PAULUS NA PANNENA TENA TA ROMA ¹ Kole ba pohtawe inna nami kako panne mage ta tena ta Italia, yidda da yiyi Paulus mono kapirana ha tahanu wadeka tabara wu perwira kakododi Agustan, kangaranai Yulius. ² Nami ma panne ta dihha wu kapalu wali ta Adramitium ka geha panne ta tena ta tanga hadau hadedi ta tangage Asia. Nami ma kako ka olegama Aristarkhus, ata Makedonia wali ta Tesalonika. ³ Ta dihha laddo wali, nami madikki ta Sidon. Yulius na pahadayi paulus waige kabannuna hamatarani mono pahaini Paulus oleyi olena kapiku orhayia tangadi ha kabu atemnai Paulus. ⁴ Wali neda bali, nami ma kako mono panne ta tena nama tawe Siprus oro rereha ka gaba gama. ⁵ Kole nami panne ta tena lida ta huppu bannu Kilikia mono Pamfilia, nami ma dikki ta Mira ta Likia. ⁶ Neda bali, perwira nadda na dikkini wu kapalu wali ta Aleksanderia katamrana panne ta tena ta Italia, nyiwe nyi naha diki gma nami ta kapalu nadda. ⁷ Nami ma pannena tena magara hodima kapira laddona, nama yilla hinguwe ubu ma dikki ta Knidus. Oro rereha wale na dadi dangak mage nami kako dikarau, nami ma panne na tena dokuge hupu bannu Kreta ka aroda ta tana kaha nguddu Salmone. ⁸ Nami ma pannena tena liwe tana kahanguddu inna waige aika anana mono dikki ta wuha dau ka ngarana Hadau hadde Indah, kanedana dahekawe harona Lasea. ⁹ Oro nami tadawe bana butawe mahiggo ka bunga, mono batauge, lida ta bannu na mayillawe oro rahi kabuktawe ata Yahudi layi bewe, Paulus naha nuadi yidda, ¹⁰ mono linage tabarada yidda, " Bagu ole bai gimi, nauwa ug etawe inna kako enga na liwe tangage ai kadahha mono aika anana rogi, w2ale pa haila kelma mono kapalna, tabolo dummo ngahuda yitta." ¹¹ Ta nyiduwe, perwira nadda rehi naha tena dahhoyi kangidiyi mono mori kapal wali taha newe nai Paulus. ¹² Oro aina dahhawe engana ta hadu haddedi tena inna ba rahi kalikawe, wahjo kani ata kabaige k hakitana kalete tena wali neda bali mono ragga dadi kakge yidda bada dikki ta Feniks, wuyo hadau haddedi tena ta Kreta, ka aroda ta laddo mali mono laddo mali ta bannu, mono engana neda bali kahha bew rahi kalikka. Rereha kahadda kulha na yannayi kapal Paulus ¹³ Kole rereha ngare-ngare wali ta bannu, yidda da hangadage yidda dikki bedage dau aroda yidda. Oroge inna, yidda da tingiyi watu kanagada mono hakita kako liyo ta huppu bannu Kreta. ¹⁴ Ta nyiduwe, walena moja hoge, rereha katujayi warata, paha ngarada Euroklidon, kadadi wali ta tana inna. ¹⁵ Kole kapal nadda nami bada jojayi rereha nadda walena hilu mukkak mana ha aroge ngorana, nami ma bakke mono pahaini kapal nami bada gedo. ¹⁶ Batamrage nsmi kako lida ta tana marahaki ka ngarana Kauda, waige bama oja hingna dadiwe nami bama hanukkuyi ana kora kapal nadda. ¹⁷ Kole ata ka ullana ta kapal bada hapannedi ana kora ta panu tena kapal, yidda da waina kalarri ma tullu kaha kulhayi kapal nadda. Oro yidda madauta meli ta Sirtis, yidda daha burudi hawai ta kapalu dajalage da yammani kapal da yidda boleng-boleng nguyi. ¹⁸ Damma hege tana wali, oro nami boleng-boleng nguyi oro warata ai ka anana, ata da halegewe baitadi pahaila ta kapal. ¹⁹ Mono, ta laddo hatau wai, yidda da baitadi hawai ta kapal waidi limma dauda yidda. ²⁰ Oro mata laddo mono maduyo walena huddak mayi kapirra laddona mono warata wale na marahakma ka todo ma nami, bunga kahhayi haman nema nami tutu ba pahoilama. ²¹ Oro butabe ata ka kako ka moja bena aida yayo, Paulus dede nage ta tiluda yidda mono linage, " Bagu ole bai gimi, dok dage um doku dahhoge hanuagu mono waleda mai dak ma ta Kreta dajalage da paddage tangage aika dahha lohho rogida katauda dana inna. ²² Tabolo batauge, nauwa ug tulara gimi miyo kapikku engami tahna oro ta jongami ladakma kabunga ngahuna, dukka dahege bunga kapal. ²³ Oro, gakna, dani malaikat Allah, kadauga nauwa mono ha ngak kagu, dede ta aro matagu, ²⁴ hagape balinna, ' Ilam madautami, Paulus. Yau um dede dahowu ta arona Kaisar. Mono, etewe, Allah na maradda atebe tabarami mono tangada ata kaolegu ta tena.' ²⁵ Oroge inna, Ole baigu, tahge atemu oro nauwa ug tena neda lari tai Allah inna tangage enga dadige katauna hataki bena tabaragu. ²⁶ Tabolo, yitta na jallora dahho ta wu nuhha." ²⁷ Ta nyiduwe, ta gaddi ha kabulu pata wai, inna nami bama enga hona boleng-boleng ta bannu Adria, ta tillu gaddi, tangada ka ullana ta tena da hawauge inna yidda ba dahhe kadage tana yara. ²⁸ Yidda da doluni watu kanaga mono da yammuwe we ka kiddi duda kabulu dappawe. Kole, yidda dikki hodi wali, yidda da baita walini watu kanaga mono da tadawe kidige weyo kabulu limma dappawe. ²⁹ Oro nami madautage enga kadakta tena ta watu karaha, yidda daha burrudi pata watu kanaga wali ta ngora tena mo0no sembayangna kana geha dammage. ³⁰ Ta nyiduwe, tamrada kapirana ka ulana ta kapal bai mali wali ta kapalu mono da haburu bedi ana kora ta bannu waige ba mera haburru dadi watu kanaga wali ta ngorana, ³¹ Paulus linage tabara perwira nadda mono tangada prajuritna, " Nyi ata radda aida engana lari ta kapalu, miyo wale na dadik mawe ba pa hoilami." ³² Kole innage, tangada prajurit katarriyi kalarri watu kanaga mono pahaini kana meliyi. ³³ Kole mata laddo manari hudda nage Paulus naka raiyiyi yidda tangada kapiku ngalada kapirana ha yayo, waige balinna, " Ta laddo habulu pata wai miyo engami lari ta gela gagga mono um tahna kalaba oro aim yamo aga ana. ³⁴ Oroge inna, nauwa ug raino gimio kapiku ngalami kapirana hayayo tangage hoilami. Oro, wale lakma langka gayuka wumi kabunga wali tabarami." ³⁵ Kole bana takkiwe tangage inna, Paulus na ngalayi kababa mono wai linage tabarai Allah ta aroda tangada yidda, hibiyi kababa radda, mono kapuge yayo. ³⁶ Nyiwe, yidda tangada hadidara dadi ateda mono yidda dau dummo yayo. ³⁷ Buta nami tangama kadana lari ta kapalu duda ngahu pittu kabulu anni atama. ³⁸ Kole bada bokta ha yayo, yidda da halewarayi kapal waige bada baitadi gandum ta bannu. ³⁹ Kole ba manari laddo nage yidda wale da tadak mawe ba dage tana yara, tabolo yidda hamatara dahe dage mananga kadayo paha laina, hadu yidda bada pahuni kapal neda bali bana dadik kawe. ⁴⁰ Nyiwe, kole bada baitadi watu kanaga, yidda da tanani neda lari ta bannu, mono ta mahiggo inna dummo, pahallayi kalarri hapodeta wai mono hapanne dage kaba ta aro kapal dajalage rereha kana ngidiyi yidda kahha ta huppu tana yara. ⁴¹ Ta nyiduwe, kapal na jojayi watu karaha ta hadau hatabokage kadudana bannu dajalage kapal naka rita. Ngora kapal naka ritawe mono walena dadik mawe gedo, tamrage ngora kapal wetara oro bakta nani ngalung. ⁴² Tangada prajurit dage hakab u ateda kapiku hamateyi ata hatahanu dajalage illa hilu dayo wuak ata ka nangu mono malai. ⁴³ Ta nyiduwe, perwira nadda, na mannege dadiwe pahoilayi Paulus, na pade kawe hakabu ateda yidda, Nyi nahartehayi rada ata kadadi nangu kapilku ta lahhoka ulluda wali ta kapal mono aro ta tana yara. ⁴⁴ Mono, karehi ka innayi ta pannu kapabala, da dummodi kawaina agayi wadeka wali ta kapal. Waige katauna, tangada ata kahha ta tana yara da hoila.