¹ Stefanus amineho, Saulus di u inung. SAULUS REALA YERUSALEM MIHO AMINE Sari selho a'raham, beh par, bamed foihal mate a'ra Reala Yerusalem miho arupa' aholdang. ² Name om a'bul pirnu alo Stefanus u a'hain u' a'fe' no' sipi apot. ³ Honi sobo, Saulus ho se'bur lap Reala ho amine atubing fe ho, salame bang el arian, name no mi ob mi lote sa baring sam sapiri mi. BAANG KAAI UT SAM ERALO FALING IFING MIMENG FILIPUS SAMARIA MI FOMPA BOLANG U MATENG ⁴ No, sipi sari dalamho, pali fading sura' pa' bolang u'mateng. ⁵ Filipus hel Samaria pali' lehel Yesus ani u'mateng u'lurung. ⁶ Name tofang somnu Filipus nabafe ubang eh edun ualepang, fede na u tahoir ernu Filipus panen sipi a'holam. ⁷ Fede, roh sah name tofang om tamang ho, so morang so ahew hel te'eng, name tu'ung doh, e'sah a'tangsah mi ob mi lote sa a'no' birang. ⁸ Horo, loil asal, bad herang mate ara bang homi. ⁹ Sobo, ai nu ani Simon dai eh ta sa i'sara dafang puin natofang panen pali homi, name tofang Samaria mi u sahoir, sa ubangho, nari name mate. ¹⁰ Nameno' mi kaai mi mate sam name mate puin di, edun o' atino' bit ubangho, "ai ho'o Lahtal o' kufa mate so." ¹¹ Sipi edul efal fede' sa so i'sara dafangho puin sipi ano' sahoir lufangam. ¹² Sobo, name tofang foil Filipus a'lol a'taain, fede sa Lahtal o' mateng pa' med Lahtal o' bang bolang fe sa umateng, Yesus Kristus anife sa umateng, nameno mi ob mi lote sei tuling tow med. ¹³ O'mitata, Simon hodi o' atino' ubang, sei tuling tow med, sa Filipus a'bung a'lolang sei masing fede' na u tahoir ernu a'ra latel sangdi dun a'hol sa u sahoir. ¹⁴ Selho a'raham, Sakola ernu Yerusalem miho ma'eh bite, Samaria hinung di Lahtal o'fompa' medam horo he'e. sipi Petrus med Yohanis a'how name ho o'lap sam, ¹⁵ som a'tel honie sipi di Roh Bolang ho med. ¹⁶ Fede, Roh Bolang ho, e hel sipi pirnu di e tahel dai, seilal ho, sipi Yesus animi sei tuling tow horo med. ¹⁷ Horo he'e, Petrus med Yohanis satang sipi ta a'hir, sipi Roh Bolang ho med. ¹⁸ Simon edun he'e Roh Bolang med ho, sakola aibar satang a'hir horo om mi, Simon sakola aibar a'ra tafara honie sa seng sipi en, ¹⁹ sa ubangho, "kufaho med naridi nen, honie anofe na natang ta ahabu honi he'e Roh Bolang ho sa med." ²⁰ Sobo, Petrus ubang ho Simon, "A osengho a'ra min tabang med, otanut ho, kufa a'ra Lahtal ei ho a seng puin fel no! ²¹ Ei umung ba'ang pite'di e a'ra na ho' om mi nene, fede om abul Lahtal a'raham ho a'ai. ²² Honife, o sah karang ernuho, u om a'fom, om atel Lahtal a'bang, mang fede' o'tanut Lahtal u i'nung he'e sa ari u ampo. ²³ Fede, na edun he'e, ariho ma'ai ma'ar om mi, med behang sah om mi." ²⁴ Simon o' a'bor ubangho, naridi nari u aome Lahtal a'ramateng, "Honie nabafe u bang am ho, ha'ai narupa' naholdang e." ²⁵ Petrus med Yohanis Lahtal o fom pa' a'titino umateng no' horo he'e sipi sabor Yerusalem leam, fompa' matengpa' umateng Samaria pali' mi a'lol sam bang lelang Samaria miho so barpi. BAANG KAAI ERALO FALING TALANG SAM ERUT MIMENG FILIPUS ETIOPIA O'NAME SEI TULING TOW EN ²⁶ O' ataain, Lahtal o' Malaikat Filipus a'ramateng ubangho, "Hahirtoh fi'ing a'raham, hel se'bur Yerusalem mihel pong Gaza lehel ho a'lol hel. Sari se'bur ho se'bur so oh." ²⁷ Filipus toh horo he'e sa lame, sadun Etiopia o' namenu a'hol, sari ai ho parakara u' mateng o' name ani Sri Kandake ho, o' name udumenu, Etiopia pali' ho o'afen ob afen mate o'ob ei kafac bung sangso buang sa Yerusalem leho' som atel, ²⁸ no' sa sabor seham, sa so kereta om'mi mih Yesaya o' sura' ho sa ta'an eh. ²⁹ Mang horo, Roh Filipus a'ramateng, "a sam a'ra kereta om ho mi'mih." ³⁰ Filipus te'eng sam kereta ho abung, sa alepang he'e, ai ho Yesaya o' sura' fe ta'an eh. Filipus a'tan tuang, "naba a'ta'an, oh ho a'pahang em e' nene?" ³¹ Med, ai ho ei a'bor ubangho, "Taroni fe na a'hol, mang fede' name den e nau natang ta nene? No' sa Filipus ahow mid a'ra ham-ham kereta om mi mih. ³² Ho a'raham, Sura'ba sa taan eh ho ho'oni, "Ara sam dang ta'an emelemi mangfede' nub ai nu honi, mang fede' nub ai nu o'beng ta'ain dai a'mang sah horofe sa e sat abe' nene. ³³ Sa sah lahal, ladimang labor om mi name o'tot o'kalaping. Anoso ma'a o'utoh u hamow ho u mateng no'? fede', o'fetang ho pali' mate utot medam." ³⁴ Mang homi, afen ob ho Filipus a'ramateng ubangho, "Na abang, ano soba nabi ubang eh, sariso eme name bengso?" ³⁵ Horo he'e, Filipus sat abe', sa alomang lol Sura' Bolang u mateng, o'om miho, sa Yesus fe u mateng med afen ob ho en ma'eh. ³⁶ Med, sipi selai-lai lol sam, emele nu mi sei a'ra, afen ob ubang ho, "adai dun, sei a'ra eh! sei tuling tow na med naba honi horo no se tel?" ³⁷ [Filipus ubangho, "mang fede a om abul abul puin o'atino' ubang, honi he'e no'." sa o'abor ubangho, "Na o'atino' ubang Kristus Yesus ho Lahtal ai."] ³⁸ Horo he'e, afen ob kereta a'how air. sanang alo hel sei lehel, Filipus sei tuling tow en. ³⁹ Sanang alo sei mi hel, Lahtal o'Roh Filipus med a'rasam, afen ob e a'hol nene am, sa solame u hamow om sanang apangno' o'sah. ⁴⁰ Honi sobo, Filipus sam Asdod mi a'hol, sa bang pali'ho a'lai, sa sura' bolang umateng bang a'rian sam mong Kaisarea mi.