¹ Pentakosta o'selmi, supi barpi hamham ara e'leme numi. ² Seh seh supi alepang hee, nanu da'ud mang fede' hamoi mate toh honi, nanu da'ud mateho, ara bang om supi mimi eh ho mipir. ³ No' supi dun hee, nalel mang fede' a'fail a'libung honi, hel supi tahel barpi. ⁴ Horo hee, Roh Bolang supi afeng, supi mateng ernu ubang sari hoo, Roh Bolang so med supi en honie supi umateng. ⁵ Sel homi,Yahudi hinung a'ra Yerusalem homi, sariho, name om a'bul bang ernu burang e'far ho barpi a'ra homi. ⁶ Sari na da'ud ho maeh horo hee, name tofang ta'unung, supi ho' supi omupir fede' supi ho' alepang hee, name bang om miho, supi o'matengfe bit eh. ⁷ Name ho' dunho, sahoir o'karang, supi ubangho, "Supi mateng eh hoo, barpi Galilea o'name eme aai? ⁸ No'supi foil ubang; Taro' nife, telemeba mi tafain nun horofe, o'mateng pa' supi ubang eh? ⁹ Piri hoo Parti o'name, Media med Elam o'name, Mesopotamia o'name, Yudea, Kapadukia, Pontus med Asia o'name, ¹⁰ Frigia med Pamfilia o'name, Mesir med Libia pali'ba Kirene a'bungho o'name, Roma o'name ho'nun, Yahudi hinung, ¹¹ Kereta med Arab o'name. Pi alepang hee, Lahtal o'karesang mate horofe, supi tei mateng mi ubang eh ho. ¹² Supi sahoir med omupir, supi ubang, "Hoo barpi o'lel naba?" ¹³ Honi sobo, name beng supi o'asal, no' supi ubang, "Supi anggur na am fe hufang tabur so." PETRUS NAME TOFANGHO A'RA MATENG. ¹⁴ Mang homi, Petrus sobeng bar pir ernu falingnuho a'ra sahir toh, sa samang a'tel nameho a'ra mateng ubangho, "Hoi, Yahudi hinung med iri Yerusalem mi sobarpi, no mateng pa' hoo e'dun no'no', honie a'hol. ¹⁵ Fede', name hoo e' tabur labow mang fede' itanut mieh honi nene, fede' dai lalami od tow, ¹⁶ sobo sari horo e'iba, Nabi Yoel ubang eh: ¹⁷ 'Med, sel o'a'mujmi u'il ara, Lahtal ubangho: Na No Roh med nameno' ernu ta. Honie, i aibar mi ob mi lote natafuning a'no'lel, med o'aibar a'for lafat dun na'hol, med tumo'bar apai niing tofang a'hol. ¹⁸ O'mitata, No name baleta mi ob mi lote, sel homi Na No Roh med supita honie, supi mateng lurung puin na tafuning a'no' lel. ¹⁹ Med, Na utahoir tofang burangta med supi e'tub, med tom upir tofang ara pali' mate ta, fui, afail med tafiing a bano'. ²⁰ Lahtal o'sel o'hair mimate milafining ho dai eh hee, fed eng paka rumpa' med ul sano' fui. ²¹ Med nameba Tuhan a'ni ulofeho, il luling med."' ²² "Hoi, Israel hinung, mateng pa' hoo alepang. Yesus ba, Nazaret o'name ho, Lahtal med inai homi ad, natahoir med o'utub tofang Lahtal med inai homi utub Sarife a'lai, barpi i a'holam. ²³ Yesus hooro Lahtal o'tanut a'ta ain, Sa utub med Sa a'hol honie, dai ehta Sa a'lorang i med arap ti ta haleng a'mineho, name om sah doro palel a'tang fe a'lai. ²⁴ Honi sobo, Lahtal min o' maar mahip om homi a'no' fetang, Sa ano' il, fede' min minho ei kufa' Ari med uaneng sah. ²⁵ Fede', Yesus ei a'raham Daud ubangho, 'Na a'hol Tuhan a'ra nahoimi seimasing, fede' Sa a'ra no tani lol homi horofe, naba horodi nabob sah. ²⁶ Horofe, nom bad herang, med nalibung dal orang. Nafah nahir hodi udume om mi, ²⁷ fede' no laman A e'med name min o' pali' mi ad nene, soeme Name Bolang a;fah a;hirho A mang e'dun eh honie supi dun min a'hol nene. ²⁸ Se'bur fetang A u nara mateng am. A Apongfa' ho puin nano' bad herang mi a'lihing.' ²⁹ Di'ailbar ernu, na o atino' bit puin ira mateng, sariho pi diing pi bap Daud ei a'raham sariho sa min a'pot, no hee, o' dere sodai a'ra tara sam fed hoo mimeng. ³⁰ Fede', sari hodi nabi nu, med sa a'hol Lahtal a'pa ha' bel basa tameng honie, Daud o'fol o'hebho, pirnu med o'kadere mateho ta a'mihing. ³¹ Horofe dai ehta Daud na hoo a'hol; Yesus sofetang ei a'raham sa ubangho: 'Name Ai hoo e'med name min o' pali' ta a'no' lafining nene, med o'bo' ho dun min tabang a'hol nene.' ³² Sari Yesus hooro Lahtal a'no' fetang, med niri hoo, barpi sari na hoo ta a'hol ta ma'eh. ³³ Horofe Lahtal satang tani puin a'tel a'no' lafining no' hee, Roh bolang ei a'raham upaha' Sa Somang a'bung med a'ra hel am, o'ba idun a'hol med o'ba i ma'eh am ho sobarpi. ³⁴ Fede', Daud e'mid Sorga mi nene, sobo sa ubang, "Tuhan sa no Tuang a'ra mateng, 'Natang tani lol ho mimih, ³⁵ sam ofalefang ernuho, Na med E om pilang."' ³⁶ "Honife, seilame eh sa Israel bang sobarpi a'hol a'bul, sariho Lahtal aiho a'no' Tuhan med Kristus, horoba Kristus ba, i med arapti ta haleng." ³⁷ Supi na hoo ualepang hee, supi om tuting, horo supi Petrus med rasul bengho a'ramateng, "Diail bar, maa nabafe ni panen?" ³⁸ Petrus supi a'ra mateng, "Iom a'fom honie iri an Yesus Kristus a'nimi sei tuling tow med, honi puin idoc tofangho uampo, no' honi hee Roh bolang o'na' hol dil maeh ho imed. ³⁹ Fede', paha' hoo iereeng med i aibar med nameba dai let, o'tofang den hee, maa pi Lahtal supi o'lofe am." ⁴⁰ Med, mateng beng tofang, Petrus sedume toh umateng, sa supi o'lofe sa ubangho, "Hol palel fangnu hoo el te eng puin i bo' mateho il!" ⁴¹ Nameba Petrus o'mateng pa' alepang medho, name a'foil, horo sari selhomi supi o'tofang foil ta maa rib tow. NAME O'UDUME HAM SARA TA'UNUNG ⁴² Supi rasul hinung o'fom pa' om homi som tining, supi somnu roti a'hid sedalam. ⁴³ Name tofang baroc banibung, asel na utahoir med utub tofang rasul hinung o'panen homi a'ra latel. ⁴⁴ Nameba o' a'tino' ubang amho, sara ta'unung barpi, supi o'na ernuho, supi ham ham uaneng. ⁴⁵ No' supi so kafac nunho fail, no' hee supi name e'dalam o'kurang o'bo'ei a'taain. ⁴⁶ Sel a'ri'an supi ta'unung ham ham supi somnu mong Lahtal o'bang om mi, supi roti a'hid bang sel tana ap. Supi som a'bul med bad herang puin na'de. ⁴⁷ supi Lahtal ani utarain, name tofangdi apang supi uno'. Sel a'ri'an Lahtal supi o'tofang uta sei masing, sariho nameba il luling medamho sobarpi.