¹ Honi sobo, name lotenu a'ni Ananias, med o'ob ani Safira, sanang alo sei na ernu fail. ² No' hee, Ananias sa na fail o'seng sa habuden tahang meng med sere eng, o'obdi a'hol, no' habuden horo sa fisam rasul nun e'fa sel mimeng. ³ Sobo, Petrus ubangho, "Ananias, naba e'ife setang om afeng honie, i Lahtal o'Roh bolang a'ra kalufe, honie i faai fail o'seng habuden tahang? ⁴ Faai i fail dai honi hee, dai i faai eh? Med faai i fail no'am honi hee, faaiho dai ina eh? Naba e'ife, panen hoo i utanut med iom mimeng? I e' nameno' a'ra kalufe nene sobo, i Lahtal fe a'ra kalufe." ⁵ Mang mateng hoo ma'eh horo hee, Ananias ol seh, aeng a'muj. Horonameba sari na hoo a'holma'eh ho, baroc empir. ⁶ No'a'for bar oinu ma fen en puin, tefang luling lehel, no' a'ra sam a'pot. ⁷ No' a'lai maa od tow honi hee, Ananias o'ob foil ho' sobo, nabaso a'ra am honiho, sa e'a'hol nene. ⁸ No' Petrus a'ra mateng ubangho, "A nara mateng, i faai failho, o'sengba tofang meng horo solo?" Med, Safira ubangho, "Ya, horo solo so." ⁹ No' Petrus a'ra mateng ubangho, "Naba e'ife, olote inanglo iomnu honie, Lahtal o'Roh a'pate? E'dun, nameba olote a'ra sam a'potho, e'pating dai se armi o'leh, supi aridi tefang hel so." ¹⁰ Seh seh hee, Safiradi ol Petrus e'fa selmi o'leh horo hee, aeng a'muj. Afor bar oinu mid dun hee Safira minam horo hee, supi tefang hel a'ra sam o'lote a'bung homi a'pot. ¹¹ Horo barocbanibung mate a'ra jumaat o'ham mi latel, med nameba sari na hoo a'hol ma'ehho, barpi baroc oh. NA UTAHOIR TOFANG LAHTAL MI HO' ¹² Na utahoir tofang a'ra latel rasul nun a'tang lol ho'name tofang a'nai homi, supi barpi a'ra Salomo ei hataden homi. ¹³ Name den e'supi umatolang supi a'ra ta'unung nene sobo, name tofang supi a'foh a'tel. ¹⁴ No' hee, nameba Lahtal o'a'tino' bitho, mang tofangta mi ob mi lote. ¹⁵ Horofe supi name mode nunho med de'ta a'tarang, supi tefang se'bur a'ri'an meng honie, Petrus ho'honi hee, o'lalaman horo supi tamuj di no'. ¹⁶ Med nameba mong Yerusalem bang fading mih nunho ham ham ho' supi name mode med nameba roh sah tamang nunho, supi a'ra ho'horo hee barpi birang med oh. RASUL HINUNG NAME A'PUIN ¹⁷ Sobo, imam mate med Saduki hinung sahir toh,* med a'riing fail bune hala supi om afeng tahut. ¹⁸ Supi rasul aibar a'puin a'ra sam sapiri mate om mi. ¹⁹ Honi sobo, dil paka hee, Tuhan o'malaikatnu ho' sapiri se'ar during, supi a'ra hel luling lehel no' supi a'ra mateng, ²⁰ "Sam, toh dume honie, fompa' fetangho mong Gareja om mi umateng, sa name tofang ma'eh." ²¹ Med, supi ma'eh no' dil milel supi sam Gareja bang om lemid, supi name a'fom a'pahang. Imam Mate med name o'a'ta ain nun sam selememi, supi majilis lafining med Israel o'tumo'bar ta'unung, supi name a'how sam sapiri leam, honie rasul aibarho a'ra ho' supi o;lap ho'. ²² Sobo, nameho sam hee, rasul pir ernu faling aloho, e'a'ra sapiri om mi nene. No' nameho saborho'mate nun a'ra mateng, ²³ ubangho, "Nisam hee, sapiri se'ar utel dume, name bu'ang se'ar mi toh pir, sobo ni se'ar during hee, name den e'a'ra sapiri om mi nene." ²⁴ Gareja bu'ang o'kapal med imam hinung o'kapal na ho ma'eh, supi omupir fa rasul aibarho a'raham, supi utaain; taro' nife, sari na hoo a'ra no'? ²⁵ No' hee, namenu te'eng ho'supi a'ra mateng, "E'dun! Nameba imed sapiri miho, mong Gareja om mi name a'fom a'pahang eh." ²⁶ No' name Gareja bu'ang o'kapal, med o'e'bu'ang a'ra, supi sam rasul aibarho a'ra ho'sobo, supi e'a'riing nene fede' supi baroc a'hal name tofang supi o'd. ²⁷ Supi Petrus med Yohanis a'ra ho' no' supi a'ra sam majilis lafining a'pong a'dangmi. Horo imam mate supi a'tan; ²⁸ ubangho, "Ni a'titino' iehap, ihaai sari aiho, ani puin fom pahangnene, sobo ifom ipahang hoo, Yerusalem bang hoo mipiram, iomho sari aiho o'foi med nien tefang uma." ²⁹ Sobo, Petrus med o'bengbar a'ra supi ubangho, "Ni Lahtal ei horofe a'lol a'ta ain somi mid nameno' ei e'mota. ³⁰ Pi bap pi bale o'Lahtal, Sa Yesusba imed arapti ta haleng a'mineho, Sa a'no' fetang am. ³¹ Lahtal a'no' lafining med satang tani lol, Sa a'no' name tur med il lulingho o'uling puin honie, som a'fom med Israel en, med doc tofangho uampo. ³² Na ernu hoo sobarpi, niri hoo dun ta'hol, med Roh bolang hodi honi, Lahtal med nameba a'lol a'ta ainho enam." ³³ Supi mang na hoo ma'eh horo hee, supi om bune hala, supi rasul aibarho a'mine omuma. ³⁴ Honi sobo, Farisi o'namenu a'ni Gamaliel, sari aiho sura' Taurat o'guru, name tofang uada a'hol, sa majilis lafining a'raham homi sahir toh, sa name a'how rasul aibarho a'ra luling lehel a'pite'. ³⁵ Horo, sa nameho a'ra mateng, "Hoi Israel hinung, i e'dun no'no' maa i nabafe panen name hoo a'raham. ³⁶ Fede, sel oinu talai am om homi,Teudas sahir toh ubangho; sari name a'tino' med name o'a'taain a'ra ta'unungho, pir rat ut. Honi sobo, name a'mine med o'a'taain nunho tabite sam bolang. ³⁷ Teudas ho no'hee, Yudasba Galilea o'nameho foil sahir toh, sariho a'raham name sani hul o'sel, horo sa name tofang baring ma sata ain, sobo sari hodi name a'mine, o'nameba a'ta ain nunho barpi tabite laher. ³⁸ Honife, loil a'main hoo, na ira mateng, name hoo e'let, supi admeng. Honi sobo tanut med anen a'ten hoo nameno eiso honi hee, sari na hoo, o'hir o'pa' aai. ³⁹ Honi sobo, tanut med panen a'ten hoo Lahtal eiso, honi hee sari na hoo itahang sah. Omi tata, i Lahtal lafang." ⁴⁰ Supi Gamaliel o'fom ho a'taain. Supi rasul pir aloho o'lofe beh no' supi rasul pir aloho e'hap honie, supi haai Yesus a'niho foil ubang nene, honi no'supi name pir aloho ad. ⁴¹ Horofe, rasul aibar supi majilis lafining a'hoi homi bad herang puin sabor, fede' supi utamut ho, Yesus ei anife, supi maar mahip a'hol so mino'. ⁴² Med sel a'ri an supi Gareja bang mi, no'hee bang sel a'ri an supi sura' habar om ho umateng sapang sah a'hol nene, supi ubangho; Yesus horo Kristus.