uli-ulit tuana – tanume e nuwu’ ni Empung, e mepa’ayang kangkasi witu nikouw nu ma’eman. ¹⁴ Karengan nikouw, patuari waya, kouw minamuali mouw maki’i-ki’it ne je’ma’at-jema’at ni Empung waki Yudea, jema’at-jema’at witu si Kristus Yesus, karengan nikouw kangkasi kouw pineme’itanola waki se ka’ampit-ka’ampit esa nge bangsamu e reiy’ sa mina’asa wo’o sapa em pineme’itan neala waki se tou-tou Yahudi. ¹⁵ Awes tare se tou-tou Yahudi i ti’i se minunu’ mouw si Tuhan Yesus wo se nabi wo simiasa mouw nikeiy. Sapa e mekepa’aren wia si Empung reiy’ pepadungen neala wo em baya ne tou se pasu’usuken neala, ¹⁶ karengan nisea se pa’ar mengape-ngape’la nikeiy nu ma’abarla e Injil wia se bangsa walina i wee eng kelawiran nea. Tuana mouw nisea nu reiy’ maena-ena’ maawes en dosa nea i ka’ayo minalekep eng kelakerna wo en teakan e nupi’ eng kasa mouw timoro nisea eng kawuta-wutana. ¹⁷ Ta’an nikeiy, patuari waya, katoroan neiy i ketampasi waki nikouw, wa’akat witu em beren, ta’an reiy’ wa’akat witu e nate, kasa uli-uli, ampit e lelo wangko’ nikeiy keiy mine’inakutola kaa meiy melelalesla nikouw. ¹⁸ Karengan nikeiy keiy minepa’arouw ma’eiy wia nikouw – niaku, si Paulus, awes tare lebe witu e mekasa –, ta’an si Iblis si minape’ mola nikeiy. ¹⁹ Karengan seiy ku’a re’en si paarapen neiy ka’apa si kepa’a-pa’aran neiy ka’apa si mahkota eng kesawa’an neiy witu en sinaru ni Yesus, Tuhan ta, witu e nedo ke’e eiy-Na, sa reiy’ nikouw? ²⁰ Uli-ulit, nikouw mouw si kamulia’an neiy wo si kepa’a-pa’aran neiy.