¹ Ta mahiggo neda, Yesus na kako na lida ta oma Gandum ta lado rahi ngahu, mono ana hakodoNa kalabba, mono yidda halege dage mangatti lu gandum, mono da yadi. ² Ta nyiduwe, kole ata Farisi bada etayi, yidda liadage tabaraNa, "Etawe, ana hakodoMu rayi dage agawe ai katena tutu harayi ta lado rahi ngahu.” ³ Ta nyiduwe, Yesus linage tabarada yidda, "Walem kalli bahhak mawe agawe harayi nai Daud kole nyi mono ka dokuni bada kalabba, ⁴ aga linawe bana tama lari ta Uma Allah mono yadi kababa maraka ai ka tena tubaNa tutu ba yadi, tauda jala nage ata ha olena, likkege ta ngada Rato? ⁵ Waleka, walem kalli bahhak mawe lari ta Ukku Pareha Taurat inna ta lado ngahu, tangada rato ta umma Allah bada layiyi mono aida jala? ⁶ Ta nyiduwe, Nauwa luguge tabarami inna karehina madakka wali ta Ummanai Allah dage taha dau inne. ⁷ Ta bolo, nyi mi bamu tadakwe ngihege inna: 'Nauwa ha kabu ateGu marada ate mono wale maraka dakma, mi walem kali hokuk mani nada ai kajala. ⁸ Oro, Anana kadadi Ata yiknai Mori ta lado ngahu. ”Yesus Nahha Tagaha Ata Ta Lado Ngahu ⁹ Kole bada kako wali bali, Yesus na dikki ta sina goge da yidda. ¹⁰ Etayi, dani wu ata kabani ka mate gabba limana. Mono, yiddada kanukka ta baraNa, lidage yidda.” Na tenakwe ba hatagahaka ata ta lado Ngahu?" dajalage yidda kana dadiwe ha jalayi Yesus. ¹¹ Mono, Nyi linage tabrada yidda, "Iyayi ta jongami kadayo wu bebbe na, mono nada bebbena bana monu ka lari ta rowaka lado rahi Ngahu, nyi walena na ngala duyi bana pahuni? ¹² Hadda rehi mang hi dahona wali ta wu bebbe! Oro inna, na tenawerayina kadahha ta lado Ngahu.” ¹³ Bege, Yesus linage tabara ata nada, "Ata nada naha jolani limana mono naha tagahyi katujayi limma wu. ¹⁴ Ta nyiduwe, ata Farisi kako wali ta hadau neda mono da woroge gabbani Nyi, aga lina dawe hadage bada hama yillayi Nyi. Yesus Ha Pede Nani Allah ¹⁵ Tabolo, Yesus, kole tadawe hada inna, na pahilpa wikiNa wali neda bali. Buta kadokuni Nyi mono Nyi naha tagahaNyi ata tangada, ¹⁶ mono naha namudi yidda ilda pahadawe tauna Nyi kada tadawe. ¹⁷ Hada inna na dadiwe kan banuge agawe hadikna ledeni Nabi Yesaya: ¹⁸ 'Etayi ge, ataGu ha pede beGu, ha manawaGu tabaraNa dewaGu natuba. Nauwa enga tau guni wadiGu tabraNa, mono Nyi enga pa dela nage katijana ta kabihhu ata wadeka. ¹⁹ Nyi walena hagabba ma, waleka kawula, mono wale lakma wuak ata karange nage liNa inna ta lara. ²⁰ Kaita kabata Nyi wale na pohtak mayi mono doka latti we kama nari badda nyi walena paddak mayi, kahha Nyi bana rayige katijana tailo, ²¹ mono lari ta ngaraNa, kabihhu ata wadeka enga manne dage.” Yesaya 2:1-4 Kawahai Yesus Walige Waddi Nai Allah ²² Begge wu ata hatama na waddi japata, kamoro mono kabanga, na ngidiyi tabara nai Yesus. Mono, Yesus nahha tagahayi daja lage ata kamoro mono kabanga nada hanewe mono eta. ²³ Ta ngada ata da hangatar mono daka nukka "Wale yikak na nade Anai Daud?" ²⁴ Ta nyiduwe, kole ata Farisi rangeyi yidda lidage, "Ata nade wale na dadik mawe wugayi waddi japata nyi aina ole ni Beelzebul, rato waddi japata.” ²⁵ Yesus na tadawe paha ngada da yidda mono linage tabarada yidda, "Tangada pareha raja ka bahha gaba wiki dau nage tauna, ha tanayi. Mono, tangadi harona waleka umma ka bahha gabage tau dauna, wale da tahhi mana. ²⁶ Mono, nada kabalka wugayi kabalka, nyi na bahha gabage tau dauna. Nyi batau dage ge, aga linak kawe kalinogra parehana bana tahhige? ²⁷ Mono, nyi Nauwa, wugayi wadi japata waini Beelzebul, nyi aga dahona anamu ha waida bada wugayi yidda? Oroge inna, yidda enga dadi hakimum. ²⁸ Ta nyiduwe, nyi waini Wadnai Allah, Nauwa wugayi waddi japata, Kaligora nai Allah ammi bege tabrami. ²⁹ Waleka, aga linawe wu ata dadiwe tama ta umma ata ka kulha mono karamadi ngawuna nyi aina katti ullu kani ata kulha nada? Bege, nyi ubbu na rammpok ku nage umma na inna. ³⁰ Iya dahing kayi ai ka olega Nauwa, gabaga Nauwa. Mono, iya dahing kayi aika kahha hagau ga Nauwa, ug hega hagara hodi. ³¹ Oro batauge ge, Nauwa luguge tabarami inna tangadi jala mono padda kadadi ata enga hawalidi, tabolo paddai Waddi Bihha enga wale hawalik mani. ³² Mono, iya hing kayi ka takkiwe hodik gabanai kadadi Anana kadadi Ata enga ha walini, ta bolo iya hing kayi ka ha newe gabani Waddi Bihha enga wale ha walini, inna batauge lohho ta ma higgo ka ammina. ”Pu Yayu Tadai Wali Ta Wuna ³³ "Nyi pu yayu nada dahhaka, wu jalana enga dahhana. Waleka, nyi pu yayu nada aina dahhaka, wu dumona walena dahhak ma. Oro, pu yayu tadayi wali ta wuna, ³⁴ Ta, ana huhu kaboko japata, aga linak kawae mi kajapata hanewege hada ka dahha? Oro wali ta atemi, bami hanewewe. ³⁵ Ata ka dahha na pahuge hada kadahha wali ta hapotena kadahha, mono ata japata na pahuge hada kajapata wali taha potena. ³⁶ Tabolo, Nauwa lugu gimige tabarami inna tangadi hanewe ka liloko hatakda ata, yidda enga da tagu hodi balehai ta lado rahi hokuge. ³⁷ Oro waige hanewemi, mi enga um tenami, mono waige ha takkimi, mi enga hoku gimi. Ata Farisi Mono Ahli Taurat Da Karai Tadka ³⁸ Bege, kapirana ahli taurat mono ata Farisi linage tai Yesus, "Guru, nami ma baige eta tadka wali atabraMu.” ³⁹ Tabolo, Yesus na baleha mono linage tabarada yidda, "Dalara ka japata mono kajala dangana olena da karuhhuwe wu tadka. Mono, enga wale lakma tadka ha yiyo tabarada yidda, ai tadka Nabi Yunus kawe. ⁴⁰ Oro, taunai Yunus ka nedana ta ti kaboko madaka katauda laddo mono tauda gakna, tauda jalage Anana kadai Ata enga dani tauda laddo mono tauda gaddi lari ta tana. ⁴¹ Ata Ninewe enga dede hamera danga dadi dalara ata rade ta rahi hokuge mono enga da hokudi oro yidda da jarra kole bada rangewe khotbah Yunus. Mono, etayi, karehi madaka wali tai Yunus ba dani nehhe. ⁴² Ratu wali ta selatan enga hudda na hamera dangadi dalara radde ta lado rahi hokuna mono enga hoku dadi oro nyi ammini wali ta huppu tana tutu ba rangewe angta nai Salomo. Mono. etewe, karehi madakka wali tai Salomo dani nehhe. Mayillage Wali Ta Aika Kadana ⁴³ "Kole waddi japata huna wali ta ata, nyi na palakayi hadau aika dayo wena bana mayegana hadau tuduns, ysbolo walena kolek mana. ⁴⁴ Lohho, nyi linage, 'Nauwa ug hagawa ta umma gu, hadau hubegu. 'Mono. kole bana dikki, nyi na dikkige umma inna lakma aga agge, bebewe ha habowe, mono mapahawe. ⁴⁵ Bege, waddi japata nada yelana mono na ngidiyi pittu wadi japata heka wali ta nyi, mono yidda da tama lohho engana neda bali. Dajalage, hadana ata nada rehi ai tidage wali ai tauda hoge. Tauda jalage enga ddige ta dalara ata kajapata radde.” Ole Bainai Yesus Ka Tetakka Na ⁴⁶ Batamrana Yesus hanewe dangadi ata buta, etayi, inuana mono ole baiNa dede ta bali haddu, baige ha newe dangani Nyi. ⁴⁷ Wu ata naha newe tabara Na, "Torroyi ge, inyam mono anguwu Mu dede ta bali haddu, baige hanewe dangak Yau.” ⁴⁸ Tabolo, Yesus balehayi ata katak Nage nada mono linage, "Iyayi inyaGu mono iyayi angu wu Gu?" ⁴⁹ Mono, hagapege wala hadi limma Na ta aroda ana hakodoNa, Yesus linage, "Rade yidakna inyaGu mono angu wuGu! ⁵⁰ Oro iya hing kayi karay gadi hakabu atena AmaGu ka dana ta surga, yikna angu wuGu kabani, wattoGu lawai, mono inyaGu.”