¹ Kole bana tama ta tena, Yesus na palage hoba mono na dikki taha rona dauNa. ² Mono, etewe, yidda da ngidyi tabaraNa wu ata kalikku ka baika ta pinya. Kole bana etawe hatena yidda, Yesus linage tabarana ata kalikku nada. ”Hamaddoge atemu, anaGu, jalamu hawali begudi.” ³ Bege, kapirana ahli Taurat lidade ta ateda, "Ata nade bai nage rehiyi Allah!" ⁴ Ta nyiduwe, Yesus na tadawe paha ngadada yidda, linage, "ahha mi bamu hangadage ka japata ta atemu? ⁵ Gi dahoge karehi lewara, balida, 'Jalamu ha walidi, 'Kaddewu mono kakowula? ⁶ Ta nyiduwe, daja lage mi kamu tadawe inna ta panu tana Anana Kadadi ata na kawahage ha wali na jala.” Bege, Yesus linage ta ata kalikku nada, "Kadewuge, keke tawe hadau duramu'mono haggau ge!" ⁷ Nyiwe, nyi na kade mono hagga. ⁸ Tabolo, kole ata buta etawe kama hada inna, yidda da bangara mono hamanadai Allah ka yiwe kawaha katau dana inna ta barana kadadi ata. Matius Ka Kahha Wali Katakku Dokuni Yesus ⁹ Kole Yesus bana kako wali taha dau neda, Nyi na etayi wu ata ka nagaranai Matius katamrana ngodo tahha dau kahha wallu katakku. Lohho, Yesus linage tabarana, "Dokuga Nauwa.” Mono, Matius dede mono dokuni Yesus. ¹⁰ Ta mahiggo Yesus ngodo bana yayo lari ta umma inna, etawe, buta ka kahha wallu katakku mono ata doku mai, lhho ngodo ya ole dangani Yesus mono ana hakodo Na. ¹¹ Mono, kole ata Farisi etawe hada inna, yidda lidage ta bara ana hakodoNa, "Ahha Gurumu ya ole dangadi tangada ata ka kahha wallu katakku mono ata doku?" ¹² Ta nyiduwe, kolei Yesus bana rangewe inna, Nyi linage, "Yidda ai kalawara waleda kabu atek mana mata riyo, tabolo yidda kalawara. ¹³ Ta nyiduwe, kakola mono hamatarage ngihige inni, 'Nauwa ug kamadige marada atemu, wale marakak ma, 'oro Nauwa bagu maiwa wale kamailka dakma guge katena, tabolo ata ka jala.” Kanukka Tutu Kabukta ¹⁴ Bewalge, ana hakodanai Yohanes amidi tabarai Yesus mono naka ka nukawe, "Ahha nami mono ata farisi rayige kabukta, tabolo ana hakodoMu aida kabuktaka?" ¹⁵ Mono, Yesus linage tabarada yidda, "Dak kakwe ata kadokudi kaha ummana bana maropoyi ateda aina diki ho kabani kapaha lawaiyo ba dayo ole danga hodi yidda? Ta nyiduwe, enga dikige rahige kole kabani ka mai paha lawai nada ba anagala dani wali tabarada yidda, mono bege yidda enga kabuktada.” ¹⁶ Wale lakma wuak ata kadabara waina kaba beru ta kalabe ka tiyo, oro ha dabara wai inna na hirrawe kalabe tiyo mono kiki mada nage majira kage. ¹⁷ Dumo, wale lakma ata ka biyo anggur beru ta ta kaleku kaba kalita ka tiyo. Nyi bataudage, kaleku kaba inna enga mahirrage, mono anggurge enga majokuge, mono kaleku kaba kalitana enga wetarage, Ta nyiduwe, yidda da ijala anggur kaberu ta kaleku kaba kalita kaberu jala dajalage ka duda kana kana engadi beru.” Yesus Naha Kadde Mono Naha Tagaha ¹⁸ Tamrana Yesus balinna ge inna tabarada yidda, eteyi, wu pa ama umma dau kangote ammini kawojoni Nyi, mono linage, "Ana lawaiyigu abu mate dahingkina. Ta nyiduwe, mai kiwu kamu hajola kini limaMu ta katakuna, nyi enga morhana.” ¹⁹ Lohho, Yesus kadde mono dokuni ata nada, tau dajala nage anaha kodoNa. ²⁰ Mono, etayige, wu lawai kamoja bena rayo ngihina kabulu duda dau dahekayi Yesus wali ta lira mono narro nage hupu kalabbeNa, ²¹ oro lawai nada linage ta tau dauna, "Nyi nauwa bagu joja nage kalabeNa, nauwa enga tagahagu.” ²² Ta nyiduwe, Yesus na gillaka monlo na torroyi lawai nada, lohho linage, "Ha didarawe atemu, ta anaGu, hatenamu nyi kahha tagahawu.” Nedda memage, tagahha lawai nada. ²³ Kolei Yesus bana dikki ta ummana kapala umma dau kangote inna mono na etayi kaha uppu ta lalu mono ka ngote ata ka wihhakka danga, ²⁴ Nyi linage tabarada ata rada, "Kakowuge, oro lakawa lawai nada walena matekma tabolo dura nage.” Mono, yidda da malhani Yesus. ²⁵ Tabolo, kole ata buta rada ba wugayi huna, Yesus tama nage lohho na naroni limana lakawa nada, mono lakawa lawai nada dummo na kadde. ²⁶ Li inna na dikkiwe ta tangage hdau inna. Yesus Naha Tagahi Duda Ata Kamoro ²⁷ Kole Yesus kako wali taha hadau neda, duda ata moro dokuni Nyi ha gapege bada kawula, "Manawarak gama nami, Anai Daud.” ²⁸ Kole Nyi bana tamage umma inna, kadudana ata moro da dikkini Nyi mono da kanukayi tabarada yida, "Apa mi um hatenakwe Nyi nauwa bagu pahada guge inna?" Yidda lidage tabaraNa, "O, Mori!" ²⁹ Begge, Yesus naha jama nadi matada yidda, linaGe, "Na dadiwe tabaramu dokuge hatenamu.” ³⁰ Mono, nama bugerayi matada yidda. Yesus naha ape dage yidda, "Hamataragela, ila dahing kana wu aka ata katada waige lama hada inna.” ³¹ Ta nyiduwe, yidda da huna mono da habarage li inna tutui Yesus ta tangage hadau inna. Yesus Naha Tagaha Ata Kabanga ³² Kole kadudana ata rada huna, ata da ngidiyi wu ata kabanga ha tamana waddi japata tabrai Yesus. ³³ Kole wadi japata nada ba wugayi, ata kabanga naha newe hagga. Ata buta rada da hangatara mono lidage, "Katauda dana wale na kallli etak mawe ta Israel.” ³⁴ Ta nyiduwe. ata Farisi lidage, "Nyi na wugayi tangadi wadi japata waige kawahana wadi japata jala.” Butai Hama Ngatti Hodiki Kaullana ³⁵ , Yesus na kako kilo rage tangage harona mono deha hagapege hanuadi ta Sinagoge-sinagoge da yidda, mono talarage li ege ate kalingora parehaNa, lohho ha tagahayi tangage kapore mono kaka lawara. ³⁶ Kolei Yesus etayi ata buta, Nyi na marabehawe atena tabarada yidda oro yidda da joli mono jalora tujai bebbe aiha jawa. ³⁷ Bege Nyi linage tabara ana ha kodoNa, "Tau takka nage, butayi hamangatti, tabolo kaulana hodikki.” ³⁸ Oro batau dage, karai tabaranai Mori kadaudi hama ngatti, kapiku ha ngidina ka ullana ba ma ngattini Nyi.”