PAULAUS MONO BARNABAS TA IKONIUM ¹ Mono, nadadiwe, ta Ikonium, Paulus mono Barnabas tama kaha ta Sinagoge ata Yahudi mono nuju hingga dajalage katau kalan ata, ata yahudi loho ata Yunani, dadiwe hatena. ² Tabolo, ata Yahudi aika hatena da hawolodi ata aika Yahudina mono da wunu dadi paha ngadada yida gabadi ata hatena. ³ Nyiwe, yida engana neda bali ta mahigo kamojana hagapege hanewe waige bani ate tubanai Mori, ka yiwe pahirawe tutu li kanyurruNa, loho na yiwe tada paha ngatara danga kadadi lededi limada yida. ⁴ Ta nyiduwe, ata taha dau inna da ma pabakka, wadeka da kalapere ta bara ata Yahudi mono wadeka ta barada rasul. ⁵ Kole wu haulla bada rayige, ata aika Yahudina loho dumo ata Yahudi, waidi tangada kakododi yida, kapiki hama yillayi mono tukkuyi rada rasul waidi watu, ⁶ kolei Paulus mono Barabas tadawe mono na malai ta Listra mono Derbe, harona ta Likaonia, mono taha hadau kalingorage. ⁷ Mono, neda bali, yida engada talarage liyo ege ate. ⁸ Ta listra, dani wu ata ka ngodo kaloja leduna, kalikku wali, ta ti inyana mono walena kal kakokma. ⁹ Ata nada tamrana rangeyi Paulus kole nyi bana hanewe, kolei Paulu bana torroyi mono na etayi nada ata dage hatenana baige hatagahayi, ¹⁰ Paulus na wangtawe ban hanewe, "Dede didara waidi ledumu." Nyidawe, ata nada ta lahoka mono nakapuge kako. ¹¹ Kole rada ata buta atawe agawr harayinai Paulus, Yida da keketawe lida waige bada hanewe waina hanewe Likaonia, "Marapu kamateyi kaburru ta jongada yitta mono dadi tujayi hada kadadi ata!" ¹² Ata rada daha nagarani Barnabas ba nyiyo Zeus monoi Paulus ba nyiyo Hermes oro nyi kakodoge hanewe. ¹³ Rato marapu kamate Zeus, ha daudauna kadana tabali harona, da ngidi hapi mane mono kahanga bunga ta bau bina kalla Harona.Nyi mono ata buta rada kabu atege bana maraka hatunu tabaranai Paulus monoi Barnabas. ¹⁴ Ta nyiduwe, kole rasul Barnabas mono Paulus rangewe hada inna, yida da hirayi kalebeda yida mono malai tama ta tillu ata buta rada, hagapege kawula, ¹⁵ mono lidage, "Bagu angu wugimi, aha miyo mami rayige hada kataudana? Nami jala kadadi atama katujana dimmi mono ngidi mage li kadahha tubami mi dajalage mi kam kabalimi wali ta hada ai kamngu gauna inna tabarai Allah ka morha, kaha dadige langta, mono panu tana, mono bannu, mono tangadi kadana lari. ¹⁶ Ta dalara ata ka langana, Nyi na pahaidi tangada ata kako dokuni lara dauda. ¹⁷ Tabolo, Nyi walena pahai mage tauNa aidaka kapa delage.Oro, Nyi narayige kadahha waige yigimi tabarami urra wali talangta mono rahi wu yayu kaha bokta midi atemi waige ha yayo mono lagahara." ¹⁸ Loko mataudakge waige bana takkiwe tangage inna, yida walena dadik mawe bada hangahuyi ata buta rada ilda rayina maraka hatunu tubada yida. ¹⁹ Ta nyiduwe, ata Yahudi amidi wali ta Anthokhia mono Ikonium, mono kole bana godayi ata buta rada, yida da tukkuyi Paulus waini watu mono werakani ta bali harona oro bada yapawe Paulus na matebe. ²⁰ Tabolo, kole tangada ana hakodona kilorani Paulus, nyi na dede mono na hagga tama taha rona.Dama hege tana, nyi nakako oleni Barnabas ta Derbe. ²¹ Kole yida bada takkiwe li ege ate ta harona inna mono bada frayi ha buta bena ana hakododa, yida haga dage ta listra, mono ta Ikonium, mono ta Antiokhia, ²² hagapege bada hakulaha dadi urrada tangada ana hakododa, tula radi yida kada mikku lari taha tena, mono da takkiwe inna yitta da tama daho kalingora parehai Allah ledege kabutala mayilla. ²³ Kol, ei Paulus mono Barnabas keketayi bai ata tubada yida nahiyi kangote ata hatena, kole bada sembayangna waige bada tari, yida da pahadedi tangada bai ata tai Mori, bata barakna bada hatenaYi. ²⁴ Bege, yida da li palaka Pisida mono kaha Pamfilia. ²⁵ Lodoge, kole yida bada hadikige liNa ta Perga, yida burru ta Atalia. ²⁶ Wali neda bali, yida da waina tena ta Antiokhia, taha dau yida bada pahadedi ta ta kanyurunai Allah tutu ha ulla ha bebeda. ²⁷ Kole yida da dikki mono makaha ole dangadi kangote ata hatena, yida daha dikige tangage hada harayi benai Allah dabada waidi yida mono aga linada Nyi bana bugerana bina hatena tubada kabihu ata wadeka. ²⁸ Mono, yida da engada oledi ana hakododa ta mahigo kamojana.