¹ "Hamatara gela bamu pahada we tutu parayim ta agamamu ta aro ole atamu, ilam kabu ate dagela kada etawe yidda. Nyi batau dage, mi walem hibak mawe hige wali ta Amamu ta surga. ² Oroge inna, kole mi bami yi hodi kami, ilam ha punyikan talalu ta aromu kataujana ata kadahha dete harayida ta sinagoge-sinagoge mono ta lara dajalage yidda ka dayo daikayi ata wadeka. Nauwa ug talkkiwe katau takkana tabarami inna yidda da hiba bewe higela. ³ Ta nyiduwe, kole mi bami yi hodika, ilam paghai kani limma kalimu bana tadayi agawe harayina limma wanamu, ⁴ dajalge ha yi hodimu rada kana kabunyiyi mono Amamu ka etayi kabunyi rada enga na yigimi hidi.” Ha Akka Tutu Sembayang ⁵ "Mono, kole mi bamu sembayangna, ilam tujayi ata kadahha dete oro yidda da baige dede mono sembayangna ta sinagoge-sinagoge mono ta hupu lara kapiku eta dadi ata wadeka. Nauwa ug takki gimige katau takkana tabarami, yidda da hiba bewe hige. ⁶ Ta nyiduwe, kole mi bamu sembayangna, tamamik lari ta koromi mono toniwe binnami, mono sembayangna ta Amami kadana taha dau kabunyi, yiwe Amami na etawe kabunyi inna enga na yigimige hige tabarami. ⁷ Mono, kole yau bamu sembayangna, ilam waikana hanewe ai kamangu gauna katujana ha rayina ata ai katadayi Allah, oro paha ngadada waidi hanewe kabuta, yida enga narangeyi. ⁸ Nyi batau dage, ilam tujai yidda oro Amamu natadawe agawe ha kabu atemu aim karai howe tabaraNa. ⁹ Sembayang tau damu inna, 'Ama nami ta surga, Paha tengu howela ngaraMu. ¹⁰ Kana mai kawe kalingora parehaMu, dadi kawe hakabu ateMu ta panu tana lohho ta surga. ¹¹ Yikima nami, lado inne, ha yama katutuki. ¹² Mono, ha wali kimadi jalama nami katuja dumuwe nami bam walidi jalana ole atama tabarama nami. ¹³ Mono, ilam ngidi kama nami lar kama kaba, tabolo palohta kima nami wali kajapata. Oro ba Yau kadauge Kalingora Pareha, mono bikta pareha, mono manadana kahha ana murri. Amin'. ¹⁴ Oro batauda dagege nyi mi bamu hawali ka nadi jalana ata wadeka, Ama sorgawi mu naha wali jalagimi. ¹⁵ Ta nyiduwe, nyi mi aim hawali kani jalana ata wadeka, Ama dumomu enga wale naha walik magudi jalamu.” Hadamu Bamu Kabuktawu ¹⁶ "Mono, kole mi bamu kabuktami, ilam buju kami tujayi ata daha dete oro yidda na dadiwe hajelu ge matada kapiku etama bama kabukta rada ata wadeka. Nauwa lugu gimige katau takkana tabarami inna yidda da hiba bewe higela. ¹⁷ Ta nyiduwe, mi, kole bamu kabuktami, lewuwe katakkumi mono bahawe matami ¹⁸ daja lage kabuktami ka ilna eta mige ata, tabolo Amamu ka dana taha dau kabunyi. Mono, Amamu na eta guge harayimu ka bunyi inna enga naha gaba guge la tabaramu.” Ha Inya Kayi Ngawu Ta Surga ¹⁹ "Ilam kanguti kage tutu tau daumi ngawu ta panu tana, hadaudi wana mono tai rara kaha mabbodi, mono hadau ata kedu kahegaradi lohho kedudi. ²⁰ Ta nyiduwe, kangutige tutu tau daumu ngawu ta surga, hadau wana mono tai rara walena ha mabbok madi mono hadau ata kedu walena hegarak madi loho wale na keduk madi. ²¹ Oro hadau nagwumu dadi, yoda jalawe atemu.” ²² "Matamu yikna lati we taumu, Yiwe, rada matamu bana dahhayi, tangage taumu enga na magaka hege. ²³ Ta nyiduwe, nyi matamu japatayi, tangage taumu enga banuge kapagtana. Nyiwe nyi magakaha kadada hona tabaramu yikwe kapagtana, hada kik kage kapagtana inna.” ²⁴ "Wale ladakma ata kahha mori ta duda morna oro nyi enga butu nani ate nada morna wu mono na manawarani wu, waleka enga mikkuna ta morna wu mono na tau taipayi wu wali. Mi walena dadik mawe hanukku nage ha ulla nai Allah mono amaha.” Miyo Ilam Gela Gagami ²⁵ "Oro batau dagege Nauwa lugugu tabramu, ilam gela gagage tutu morhamu, ba agana ha yamu wa; leka agana ha enumu. Tau dajala nage taumu, ba agana hataumu. Walena rehi banning kak hoge morha wali taha yayo, mono taumu wali taka labe? ²⁶ Torroyi kawurruna ta langta ai kahabarana, ai kamangatti, mono ai ai ka kahha ka galuna, tabolo Ama Sugawimu na yidi yida ha yayo. Mi walem rehi mang hikak homi wali ta yidda? ²⁷ Iyayi ta jongamu oro gela gagana dadiwe bana tabawe dal ak morhana? ²⁸ Mono, tutu kalabe, ahha mi mamu gela gaggami? Hamataradi wala ruta bakung tama rada, aga liana dawe yidda bada tummu, yidda wale da ullak mana mono wale da kamode takma, ²⁹ tabolo Nauwa luguge tabaramu nadai Salomo kama nadana hali dumona wale na tau ma kalabe katujana wuyo wale ta wala ruta nada. ³⁰ Nyiwe, nada ruta tama rada, kadana nehe lado mono koka baitani lari ta latti, Allah napa hada tauda dani, wale narehi dal kak hoge mi, ta mi kadabo hatenana? ³¹ Nyidawege, ilam gela gaggami waige ba limimi, 'Agak na hayama?, 'waleka agakna ha enuma?, 'wale dumoka', Agak na hatauma?' ³² Oro, ata wadeka da mayegadi tangadi rada mono Ama surgawimu na tadawe inna mi bamu kabu atedi tangadi rada. ³³ Ta nyiduwe mayega ullu toge Kalingora parehaNa mono tenaNa, mono tangadi rada enga taba nagudi. ³⁴ Nyiwe, ilam gela gaggage tutu tanga kokage oro koka tanga wiki dauge dadyo. Hatutuwe dihha lado waige mayilla na dauna.”