PAULUS NA KARAIWR ARONI KAISAR ¹ Tauda laddo hege, Festus na dikki ta provinsi inna, kole nyi bana kako wali ta Kaisarea ta Yerusalem. ² Rato-rato kapala mono pa ama Yahudi na aroni hawauna gabani Paulus, mono yidda daha kitage karuhhuyi Festus, ³ hagapege karaiyiyi marad atena tabarada yidda waige bada halewayi ngidiyi Paulus ta Yerusalem, kole yidda bada woroge kapiku hamateyi Paulus ta tillu lara. ⁴ Festus bale hawe nadai Paulus enga dahoge ba tahanuni ta Kaisarea mono inna nyi dau enga na geha maidahho. ⁵ " Nyiwe, " linage, " Yammadi tangada pa ama ta jongami kako neda bali olega, mono nyi badaka kajala ta ata wadeka radda, yammadi yidda kada hadikkige hakaruhhuda tabarada yidda." ⁶ Kolei Festus engana tajongada yidda wale na rehik mawe wali ta podo pata waleka kabulu laddo, nyi na hagga ta Kaisarea. Lohho, damma hege tana, nyi na ngodo ta kursia hadau tija mono na rehawe kangidiyi Paulus ta arona. ⁷ Kolei Paulus dikki, ata Yahudi kamai wali ta Yerusalem dede kilorani, mono da hadikidi butalayi hawau dani kabikta gabani Paulus, aih hatingona tada katuba. ⁸ Tamrage inna, Paulus naha dikige balehana, " Nauwa waleg rayik mage kajala aga hingkana kaha gabba, Ukku Pereha Taurat Yahudi, Umma Allah, lohho dummo Kaisar." ⁹ Ta nyiduwe, oro bada baige hadahha dage ateda ata Yahudi, Festus linnage tabarai Paulus, " Appa yau um baige kako ta Yerusalem mono yigu tijana neda bali ta aromu tanhgage inna paha wau dagu inna ?" ¹⁰ Tabolo, Paulus linage, " Nauwa dede guge ta aro hadau tijana Kaisar, hadau doku dage nauwa ba tijaga. Nauwa waleg jalak mawa aga hingkana ta aro ata Yahudi katau mi hatada daumi. ¹¹ Nyidawe, nyi nauwa kajala mono karayige hudi akki katuba li hoku mate, nauwa waleg malai mawa wali hoku mate inna. Ta nyiduwe, nyi hawauda yidda tabaragu ai daka katena, wale lahingmana wu ata dummo ka yiwa nauwa tabarada yidda. Nyiwe, nauwa magu baige hadikki tija karehi madehta tabara Kausar." ¹² Bege, kolei Festus woro dangadi sanhedrin, nyi na balehawe, " Yau um panne bewu ta tijana karehi madehta ta bara Kaisar, nyiwe tabara Kaisar yau um kako dahhowu." ¹³ Kole ba pira laddoge, Raja Agripa mono Bernike dikki ta Kaisarea tada ha akani Festus. ¹⁴ Ba tamarana bada engan neda bali kapira laddona, Festus naha larawe tutunai Paulus tabarana raja linage, " Dani wu ata ka engana tahan nai Feliks. ¹⁵ Kole ba daga ta Yerusalem, rato-rato kapala mono bai ata Yahudi daha dikkige tangadi hawau da gabani mono karaiyiyi kapiku hokuni. ¹⁶ Nauwa ug balehayi yidda wale wu dak mawe kadamma tubada ata Roma ba yiyi wu ata ai nada hawau ai taboka danga honi kaha wau wuni, hatabo mata dahona, mono nyi mahiggo bana rayige balehage ta tangadi hawau wuyi radda. ¹⁷ Nyiwe, kole yidda ba ammidi makahha inne, nauwa waleg ha erik mage kadadi inna, nauwa ug ngodowa ta kursi dau tijayi mono harehawe ata nadda ka ngidiyi ta arogu. ¹⁸ Kole tangada ka hawauge radda dede, yidda daha dikkige hawauda kajapata katauna paha mawogu. ¹⁹ Ta nyiduwe, yidda dukka hege ba pirra kiyi ai hakabu ateda ta ata nadde tutu hateda yidda dau mono tutu wu ata ka ngaranai Yesus, kamatebe, paha didara nai Paulus inna Nyi na morha. ²⁰ Oro nauwa waleg angtak mawa harehawe tangage inna, nauwa ug kanukayi apa yau auwuwu kako ta Yerusalem mono yini tijana neda bali tutu kadadi inne. ²¹ Ta nyiduwe, kolei Paulus bana rehi panne nau tujjana kapiku tahanuni mono remage pohta wali ta Kaisar, nauwa ug harehawe inna nyi ka engage ba tahanuni kahha nauwa dadiwe ha ngidini nyi tabara Kaisar." ²² Nyidawe, Agripa linage tabarai Festus, " Nauwa dummo kabu atege range dau ata nadda." " Koka, " Festus linnage, " Yau enga range munia." ²³ Nyiwe, damma hege tana, Agripa monoi Berneke mai ngidiwe manadana mono tama ta koro dau tijawe oledi tangada militer mono pa ama ta harona inna. Bege, dukuge harehanai Festus, Paulus tama ngidiyi. ²⁴ Festus linage, "Raja Agripa mono tangada kadana olema nami inne. Etayila ata nadde, ha rainoda tangada ata Yahudi tabaragu, kadana ta Yerusalem lohho dummo kadana taha dau inne, waige bada kawula ata nadde doku dage walena moja dak mana morha. ²⁵ Ta nyiduwe, nauwa ug jamuyi nyi aina rayige aga hingu kayi katubawe li hoku mate. Mono, kole nyi bana panne rehi madehta tabrai Kamanada, nauwa ug pohtawe ba hangidini tabara Kaisar. ²⁶ Ta nyiduwe, nauwa lakma hadauwugu hodik ka tetakkana hatolha tabara morigu. Oroge inna, nauwa ug ngidi beyi ata nadde ta aromi tangami, mono baningna ta aromu yau, Raja Agripa. Waige bataudage, kole baha rehayi inna ba rayige, nauwa waleg kolek mani wuak ha tolhayi. ²⁷ Oro, wale na tama dak mawe ta katakku tubagu bamu han gidi gani wu ata ha tahanu ai hadikki dadi hawau ka hira tabrana."