PAULUS TA NUHHA MALTA ¹ Kole nami pala kawe waige hoila, nami ma tadawe inna nuhha da takkiwre Malta. ² Ada mema ta nuhha inna na dahha kiyi ateda aika anana. Oro, yidda da rewo ki latti mono da tabokakima nami tangama oro innana halege nage urra mono hadage na mayagalawe. ³ Kole Paulus kahhayi karaga yayu mono ijalayi ta panu latti, wuyo nippe huna oro ngangaha lohho na kojelani Paulus. ⁴ Kole ata mema etayi ranga bani nadda bana madairo ta limma nai Paulus, yidda lidager dihha-dihha, " Wale hilu gela gagakmani, ata nadde wuyi ata hamate ata. Lokko bana hoilakna wali ta bannu, tijana walena yelak manage morhana." ⁵ Ta nyiduwe, Paulus na kabahayi nippe nadda lari ta latti mono nyi walena padak mage mayilla aga ana kapota. ⁶ Ata radda da wauge Paulus enga na bayo waleka na bukka mono mate inna mema dummo. Ta nyiduwe kole bana mojage yidda bada remani mono aida etawe hodi ak kadadi tabarana, yidda hangadada hekayi mono lidadage nadai Paulus yikna dewa. ⁷ Dihha wu hadakka , ta kalingora hadau nedda, dage tana hadauna pa ama ta nuhha inna ka ngarana Publius, katabo kama nami mono kaha yagama nami waige lagahara katuda laddona. ⁸ Inna na, amanai Publius dura nage taha dau dura oro kalikkana mono kahurruna. Paulus ammini mai eloyi mono na sembayanguni, lohho naha jolani limmana ta ata nadda mono nahatagahayi. ⁹ Kole kadadi inna dadiwe, ata wadeka ta nuhha inna katamrana kalawara dummo ammidi tai Paulus mono hatagahayi. ¹⁰ Yidda dummo kiki da ha aka gama nami mono kole nami ha inyaka kako ta tena, yidda da inyakadi tangadi ha kabu atema. ¹¹ Kole tauda wulla hege, nami ta tenama nedda ta wuyo kapal wali Aleksanderia, ka huna ta nuhha inna ba rahi kalikkawe waihge waina Diaskuri ba wuwe tadka ge. ¹² Kole dikki ta Sirakusa, nami ma engana neda bali tauda laddo. ¹³ Wali neda bali, nami ta tenama pala kawe paha lai mono dikki ta Regium. Danma ge tana , rereha ta bannuyi, mono ta laddo piwalige, nami ma dikki ta Putioli. ¹⁴ Neda bali, nami ma tabo kayi kapirana ole bai taha tena mono halehu kapiku enga ole dangadi yidda kapittu ladona. Lohho, nami kako ta Roma. ¹⁵ Mono, ole bai taha tena neda bali, kole rangewe tutuma nami, ammidi wali bali kahha ta Forum Apius mono Tres Taberne tutu dikki gama nami. Bana etayi yidda Paulus, nyi wai linage tabarai Allah mono na kulahawe. ¹⁶ Kole nami dikki ta roma, Paulus da pahaini tutu enga mehana neda bali, oleni wu prajurit kaha teteni. ¹⁷ Tauda laddo hege, Paulus na kahhayi pama-paama Yahudi taha dau nedda, yidda da makahha, nhyi linage tabarada yidda, " Bagu ole baigimi, lokko nauwa aigu rayi duge aga ana gabage kabihhuda yitta waleka ka kali damma weda waikada yitta, tabolo nauwa da yiwa ba wuwa ata hatahanu wali ta Yerusalem ta limmada ata Roma. ¹⁸ Kole yidda bada harehawa, yidda da baige pahoilawa nauwa oro ai damo puge tutu hoku mate tubagu. ¹⁹ Ta nyiduwe, oro ata Yahudi aida ngoge, nauwa bagu rehi pannewa tabara Kaisar, wale mangu kappek mage nauwa ba wauga bagu gabage kabihhugu. ²⁰ Nyiwe, orogege, nauwa ug karai bewe tutu etami mono haneswe danga gimi oro nauwa ba kattiga kalarri bahhi inne tangage hamannena Israel ²¹ Lohho, yidda liadage tabarai Paulus, " Nami walema hibak mawe jurata tutumu wali ta Yudea mono wale lakma wuak wale ta ole bai hatenagu kamai taha dau inne tutu kayiyo li waleka katakkiwe hoak aika dahha tutum yau. ²² Ta nyiduwe, nami kabu atege rangewe wali tabaramu aga linnawe paha ngadamu oro tutu sekte inne, nami ma tadawe ba gigiyo ata bada gabage." ²³ Kole yidda bada hayanna bege wu laddo tutui Paulus, yidda ammidi tabarai Paulus taha dau dauna, oledi kabuta olena. Wali kokoka kahha gaddi, Paulus naha larawe tabrada yidda waige bana hadelakage tutu Kalingoranai Allah mono na baige hadidarayi yidda tutui Yesus, ba kawali ukku parehai Musa, lohho dummo jurata tangad Nabi. ²⁴ Kapirana ata kadadi jukkage ledege agawe hatakkinai Paulus, tabolo wadeka da tularage hatewawe. ²⁵ Kole yidda aida ngoge dihha-dihha, yidda dummo kakokolei Paulus na takkiwe hanwe inna, " Na tena takkawe agawe hatakkina Waddi Bihha tabara weda waikami ledeni Nabi Yesaya, ²⁶ ' Kakomila ta kabihhu ata radde mono takki dagela: Miyo enga range mige, tabolo walem kali yapak mawe, mono mi enga eta mige, tabolo walem kali tadak mawe. ²⁷ Oro, ateda kabihu ata radde bakaklawe mono katilluda biktayi bada range. Yidda da toni beyi matada. Dajalage, ilda yidda eta waidi matada yidda, da range waidi katilluda yidda, yappa waige ta ateda yidda mono da kabali. Bege, Nauwa enga hatagaha gudi yidda.' Yesaya 6 : 9-10 ²⁸ Oroge inna, yammage hada inna mi kamu tadawe inna manemara kawali tai Allah nadda nah dikki bege tabara kabihhu ata wadeka mono yidda enga range dage." ²⁹ [ Kolei Paulus padikkege hanewena inna, ata Yahudi kako dage waige bana pahekadi ha ngadda ta jongada yidda]. ³⁰ Paulus engana kaduda dauna ta umma pa hewa dauna mono na tabokayi tangada ata ka mai tabarana, ³¹ hagapege talaragwe Kalingora Nai Allah mono ajarawe tutu nai Mori Yesus Kristus waige bani ate mono lakma hapage aga hingkana.