¹ Dor buang mimate sariho Imam sa mateng, "Honife naho abul?" ² Horo, Stefanus mateng, "Diail bar med omang nun, nari alepang; Lahtal mate lafining sari med pi bap pi bale Abraham o'petang, ho a'raham sa dai mong Mesapotamia ho mi, sa e Haran mi dai, ³ no' sa aramateng, helsam, o'bang o' pali; o foi o faai, o di, o matu, o uding o hun, a mihel sam mong bang pali nu ma a na etub ho leam. ⁴ Horo he, Abraham Kasdim hinung o foi faai ho med meng, sa mong Haran leam mih, Hemomi omang min, Lahtal foil a'how saluil ho' faai ba i tamieh ho' leho. ⁵ Sobo, Lahtal faai ho' tehalal emele di sa e en nene sobo, u paha' med Abraham en ano' sei, med o diing o bap e'meng, masiki Abraham ai ara dai. ⁶ Sobo Lahtal aramateng ho'ni, o diing o bap ho, sano' name seho' ong foi faai empir mi, name sipi a'how atining ano' sah-sah o' lufang tun ratut om mi. ⁷ 'Sobo name ba sipi ahow atining ano' sah-sah ho, na hukung en, Lahtal bit honi. No' sipi hemomi hel lame dal orang med naraham ong pali' ho' mi.' ⁸ No he'e Lahtal paha' med Abraham en a'how sao' bolang, no' Abraham sano' Ishak omang, no' he'e sa ano' bolang, ho araham Ishak o ur tareng turlo, med Ishak sano' Yakub omang, no' he'e Yakub ho sano' pi bap pir ernu faling alo. ⁹ Sipi om Yusup a'taain, horo pibap ari fail Mesir leam. Sobo Lahtal Yusup a'ra to huil, ¹⁰ Sah karang om mi sa ano il, na a'hol dil ma eh sa med Mesir o afen Firaun apong a'dang mi, sa sano name tur Mesir pali' homi, sano' buang aneng ma afen o bang om lelang mate om ho mi. ¹¹ E seh-seh nene malihing mate Mesir pali med Kanaan lehel, kurang bo' karang lapec mate ara atel, med pi bap pi bale na'ade ei lap sah. ¹² Honi sobo Yakub ma' eh he'e, mong Mesir miho ala ara, sa bap bale a'how sam hemo leam o'a'ainang. ¹³ Sam o'mialomi Yusup safah sahir med so di ailbar etub, horo he'e Yusup o'diailbar Firaun di a'hol. ¹⁴ Mang horo he'e, Yusup samang tahow somang en, so di'ailbar med so lelang sobar en sipi a'how ho' sariho sonang eritito faling ifing. ¹⁵ Horo he'e, Yakub hel Mesir lehel, sa hemo mi min, sari med pi diing pi bap so bar pi. ¹⁶ Mong hemomi, name sipi ara Sikhem leho'apot, sari dere lafo ho Abraham seng puin fel tining med Hemor aibar Sikhem mi ho enam. ¹⁷ Honi sobo, paha' ba Lahtal u Abraham aramateng o'selho fanang, sipi ei lelang ba mong Mesir mi ho mang tofang mang lu'ung sota-sota, ¹⁸ Sam afen beng Mesir pali' foil puin, sari afen ho Yusup sa e a'hol nene. ¹⁹ Afen ho kalufe aba med pi lelang barho a'raham, sipi ano' sah-sah, sam sipi ahow so ai a'fain teten nun ho fisam few, honife sipi homi fetang ho, sipi tahang sah. ²⁰ Sel ho a'raham Musa a'fain, Lahtal eng adang mi sa no'bi', no'he'e Musa mong omang o'bang mi gariang ultow. ²¹ No, Musa name fisam few, sobo Firaun o'ai ob med gariang mang fede' o'ai honi sam somate. ²² Honi am fe, Musa name natofang puin gur pel, mong Mesir hinung o'na' ahol dil ma'eh fe mi, honife tutung kufa' araho, mang o'mateng o'lurung mi, sobo tutung kufa'ho ara o panen o atandi mi. ²³ Sobo, Musa o'ur tun erut honi he'e, om toh e'fa a'dail, omho sasam so diailbar mong Israel mi sa sam edun. ²⁴ Sa edun he'e, Israel o' namenu, Mesir hinung a'ra babat a'dimang a'bor eh, Musa ma ai ho eita ari ukarang horo he'e Mesir o name sa amine. ²⁵ Musa tanut ma' o' diail bar ma' pahang sariho, Lahtal sipi a'no il luling fe ho, sarife a' lai, sobo sipi ahol nene. ²⁶ Midilel, Musa ho' Israel piralo saribeh eh a'hol, sa panen taroni pain name aloho sara no'somnufe, sa ubangho, Hoi, inang alo ho'o diailso, nabau iri taburang ino' maar?' ²⁷ Honi sobo, naho sa Musa a'dodo satote lol, sa ubangho; 'anoso ari utub ano' name mate med ano' name ham mi ma ni raham? ²⁸ Om ho a foil namine mangfede' a Mesir na ufangmi a' amine honife?' ²⁹ Mang mateng ho ma'eh horo he'e Musa te'eng sam Midian mi sano' name seho' hemomi sa ai lote piralo afain. ³⁰ Homi tun erut an, Malaikat nu sari med Musa o'petang, mong sinai doita labo'mi, sariho, afail a'libung mong banang mang om mi. ³¹ Musa edun u sahoir. No' sa hod sam fanang toh naho edun eh he'e Lahtal, amang ho' a'ramateng. ³² Nari ho'arofe o di'ing o bap o' Lahtal, Abraham o' Lahtal, Isak o' Lahtal. Musa baroc bibil, sa foil naho edun nene am. ³³ Lahtal foil a'ra mateng ubangho, sendal e'fa mi ho hing, fede emeleba ami tufeh ho, fa'ai bolang. ³⁴ No name no' no mansia mong Mesir mi ho, o susa o malo na dun a'holam a'fe 'na ma'eh alepang am. Nahel sipi a'no' il luling. fed ho' mi a ma! Na ahow Mesir leam. ³⁵ Musa sipi darut arafa arama foil ubang, anoso ari utub ano' nametur med name ham mi ma niraham? sari horo Lahtal utub ano' name tur, il luling o' name, Malaikat a tang a'lai, ba mong banang mang om mi sari med e'tub ho. ³⁶ Ai horofe sano' nametur, sipi ara hel, na u tahoir ernu mong Mesir mi panen, mong tang ten mi, mong la' om berang laimi o lufang tun erut. ³⁷ Musa horo Israel hinung a'ra mateng; Lahtal ma' nabinu a'no' fetang i ereng, mang fede' nari i diail i naimi honi.' ³⁸ Sari horo sipi a'ra mong la mat lalaimi, med Malaikat ba mong Sinai doita a'ra mateng ho, med pi bap pi bale, sariho Lahtal o mateng fetang med no' he'e sa med ten. ³⁹ Pi bap pi bale Musa a'taian apangsah, bahut alil sipi om sabor Mesir leam' ⁴⁰ Sipi Harun a'ra mateng, 'ni ti ah foi ah a panen sipi sotur ni a'taain, fede Musa ba nira lame nira toh mong Mesir mi ho naba ano' am ni e a'hol nene. ⁴¹ Homi sipi nub ai aten, sipi ah afoil u ada a'hol, sipi satangbaho u'dal u'orang. ⁴² Honi sobo, Lahtal som adimang sapong ebang, sei honi sipi burang o soldaj u ada a'hol, mang fede' hul nabi hinung o'sura mi honi, 'Hoi Israel hinung, mong men ham la ham mi o lufang tun erut, i binanta amine, med seng i fit ho fitma nere eng a'ra eme dai? ⁴³ Molokh o dup arah, ifit ho' med i binanta ti ah foi ah Refan, tibeh ba i panen ho, Na a'hel few mong Babel eden lehel.' ⁴⁴ Pi bap pi bale ho, dup arah bolang so a'ra mong men ham la ham mi, mang fede Lahtal u parenta med Musa a'ramateng honi, no he'e a'lol panen lalaman ho a'raham, mang fede sa dun a'holam honi. ⁴⁵ Dup arah bolang med no' he'e, pi bap bale med Yosua sipi ham-ham fit mid, sel ba sipi bang pali beng a'ra sofoi so fa'ai utot om homi, sari name ho, Lahtal beh bahut med pi bap bale e're'eng, sam Daud o samang ho mi meng. ⁴⁶ Daud tofang lu ungho Lahtal mi med, no' foil bang honie, Yakub o' Lahtal ei mih toh eleme hodi med. ⁴⁷ Honi sobo, Salomo so bang nu aten E're eng. ⁴⁸ Sobo, Mate Lafining bangba nameno satang puin aten ho emi nene, mang fede' nabi ernu ubang eh honi, ⁴⁹ Burang ho Nomih Notoh eleme med pali mate ho Ne'fa alo eleme. Bang naba i aten Nere eng?' Lahtal o mateng pa, 'eme, No airlah eleme so? ⁵⁰ Atino' barpi nangso panen em a'ai?' ⁵¹ Hoi, iriba lafungpir kombai, med iom ifel ba e bolang dai, Roh bolang i a'ra tetang mang fede' i diing i bap panen honi. ⁵² Nabi-nabi taroso i diing i bap e asara nene? nameba dai eh ta ai om abul u mateng sipi amine, fed ho' mi iriso ino' om sah, name amine. ⁵³ Iri sura bolang i medam mang fede' Malaikat u ira mateng sobo i e buang nene!" O BAANG KAAI ERIFIHING FALING UT SAM ERTALANG MIMENG STEFANUS AMINE ⁵⁴ Sipi naho alepang horo he'e sipi om mite' sipi safihing ir fa Stefanus a'raham. ⁵⁵ Honi sobo, Stefanus Roh Bolang ari afeng, sa seng atel burang edun, sa dun Lahtal o'lel o'madal a'hol, med Yesus ara Lahtal a'tang tani mi tufeh. ⁵⁶ Stefanus u'bangho, "Alepang! Na edun burang sari during, Nameno Ai Lahtal a'tang tani mi tufeh." ⁵⁷ Honi sobo, sipi a'titino orangbat, no' he'e sipi safel utel, somnu Stefanus fading. ⁵⁸ No he'e, sipi fo om mibaring luling lehel sipi foi med od o'tale. No honi he'e, name se'fail puin dun a'holho, so kod mate hing ai ani Saulus e'fasel mi meng. ⁵⁹ Med, sipi Stefanus od atitino panen, Stefanus lofe atitino ubangho, "Tuhan Yesus, No Roh ho med." ⁶⁰ O'ataain, sa faur muding, sa lofe atitino, "Tuhan, doc ahal ho'o, A ha'ai med sipi tameng e!" Med, mang ubang honi no' he'e, sa min.