¹ Ata kaullana na waina kaba lelu moroka,malli melo,mono malli bada rayina kalabbe lihekada rato pa waida bada hanukkuwe Koro Tenguna.Yida dumo da rayina kalabbe tenguna tanganai Harun, katauna paha rehanai MORI tabarai Musa. EFOD ² Yida da rayina kalabbe efod wali ta lellu kaba amaha rara,kaba talujjana,mono lelu kaba moroka,malli melo,mono malli. ³ Yida da burri ha bilarana amah rara mono da katuplayi dadi lelu kaba amaha rara ka nuhha.Yida da manannu waidi lelu kaba moroka,malli melo,mono malli mono waina kaba talujjana parayina wu ata angta. ⁴ Yidda da rayina hataoni wai bale tutu kalabe efod mono da kattige ta kadudana layi efod. ⁵ Yidda da mayanana katti bagge mono da katige ta efod.Rada da rayidi wali kaba kaha tujja wadi efod,wali ta lelu kaba amaha rara,kaba talujjana,mono wali ta lelu kaba moroka,malli melo,mono malli,hadau tauna harehanai MORI tabarai Musa. ⁶ Tangada kaulana bola watu malilaka krisopras mono ha daktani ta ngawu amaha rara.Watu malilaka rada hadoyiyi tujjana wu cap dokudi ngarada ata Israel. ⁷ Yidda daha kadaktadi watu malilaka rada ta toni bale efod.Radala wuyi tadka tubada ata Israel,katujawe paharehanai MORI tabarai Musa. TONI KURRU ⁸ Bewalge,yidda da rayina toni kurru,ha ullana wu ata ka angta.Toni kurru rada harayiyi wali ta ngawu kaha mera waidi kalabe efod,wali lelu kaba amaha rara,kaba talujjana,mono wali lelu kaba moroka,malli melo,mono malli. ⁹ Toni kurru rada hada laptadi hingi kapahada malau gaba,malau mono lurage pagayi. ¹⁰ Ata kaullana da tepelani pata lulra watu malilaka ta toni kurru rada. Ta lulra kadiha kana dadi watu delima malli,ratna cempaka,mono watu malilaka zamrud. ¹¹ Ta lulra kadudana dadi watu malilaka pirus,watu sapir,mono watu intan. ¹² Ta lulra ka taudana dadi watu malilaka ambar,akik,mono kecubung. ¹³ Ta lulra kapatana dadi watu malilaka beril,krisopras,mono yasper.Watu malilaka rada da taudi rewa amaha rara. ¹⁴ Dadi kabulu duda watu malilaka ta toni kurru,wu watu malilaka najeluyi ngara anada Israel.Tangadi watu malilaka hadoyiyi waige ngara ana Israel ha jeluna. ¹⁵ Tangada ka ulana da rayina duda lolo amaha rara katiyo hatoni waiyi kurru.Lolo amaha inna pahilla hawe tujawe kalarri. ¹⁶ Yidda darayina duda kale mono duda rewa wali ta amaha rara. Bewalge,yidda da kattidi duda kale rada ta duda layi toni kurru. ¹⁷ Yidda da kattidi kadudana lolo amaha ta kadudana kale kadana ta kadudana layi toni kurru. ¹⁸ Yidda da kattidi kadudana layi lolo amaha wadeka ta rewa amaha rara dajalage rada dadiwe dairudi ta toni bale efod tabara aro. ¹⁹ Nyidawe yida darayina duda kale amah rara wali mono da tauyi ta kaduda bihhu toni kurru rada.Tabolo,kale inna tuba layi tono kurru tabara lari,kajojawe kalabe efod. ²⁰ Yidda dumo da rayina duda kale amaha rara tutu dau lari bale efod tabara ta aro.Yiwe kale rada innayi tabara katina,ta panu kalri bagge. ²¹ Yidda daha dinguwe tono kurru halidadi ta kale rada ta kale efod waidi kalarri moroka daja lage toni kurru rada ka engadi ba dadi tapanu kalari bagge mono walena maladdak mayi.Yida darayidi tangadidokuge paha rehai MORI tai Musa. KALABE WADEKA TUBADA RATO ²² Bewalge,yida darayina kalabe madaka efod wali ta kaba moroka.Kalabe madaka inna hamanannu nage wu ata angta. ²³ Yida da rayina wu kabonga ta dau dete jalabe madaka mono ba kattiwe kajinaka kaba kakilorage kabonga inna dajalage ilna geha majirakawe. ²⁴ Yidda dawaina kaba talujana,lelu kaba moroka,malli melo,mono malli kapiku rayina hagora kahadana wu delima,mono daironi kilorage hupu bawa kalabe madakka inna. ²⁵ Yida dumo da rayina lagori wali ta amaha rara tiyo mono daironi ta jonga hagora wu delima,ka kilorage hupu bawana kalabe madaka. ²⁶ Nyiwe,kilorage hupu bawana kalabe madaka inna dadi hagora wai kaha nyongana ta jonga delima mono lagori,katauna paharehanai MORI tai Musa. ²⁷ Ata ka angta ulana da rayina kalabe limma tubanai Harun mono anana.Kalabe limma rada harayiyi wali ta kaba malujjana. ²⁸ Yidda dumo darayina kabala,hagora ta takku ka dahhaki,mono kalabe lari wali ta kaba malujjana. ²⁹ Bewalge,yidda da rayina katti bagge wali ta kaba malujjana mono wali ta lelu kaba moroka,malli melo,mono malli.Hagora hahubbi tepeladi ta katti bagge inna,tauna paha rehanai MORI tai Musa. ³⁰ Waige bada waina lelu kaba amaha rara yidda darayina kataupa tenguna.Yidda daha hadoyiyi kataupa inna,katujja dana wu cap,waige wu kama tolha,"Tenguna tubanai MORI". ³¹ Yidda da kattiwe kalarri ka moroka ta kataupa inna tutu ba kattige ta kabala,dokuge paha rehanai MORI tai Musa. MUSA NA ELOWE KAREKA LANGNA ³² Tauda dagela tangage ha ulla ba rayige Kareka Langna,halinawe Kareka Hatabo kana ba bewe.Ata Israel da ullage tangage wingige tujawe harehanai MORI tai Musa. ³³ Bewalge,yidda daha tingoge Kareka Langna mono tangadi kadana neda lari tai Musa.Yidda daha tingodi kale,doka,hagaito,hariyo tukka,mono hakappe wai. ³⁴ Yidda daha tingodi toni Kareka harayi wali ta kalita kameme pa obara kamalli mono wali ta kalita talujjana,kaba watte hatoni wai binna tama ta Koro ka Hada tenguna. ³⁵ Yidda daha tingodi tai Musa Patti jaji,yayu ditana,mono toni mamoli. ³⁶ Yidda daha tingodi meja mono tanadi kadana,lohho kababa lihikke. ³⁷ Yida daha tingodi tabarana ledu latti weyo parayi wali ta amaha rara tiyo,doka lattidi,wedi,monp tangadi kadana. ³⁸ Yidda daha tingodi hadau maraka amaha rara,we lengha lewu,kemenyan, mono kaba watte bina tama ta Kareka. ³⁹ Yida daha tingodi tabarana hadau maraka amaha matti mono gallu bahhidi,yayu ditana,mono tangadi kadana,lohho hajalu mono kappena. ⁴⁰ Yidda daha tingodi tai Musa kaba watte tuba natara Kareka Langna,hariyo tukkadi,mono kappedi.Yidda daha tingodi kaba watte toni binna tama ta natara Kareka Langna,kalarri ha wai,katukku kareka,mono tangadi kadanahakabu ate kadana lari barayige Kareka Langna,halinawe Kareka hatabokana. ⁴¹ Lohho,yidda daha tingodi tai Musa kalabbe ha wai tutu hanukkuwe ta Koro Tenguna mono kalabbe tenguna tanganai Rato Harun mono anana,hawaida yidda hanukkuwe ba ratoyi. ⁴² Ata Israel rayige tangage ha ulla inna tubawe tujawe paha rehanai MORI tai Musa. ⁴³ Musa na torroyi tangadi ha ulla rada mono etayi inna ha ulla da rayi bege tubawe katauna ha rehanai MORI. Nyiwe,Musa naha maringiyi yidda.