TIMOTIUS NA OLENI PAULUS MONOI SILAS ¹ Paulus dumo amini ta derbe mono listra.Mono, etayige dani wu ana hakodo neda bali, ka ngaranai Timotius, anana wu lawai Yahudi kaha tenabe, tabolo amana ata Yunaniyi. ² Nyi da tada hadahani ole bai taha tena ta listra mono Ikonium. ³ Paulus na kabu atege kako ole dangani, nyiwe nyi na lekoyi mono naka bunyini oro ata Yahudi ka enga taha dau neda. Oro, yida tadawe nada amana ba ata Yunaniyi. ⁴ Batamrada yida kako lipalakayi taharona, yida daha dikige nauta-nauta hatena tuba ata kaha tena pa doku hoda, pa pohta beda tangada rasul mono bai ata ka dana ta Yesrusalem. ⁵ Nyiwe, tangada ata hatena hadidarayi lari taha tena mono butada yida kiki mataba nahiyi lado. ⁶ Loho, yida da kako palakawe kalingora Frigia mono Galatia oro bana padekayi Wadi katenguna kapiku takkiwe lina ta Asia. ⁷ Kole yida bada diki ta Mesia, yida da kabu atege kako ta Bitinia, tabolo wadi Kristus walena pahai madi yida. ⁸ Nyiwe, kole bada palakawe Misia, yida da burru ta Troas. ⁹ Na dedowe wu haeta nai Paulus ban gakge.Wu ata ta Makedonia tamrana dede mono maraino nage tabarana, linage, "Maiwuge ta Makedonia mono tulgama nami." ¹⁰ Kolei Paulus bana etawe innage, nami karuhuwe koko geha ta Makedonia, kole bada kapodige nai Allah bana kamaika bega nami kapiku talarage li ege ate ta yida. ¹¹ Oroge inna, kole bada waina tena wealita Troas, nami wing mage panena tena ta Samotroke, mono damage tanage ta Neopolis, ¹² mono wali neda bali ta Filipi, bai harona ta kalingora Makedonia mono wu harona hapijada Roma.Nami engama taha rona neda kapira ladona. ¹³ Lodoge, ta lado ngahu nami kako tabali bina kalla harona aro ta hupu lai we, tahadau neda nami bama ha ngadage neda bali ba da kakna dau sembayang.Nyiwe, nami ngodo mono hanewe dangadi lawai katamrana makaha. ¹⁴ Wu lawai kangaranai Lidia, wali ta harona Tiatira, wu lawai kamalajana kaba mal melo ka wojoni Allah.Mori nabugera nage atena tutu hamatara agawe hataknai Paulus. ¹⁵ Mono, kolei Lidia mono tangada ata kaengana taumana harihayi, nyi na rainoge tabarama nami, linage, "nyi yau bamu yapa dakwe nauwa bagu hatena didara tai Mori, maige ta umagu mono kam engana neda bali" Mono, nyi nakaruhuma nami. ¹⁶ Tamrage, nami kako ta hadauwu Sembayang, wu ata lawaiyi, kamangu wadi manyurra natabkama nami.nyi na butayi hautut dangana tabarada pa ama ledege manyurra tangadi. ¹⁷ Lawai nada na dokuni Paulus mono nami hagapege kawula, "Ata nade nyiknai atanai Allah kahada madehta, katalarage lara hoila tabarami!" ¹⁸ Nyi narayi hangatage kapira ladona mojage.Paulus, tillu baniyi, na pelu mono linage ta wadi nada, "Nauwag parehawu yauwu larr ta ngarai Kristus Yesus kamu huna wali ta nyiyo!"ldoge, ngahu nada huna, nedo mema. ¹⁹ Tanyiduwe, kole paama etayi inna hamaneda yida hautu danga bungawe, yida da yapayi Paulus mono Silas, loho da yoriyi yida tahadauwu ata buta ta aro kahareha. ²⁰ Mono, kole yida bada ngidiyi Paulus monoi Silas tabarada hakim kanaroge katakuge, yida lidage, "Ata rade ata Yahudiyi mono tamrada makabora taharonada yita. ²¹ Yida da hanuwama pata tana aika tena tutu yita hibawe waleka rayige ba wuda ata Roma." ²² Ata buta rada da kade harajja kadukani Paulus monoi Silas mono tangada Hakim ta harona da hirradadi kalabedai Paulus monoi Silas, loho da harehayi yida kapaluyi kadudana waidi takko. ²³ Kole ba enga hoda hamayilayi Paulus monoi Silas waidi palu habutadi, yida datubadi ta gallu mono harehayi paama gallu kajawayi Paulus monoi Silas waige mahahera. ²⁴ Kole bana hibawe pareha inna paama gallu hatamadi Paulus monoi Silas ta gallu hadda li lari mono kogadai leduda yida waige kama katti. ²⁵ Tauge katutu tilu gadiwe hewe ge, Paulus monoi Silas tamrada sembayang mono manyanyi manyanyi hadiyi Allah, mono ata hatahaka wadeka dumo rangeyi yida. ²⁶ Loho, kadadaka ngidiwe bana haepuna aika anana dajalagr tana pahowu ta gallu gedowe.mono, hayadawe tangadi bina mabugerayi mono kga leduda maladayi ²⁷ Kole paama Gallu kadde mono etayi bina Gallu bana mabugrayi, nyi lahhuwe kito kalekana mono hodikmowe mana hamate wikina oro pahangadana tangada ata ta gallu atudi malaiyi. ²⁸ Tabolo, Paulus na kawula waige lina kawaddi, "Ilam hamayilawe tauwu dauwumu oroma nami tangama dahogama!" ²⁹ Bege, paamagallu nada nakaraiyi lati weyo mono geha malaiyi tama , loho nakadada kawe nguhina, nyi nakawojo ta aronai Paulus monoi Silas. ³⁰ Kole bataudage, nyi na ngiyi yida ta bali hadu mono linadi, "paama-paama agadahona harayigu kagu manemarawa?" ³¹ Mono, yida dabalehayi, "Hatenawu larr tangaranai Mori Yesus mono yauwu enga manemarawu, yauwu mono ata kaengana ta umamu." ³² Bege, Paulus monoi Silas da talarage linai Mori tabarana paama ta gallu nada, mono tabarada tangada ata kadana lari taummana. ³³ Kole inna, nyi na ngidiyi Paulus monoi Silas, gaddi neda dumo, mono nahamuraha dadi kapotada yida, lodoge nyi mono tangada ole taummana geha harihayi. ³⁴ Bege, paama gallu ngidiyi Paulus monoi Silas ta ummana mono na hainyakadi hayayo.nyidawe, nyi hada ege ateyi oro nyi mono tangadi ata ata kaengana ta ummana bada hatena be tabaranai Allah. ³⁵ Tanyiduwege, kole bana magakahage, Tangada Hakim-hakim harona neda halewayi kapirrana palihi, waige balinna, "Pahalayi rada ata!" ³⁶ Mono, paama gallu natakiwe li hanauwu ina tabarai Paulus, waige balinna, "Hakim-hakim harona inna nahalewama nami pahalami miyo.oroge inna, huna batauge mono kakomi tillu moli ate!" ³⁷ Tanyiduwe, Paulus nahanewe linage tabarada yida, "ata rada da palubema nami ta aro ata buta, wale nyurak mahomadi jalama.tangada ata kalingora morha Roma, mono bebe nami hatama gama ta gallu.loho, ahadalka batauge yida pahugama nami waige kabunyi? Walekma !haidi yida kada maiyi dawu mono pahugama nami." ³⁸ Palihi trada takiwe tangage hatakida tabara Hakim-hakim taharona.yida da madauta kole rangewe radai Paulus monoi Silas yida ba ata Romayi. ³⁹ Nyiwe, yida amidi mono bani kagama lidage tabarai Paulus monoi Silas.kole yida pahudi Paulus monoi Silas, yida da karaiwe dajalage kadudana ijakage harona inna. ⁴⁰ Loho, yida huna wali ta gallu mono tamadage ta umai Lidia, mono kole yida etayi olebaida ta hatena, Paulus monoi Silas hamado dadi ateda yida, lodoge kako dage.