RASUL HINUNG O' SURA' ASEL MATE O TOW MI
1
Selnumi, Petrus med Yohanis sam Gareja bang leam, ho a'ra ham aome o'sel od tow fed hel.
2
Horo ai lotenu dai o'fo om mi hee tu'ung amho, name a'sap ho'. Dilel a'ri'an supi a'ra ho' Gareja se'ar ani Tapano' ho mi a'mihing honie, name Gareja bang lemid sa a'bang na bang.
3
Sa dun hee, Petrus med Yohanis dele Gareja om lemid horo hee, sa supi a'bang nabang.
4
Horo, Petrus, med Yohanis, a'ra mateng, "Niedun."
5
Ai tu'ungho sa Petrus med Yohanis e'dun, sa udume maa name alo naden en.
6
Honi sobo, Petrus ubangho, "Falofang hir med lahung afel den e'a'ra nara nen, sobo nabaso a'ra nabung, horo na med en. Kristus Yesus, Nazaret pali' o' name, horo Ani puin, honife ahir tohe, lame!"
7
No hee, Petrus a'tang tani mipuin a'tel a'tuhuin. Mang homisari aiho e'fa md e'fel kufa'.
8
Mang homi aiho toh lame do' lahel. No'sa Petrus med Yohanis a'ra ham ham Gareja bang om lemid, sa lame toh do' lahel Lahtal ani utarain.
9
Nameno' barpi dun a'hol sa lame toh Lahtal ani utarain eh,
10
no' supi a'hol sari ai horoba, sel a'ri'an hee, Gareja O'se'ar ani Tapano' homi mih nabang eh. Horo hee sari naba a'ra ai tu'ung a'raham ho supi usahoir, supi o' a'tino' bit.
PETRUS NAMENO' TOFANG A'RA MATENG
11
Aiho, Petrus med Yohanis a'puin tufeh hee, name tofang te'eng bang om hataden ani Salomo ei homi afeng, fede' supi sahoir.
12
Petrus dun supi a'hol sa ubangho; Hoi. Israel hinung, naba eife na hoo uihoir, eme i niedung mang fede' Ni niei kufa' med niom a'bulfe puin ai hoo a'no' lame no' honi?
13
Lahtal, Abraham, Isak med Yakob o'Lahtal, pi bap pi bale o'Lahtal, Sa so name a'how a'titing ei, sariho Yesus Sa a'foh a;tel, mong Pilatus o'se'ar mi, sa a'no' il ubang.
14
Honi sobo, Ai bolang med a'bul ho i bahut, honie nameba name a'mine o'name horofe i bang honie name ad a'tain med iere eng.
15
med fetang aselho i a;mine, sobo name min a'nai homi Lahtal sona a'no' fetang am. Na hoo ei a'raham, niri hoo dun ta'hol nifel ta maeh.
16
Med Ei Ani femi udume sano' pilang mate, sariho Yesus ei ani horofe puin aiba i e'dun eh med i a'pong a'hol hoo, a'no' kufa' a'no' ara. Med udumeba Aiho mi horofe, birang bu'uin med ai iraham tufeh hoo en.
17
No diail bar, fed hoo Na a'hol, sariho i a'hol nene ei a'lol na panen, mang fede' name iri bu'ang tofang panen eh honi.
18
Honi sobo dai ehta, Lahtal ubang nabi tofang at a'lai, sariho Kristus Sa uil min, maar mahip a'holfe, honiho, Sa a'no' an am.
19
Honife, iom a'fome ibor, honie idoc tofangho name luh,
20
honie il luling o'sel Tuhan puin ho' honie Kristus ba Sa u i'nung med iere eng amho Sa tahow, sariho Yesus,
21
hoo Surga di med sam ernu turlo ano' no' a'no' ham o'sel homi, mang fede' Lahtal zamang turmi umateng nabi bolang tofang a'lai am honi.
22
Musa ubangho, 'I Lahtal ho, Sa uil nabi nu a'no' fetang med iere eng, mang fede' na a'ra inai homi nano'i diail nu honi. Na ernuba sa ubang am ho, i uil uil ma'eh alepang.
23
Med sa uil a'raho, nameba nabi hoo ei ma'eh neneho, name bang ernu o'a'nai homi a'no' suhuin.'
24
Med, nabi ernu barpi umateng, o' aainangho Semuel, med o' a'taain nun hodi, supi sel hair hoo umateng.
25
Iri horofe, nabi tofang ho o'fol o'heb, med mong Lahtal i diing i bap a'ra sel meng paha' homi, Sa Abraham a'ra mateng ubangho, 'Ofol oheb horomi, fol heb tofang pali' mate taho tofang luung.'
26
Lahtal so name baletaho a'no' fetang, Sa sotur tahow ien honie, sa tofang luung ien, no' sa panen puin nameba inai homi nasah ernu panen homi sabor."