¹ Petrus med Yohanis name tofang a'ra mateng eh honi hee, imam hinung, name Gareja bu'ang o'kapal med Saduki hinung, ² supi a'ri ing empir fede' supi name tofang a'fom a'pahang, med mateng ubangho; Yesus om miho, name min sofetang a'ra. ³ No' supi Petrus med Yohanis a'puin med sapiri mi sam a'ra dil talel, fede' dil paka am. ⁴ Sobo, supiba rasul hinung o'mateng pa' alepangho, o'a'tino' bit, med supi o'a'nai homi lote bar foilta o'tofang rib ifihing. ⁵ Mi dilel honi hee, lafung ernu, tumo' bar med sura' Taurat o'name om hul ernu, supi ta'unung Yerusalem mi, ⁶ Imam Mate Hanas, Kayafas med Aleksander di supi a'ra med Imam Mate o'name bang om mi sobarpi. ⁷ Petrus med Yohanis supi med soham mi no' supi a'tan, "Ano o'kufa' med ano anife, ipuin na hoo panen?" ⁸ No' Petrus Roh Bolang om ah afeng sa ubangho, "Bang pali' o'lafung ernu med tumo'bar ernu, ⁹ sel fed hoo i niri paresaho, mang fede' ni nano' nu panen med ai moleng hoo a'ra ham honi hee, naba honi horofe ni puin a'no' birang? ¹⁰ Sei honie, i barpi a'hol, med Israel hinung di a'hol, sariho Kristus Yesus Nazaret pali' o'name ba imed arapti ta haleng sobo, Lahtal name min o'a'nai homi a'no' fetang, horo ei aniba, ai hoo birang ieng a'dang homi tufeh. ¹¹ Yesus ho'oroba: 'Foi ba name bang a'ten ei bahut, sobo sano' alang foi am. ¹² Med, il luling e'a'ra name beng den mi nen, fede' burang e'far hoo miho, name beng den anife, med nameno' a'nai homi, honie sari aiho ani puin pi il luling med nene." ¹³ Suoi e'dun honi hee, Petrus med Yohanis baroc nene, no' supi a'holho name piralo hoo sakola nene, nahul na taandi sah, horo supi sahoir, no' supi a'holho, name pir alo hoo Yesus a'ra ham ham lame toham so. ¹⁴ No' supi dun hee, ai birang am ho, Petrus med Yohanis a'tote mitufeh horo hee, supi u tetang sah. ¹⁵ Sobo supi Petrus med Yohanis a'how majilis lafining homi hel sam horo hee, supi sara gahain, ¹⁶ ubangho, "Nabafe maa pi panen med name pir alo hoo a'raham? Fede', na utahoir o'karang nu supi panen, name tofang Yerusalem mi hoo dun a'hol, honie pi ukalufe sah am. ¹⁷ Honi sobo ari na hoo name a'nai homi mate lai e'fe so, honi hee ma pi supi e'riing honie, sari name aniho supi haai foil umateng name en ma'eh nene." ¹⁸ No' honi hee, supi Petrus med Yohanis o'lofe, supi parenta name aloho en honie, supi haai Yesus ani puin name a'fom a'pahang nene. ¹⁹ Sobo, Petrus med Yohanis supi a'ra mateng, "I a'tining o'pol a'muj, taroso Lahtal o'dun miho a'bul, iei horo alepang Lahtal eiho e'mota? ²⁰ Fede', niri hoo sah na an anba ni a'hol ma'eh am horofe ni umateng no'." ²¹ Horo supi Petrus med Yohanis e'riing e'fail eh sobo, supi rasul pir alo hoo a'how sam fede' name pir alo hoo supi med sapiri mife honiho, o'se'bur supi lap ahol nene, no' honi hee, naba a'ra am ho, name tofang Lahtal ani utarain. ²² Fede aiba birang medam hoo, o'urho tun erut a'lihing am. PETRUS MED YOHANIS SABOR DIAIL BARBA O'UDUME HAMHO O'LAP SAM ²³ Name supi ad no', Petrus med Yohanis sam so diailbar a'bung, na ernuba imam hinug o'kapal med tumo'bar panen supi a'rahamho, supi umateng. ²⁴ Med, supi o'tenang el bar mang naho ma'eh horo hee, supi somnu samang a'tel Lahtal a'ra mateng ubang, "O..Tuhan, Ariso burang, faai, sei, tang med o'na ernu taho a'ten, ²⁵ umateng Roh Bolang a'lai, Oname baleta ei Daud, ni bap ni bale atmi afu'mi sa ubangho: 'Taro'ni sofe bang beng loil a'main, med name tofang na o'a'ai e'dun? ²⁶ Afen ernu pali' mate ta sari taro' med aneng ernu sari ta'unung, supi Lahtal lafang med aiba sa satang ubaring amho lafang.' ²⁷ Fede', o'a'bulta honi hee, bang hooro mi ta'unung amfe, o name baleta bolang a atang tabarig Yesus ho lafang, sariho Herodes med Pontius Pilatus, med bang ernu beng, med Israel hinung foilta, ²⁸ honie ernu turlo A'tangmi med O'tanut miba o'sel meng am ho, panen dai hee, o'utub sotur a'ra. ²⁹ No' fed hoo, Tuhan, supi o'a'riing fail bune halaho e'dun, no' hee, niriba O'baleta ei hoo, kufa' nien honie, ni O'fompa' umateng ni haai baroc, ³⁰ Atang niri ta a'hir, sariho birang buuin, utub ernu, med na utahoir ernu, oname baleta Bolang Yesus ani mi ni panen honi hee, sa a'ra." ³¹ Med, supi aome no honi hee, supi e'lemeba supi mimieho ladidin, horo Roh Bolang supi tahel, supi fompa' umateng sobo baroc nene. NAME UDUME ARAHO O'FETANG ³² Supiba o'udume a'raho sari ta'unung somnu, med lamannu. Namenudi e'ubang, nei na ernuho na nona honi nene sobo, na ernuba supi a'ri'an ho, supi barpi uaneng, barpi supi o'na. ³³ No' hee, rasul hinung barpi tutung kufa' med, supi Tuhan Yesus sofetang ho umateng, fede' na'hol dil ma eh mate a'ra supita. ³⁴ Supi a'nai homi name den e'kurang bo' nene, fede' name o'faai a'ra, o'bang a'ra nunho, supi fail, o'seng fit ho' ³⁵ rasul hinung e'fa selmi meng, no; honi hee, supi sedalam sari'an, supi o'kurang bo'ho a'ta ain, ³⁶ Yusuf, Lewi o'name, Siprus o'fol o'heb, saridi rasul hinung o'lofe, med Barnabas, o'lel hee, 'loil asal ai,' ³⁷ supidi faai fail, o' seng fit ho' rasul hinung e'fa sel mimeng.