RASUL NUN O SURA' ASEL ( 27 ) ER ALO FALING ITITO
1
Mang mateng amuj bite ni uil ted Italia leam, supi Paulus med sapiri o name oin nu alorang fa soldaj lubung nu ani Agustan, ho o mate ba ani Yulius faleng ho en. ni mid pelang mate nu ta mong Adramitium mi ho', horo dele lame mong loiy ari'an Asia o tut pa' laiy ho ata'ain. Aristarkhus, Makedonia hinung Tesalonika mi ho' di nira ham-ham ted.
3
Sel o ata'ain honi he'e ni ho' Sidon mi. Yulius som abul puin dun Paulus ata' ain, sa Paulus ahow so tenang el bar o leleng lol honie Paulus o na an-an u lame toh.
4
Hemomi, ni foiy ted lame Siprus arian asel hamoiy niri lafang.
5
Ni mang ted Kilikia med Pamfilia o tut pa' laiy ho a laiy no', Mira ba Likia ho mi.
6
Hemomi, Soldaj o mate ho kapala mate nu Aleksandria mi ho' ho ahol, supi ted Italia leam bit, horo sa nira fa kapala ho ta.
7
Ni pa-pac ted tareng nu alo om mi, ni nira ba-bat so sam Kindus mi. fede' hamoiy e rupa nene horo eiy fe ni e lame let nene, ni ted Kreta o tut pa' lol mong Salmone o tang tapor araham sam.
8
Ni ted tang tapor ho alaiy di malo bi' fe sam eleme nu ani aloiy rupa bi', ba mong bang mate Lasea abung ho mi.
9
Fede' niri di ahol, sel o mi lafoh ho mang nilaiy am, honie sel ho'o araham tang lol lame ho o sah ara, asel Yahudi hinung o sel atep ho alaiy am, horo Paulus supi afom,
10
supi ara hu'tang ubang ho, "Diail bar, na edun he'e pi ted ho'o, o sah e med kurang bo', malo mate uil taru pa', ha' aiy bite na an-an kapala ta solo nene sobo pi bo'-pi laman di."
11
Sobo, soldaj o mate ho, Paulus o mateng pa' sa e udume nene, sa kapala o aneng med aiy ba kapala puin eh horo fe sa mi u dume bi'.
12
Fede' sel ma'ab om mi he'e, loiy homi teleme med e no' nene, name lafoh eiy inung ho, o mino' bi' so he'e sari loiy homi ted sam Feniks o hir, loiy nu mong Kreta mi, ba o seh he'e mong barat daya med barat laut ara ham, fe hemoro mi seleme med sel ma'ab om homi. Hamoiy mate Paulus o kapala ho arupa'.
13
Ho' araham hamoiy bala-bala selatan mi suypi apu ho', supi tanut bite ahal supi ho', eleme ba supi u tanut eh ho mi am so. Fe, supi jangkar abi'ing horo he'e ted Kreta o tut pa' laiy ho lol so lame.
14
14 Honi sobo, e em nene honi he'e, hamoiy orupa bung oiy mate, ba o ubang ho Euroklidon, mong nuh ho mi toh ma.
15
Ho araham hamoy ho ni kapala lafang honie niri di lafang fa sah, ni mang nitang atel sohonie, ni kapala ho solo ladimang labor.
16
Ni farufing pali' ka'aiy ba ani Kauda ho ata'ain sam, ni malo mate puin so ni kapala o skoci ho ano' il.
17
Kapala o name mang skoci ho atel kapala ta no, supi hey nun ba puin sari tolang eiy ho med puin kapala ho apec ano' kufa'. asel supi baroc Sirtis mi dotong, supi Kapala o na an-an ho ara hel honie sohaic ta sa supi o kapala ho bob adimang abor.
18
Sel o ata'ain honi he'e, fede' bung oiy mate ni dimang nibor okarang, horo he'e name nun na an-an kapala ta ho ebang feuw.
19
Sel o mitow mi, supi satang fe puin kapala o na an-an nun ho few.
20
asel fed em ibing nun e ara nene tareng den om homi fede, bung oiy e ka'aiy nene ho nira ham ho', ni udume taro' ni e il lulung med fe ho ha'aiy oh.
21
Asel name lafoh ba sam em mam ho e namej puin nene, Paulus supi o ham-ham ho mitoh hu' tang ubang ho, "Diail bar, o abulta i no fom pa' ho ata' ain honie ha' aiy Kreta mi ted sam e, honie sa ha'aiy o sah tari' med kurang bo' ho oni ho ta rupa' e.
22
Sobo fed ho' o, na ido-do honie i so iom tahang eh asel i naiy mi ho, i laman di e suhuin nene, sobo bite kapala so suhuin fe.
23
Asel, dil pana, Lahtal O malaikat, ba nano' eiy med na nona seiy ani u tarain eh ho, ara napong fa' Araham tufeh,
24
ubang ho, 'Ha' aiy baroc, Paulus. A musti Kaisar araham toh. Edun ema, Lahtal om no' bi' fa ari e med name lafoh ba ara ted eh ho ara ham.'
25
Honin fe, diail bar, iom ho tahang asel na Lahtal om mi udume bite barpi ho uil ara mangfede' u nara hu'tang am honi.
26
Sobo, pi musti nuh nu ta dotong."
27
Honin sobo, pana o ernu faling ut mi, ni daiy Adria o tang laiy homi ladimang labor eh, sa ma' tun ham o pata' ofah, Kapala o name nun eiy om bite supi hoh ta'at abung am so.
28
Supi foey ara hel edun o ul he'e dap er alo. ho araham supi foi lado do fa apite'ta, supi foiy foey ho few horo supi ahol bite seiy ho o ul dap ernu faling ifihing.
29
asel ni baroc ahal pe' foey mi atang, horo supi jangkar ut buritan mi ara hel no' ni a'ome hunie sa hanoang dil lel.
30
Honin sobo, kapala o name pirden ho satiting hunie kapala el te'eng, fe supi sekoci ho arahel tang mi e mi aba-aba jangkar nun ho arahel kapala eden barpi,
31
Paulus soldaj omate med o soldaj nun ara hu'tang ubang ho, "Mangfede' name nun ho e kapala ho'o ta nene i e il luling med sah."
32
No' horo he'e, soldaj nun sekoci o hey ho tareng honie sohaicta sa ted sam.
33
Ho araham dele fed po' madong bit, Paulus supi abang barpi hunie namej den med, ubang ho, "Sel fed ho'o tareng o ernu faling ut, i mang labi'ing bi honie i malihing di tahang e i e nanu di ade nene.
34
Honin fe, na ibang hunie namej den med ma il luling i fetang ho araham. Asel, ari' nemang i elafung mi di e i anaiy homi suhuin nene."
35
Mang naho bit no' , Paulus roti med supi barpi apong fa' araham homi o mahen tahow Lahtal araham, roti ho ahi'abutung, horo he'e ade.
36
Horo, supi barpi di om dume no' supi di na'ade.
37
Niri ba kapala om mi o lafoh rat alo er itito faling talang.
38
Mang na'ade nito' in no', supi gandum feuw tang lehel hunie kapala ano' filung. kapala tama'ain bo name ba kapala ta ho barpi il luling med
39
Ho araham dele fed sah, supi e ahol nene bite ta'at ara, sobo supi om mate nu o tut pa' ara horo alol dun, mang fede' supi edun no' he'e, supi u sofo honi e hemomi kapala dotong.
40
Horo, mang jangkar nun ho amuj no', supi med tang om ho mi feuw meng so oleh, e supi elet, so sel ho araham horo , kemudi o hey ho supi alorang honie, layar kapala apong araham ho aramid e hamoiy supi fit sam tut pa' ho ta.
41
Honin sobo, kapala tang alo mi sahol eiy ho mi pe' foiy tapang horo he'e kapala homi dotong. kapala o habuden nami atang e od farufing sah, o anaiy mi kapala o amot tama'ain asel bob mate tapang.
42
Soldaj nun ho supi o gahain nu ara, taro'ni e name nun ba tahang om mi ho amine, hunie namenu di ha'aiy arong sari fit te'eng e.
43
Sobo, soldaj o mate ho, eiy tanut huni he'e, Paulus ho ano' il luling ha'aiy amine e, horo sa supi o gahain ho u hap. Sa parenta honie name nun ba arong no' ho ahow sotur do' arong ta'at leam.
44
den he' e tong papang ta, den honi he'e na an-an beng ba kapala mi ho ta. Honin horo fe, name no' barpi il luling med sam ta'at ta