¹ Bege, kapirana ata Farisi mono Ahli taurat wali ta Yerusalem mai ta baranai Yesus mono lidage, ² "Ahha ana hakodoMu layaiwe ka kali damma wali weda waika? Oro, yidda wale da bahak mayi limmada bada yayo kababa!" ³ Mono, Yesus na balehawe mono linage tabarada yidda, "Mono, ahha dumo mi mami layaiyi parehanai Allah oro ka kalli damma tabarami? ⁴ Oroi Allah na yiwe lina, 'Hikiyi amami mono inyami, 'mono, 'Iya kahaorani amana waleka inyana, pa hoku mate dahoni. ' ⁵ Ta bolo mi limige, "Iya hing kayi kah newe ta amana waleka inyana, 'Aga hing kayi ha yiyo tutuna pa maraka beyi tai Allah," ⁶ nyi langka aina pa aka kani amana waleka inyana. Waige katau dana, mi pade mige linai Allah oro ka kalli damma. ⁷ Mi, ata kadahha detimi, nyi tau takka dage ha huru balenai Yesaya tutumi: ⁸ Ata rade da hiwa Nauwa waige bada yidda, tabolo ateda yidda marau wali tabaraGu. ⁹ Mono, lilokowe yidda bada ka wojoGa waige bada hanuadi pareha kadadi ata.” ¹⁰ Mono, Yesus na ka mai kadi ata buta mono liage, "Rangewe mono yappawela! ¹¹ Wale yida dakma katama ta bayo kaha otoradi ata, tabolo agyi ka huna wali ta bana, yidai kaha otoradi ata.” ¹² Bege, ana hakodoi Yesus ammidi mono kanukawe tabarana, "Tadakwe yau rada ata Farisi butudi ateda kole bada rangewe hanewe inna?" ¹³ Tabolo, Yesus na bale hawe mono linage, "Tangadi ha taddo wale ha tado dak madi AmaGu kata surga enga batudi kahha ta kalartana. ¹⁴ Pahaidi yidda. Yidala yidakna kaha madi moro ata moro. Mono, nyi bana hama di moroka ata moro, kadudana enga monu da taka gobakana.” ¹⁵ Petrus linage tabaraNa"Halara holayi li hatujja nade tabarama nami.” ¹⁶ Yesus linage, "Appa mi walem yappa jalak mahowe? ¹⁷ Appa mi walem yappa jala mahowe inna tangage katama lari ta bayo ka enga burru ta tiyo mono baitadi ta jambanu? ¹⁸ Ta nyiduwe, aga we kahuna wali tabayo huddawe wali ta ate, mono yidakna kahha otora ata. ¹⁹ Oro wali ta ate hudawe paha ngada ka japata, hamate wiki na, jala dangana ole ata, jala ma nyarha, kedu, takkiwe kapaleka, mono hamelona ole ata. ²⁰ Hada katauda dana kahha oto radi ata, tabolo yayo ai baha limma walena naha otora dak madi ata.” Tulluni Lawai Kanaan ²¹ Bewalge, Yesus na kako wali neda bali mono na pahili wikina ta Tirus mono Sidon. ²² Mono, wu lawai Kanaan ka wai ta hadau neda ammini mono na kawula, "Manawara kiga Nauwa, Mori, Anai Daud! Ana lawai kigu tama nani waddi japata aika anana.” ²³ Ta nyiduwe, Yesus walena balehak mayi lawai nada, langka wu ka hanewe na. Mono, ana hakodoNa ammini mono da karuhhuyi Nyi, lidage yidda, "Halewayi nyi kako oro nyo nahangata-ngatana bana kawula ta lirada yitta.” ²⁴ Lohho, Nyi na balehawe mono linage, "Nauwa paha lewa hewa ta ta bebbe ka bunga wali ta ana huhu Israel.” ²⁵ Bege, laai nada na dikini mono kawojo ta aronai Yesus, linage, "Mori, tullu kiga nauwa!" ²⁶ Tabolo, Yesus na balehawe mono linage, "Walena dahhak mawe ngalai kababa dauda lakawa mono baitadi ta bagga.” ²⁷ Lawai nada na baleha, "Tenawe, Mori, tabolo bagga rada da yadi karab kadi kamonu wali ta meja morina.” ²⁸ Bewalge, Yesus linage ta barana, "Ta lawai, hatenamu madaka lawe! Kana dadiwe tabramu katauna hakabu atemu.” Neda memage, ana lawaina hatagahayi. Yesus Na Hatagaha Ata Buta ²⁹ Yesus na kako wali neda bali na lida ta huppu hoba Galilea. Mono, kole bana panne ta letena, Nyi na ngodo neda bali. ³⁰ Bege katau kalna butana ata kamai tabaraNa, ngidiyi ata kalikku, karenga, moro, kabanga, mono ata buta wadeka. Lohho, yidda daha baikayi ata rada ta ledunai Yesus mono Nyi naha tagahayi yidda, ³¹ dajalage ata buta rada hangatara kole yidda bada etayi kabanga bana hanewe, karenga bana tagaha, kalikku bana kako mono kamoro bana eta. Mono, yidda daha manadai Allah Israel. Yesus Na Yidi Hayada Ata Kapata Ratana ³² Lohho, Yesus na kamai kadi ana hakodoNa mono, "linage, "Nauwa marabehawe ateGu tabarada ata rade oro yidda da ole bega Nauwa katauda ladona mono lakma hayada. Mono, Nauwa walegu aumawa halewayi hagga kalabba yidda daja lage ilda badda ta lara." ³³ Bege, anaha kodoNa lidage tabaraNa, "Gikka hadau koleda kababa kabuta hadau inne kahikawe ha bokta dangada yidda ata katauna butana inna." ³⁴ Yesus nakanukayi yidda, "Piradi kababa ka dana tabrami?" Yidda da balehawe, "Pittudi. mono kapira kina kaboko marraha." ³⁵ Nyiwe Yesus nahalewai rada ata buta ngodo ne tana. ³⁶ Bege, Nyi nagalayi kapittuna kababa lohho kaboko rada. Mono, ha gapege wai balinna, Nyi na hibiyi, mono0 nayiyi ta ana hakodoNa,mono anaha kodoNa yiyi ta ata buta rada. ³⁷ Yidda tangada yayo mono bokta. Lohho, yidda da kahhayi kadibka kababa karehi,pittu kawuka tayi ka bannuna. ³⁸ Yidda da yayo pata ratada kabani, wale gauk mahodi lawai mono lakawa. ³⁹ Kole bana halewayi ata buta hagga, Yesus na tama ta tena mono kako ta harona Magadan.