RASUL NUN O SURA' ASEL (28) ER ALO FALING TURLO
1
Ni mang il luling med na ho alai no', ni ahol bite nuh ho ani Malta.
2
Sari pali' oname ho om no' ma niraham empir. supi afaiy tub nipong adang niri med barpi asel ho araham noiy di her med olamail di ma'ab.
3
Ho araham Paulus di ti da'arang ta'unung afaiy tameng eh, asel afaiy o bune mon ari'ing nu na om mi hel horo Paulus atang mi la' iling.
4
Ho araham pali' ho o name edun binangta ari'ing ho Paulus atang ta hil eh, supi u sara hu'tang ubang ho, "E u panep ne-neam, name ho'o, name-name amine nu so. Masiki sa tang mi il luling med am, sobo abul ahal eiy araham ho, sa e fetang nene."
5
Sobo, Paulus binangta ho bakek afaiy om lehel, sa e o bah em ma'ar di med nene.
6
Name nun ho supi eiy om bite, Paulus ho araham horo ma' a'obe ha'aiy he'e, ol min so honin. Sobo, supi ada nang em no', supi e nanu o ahal di edun fa araham nene, supi o tanut foiy sabor bite Paulus ho dewa so.
7
Sel nu ara ham, eleme ho mi ho, fa'aiy aneng kapal ba nuh ho ta eiy, sari kapal ho ani Pubilius, horo ni pong adang niri med, bala lamang puin niah tareng tow om ho mi.
8
Ho araham, Pubilius omang ho de' ta tar eh asel bune taso'. Paulus ho' edun ara a'ome, satang med aiy ho tameng horo he'e ano' birang.
9
Sari na ho mang ara no', name beng nun ba nuh ho ta mode eh hodi ho' Paulus abung sano' birang.
10
Supi di foiy niri u ada' ahol bi', fe ho araham ni mang ted bit, supi na an-an ba ni arahuil fe ho sadia nie re'eng. PAULUS BANG MATE ROMA ARAHAM SAM
11
Mang ul tow ho alaiy no', ni kapala nu Aleksandria mi ho' ho ta ted, ba nuh ho mi dotong syel ma'ab om homi Dioskuri fe puin ano' so utub.
12
Mang sam Sirakusa mi, ni hemomi nieleme med tareng tow om mi.
13
Mong hemomi, ni ted tut ho ata'ain sam Regium mi. mi dil lel hamoiy selatan mi ho toh no', sel o ata'ain, ni sam Putioli mi.
14
Hemomi, ni diail bar ba o udume niy ara ham ho ahol, horo supi nidaiy homi nieleme med tareng itito om mi. No' horo he'e, ni sam Roma leam.
15
Diail bar ba ni udume ham hemo mi ho, ho araham ni hamoiy ma'eh, supi hemomi ho' Forum Apius med Tres Taberne mi honie nihol. ho araham Paulus mang dun supi ahol, sa mahen tahow Lahtal araham horo he'e om hele dume med.
PAULUS BANG MATE ROMA MI
16
Ho araham ni mang sam Roma mi, barpi u inung Paulus solo seiy seleme nu mi med soldaj nu ba Paulus buang eh ho ara.
17
Mi tareng tow honin he'e, Paulus Yahudi hinung homi ho, o kapal nun taunung, horo supi mang ta'unung no, sa supi ara hu'tang, "Diaiyl bar nun, masiki na e naden panen bang pali' eme pi bap bale o hada damuhuin ho lafang nene, sobo supi nalorang orupa Yerusalem o name tahang om mi nu honi, fa Roma hinung atang om mi.
18
Ho araham supi nari parasa no', supi om ho nano' il, asel na o ahal nu puin nari hukung namine eiy fe ho ha'aiy.
19
Honi sobo, asel Yahudi hinung nun om tarofe, na so mi Kaisar o de' ta parakara, ha'aiy honie bite ma no bang pali' lafang eiy ho no' ahal ara.
20
Fe, horo eiy fe, na pe' bang e ho' edun med ara hu' tang, asel name na'ol heiy ho'o puin napec ma Israel o udume eiy araham."
21
Horo, Supi paulus aramateng, "Ni e sura' ba eiy araham Yudea mi ho' ho med nene, honie diaiy bar nun ba i udume ham ba ho' homi ho, e hamoiy em o sah ba a panen ho bit daiy.
22
Sobo, ni om eiy maeh umang, eiy om taro' ni ma ong sekte ho' o eiy araham, ni ahol bite mang taromi name na ho' o lafang."
23
Ho araham supi mang sel nu ale' Paulus en no', supi ho' Paulus eleme mi olap ho', name bar mate ho ara. Mang lalami ta sam dil pana, Paulus o lel ho bit supi araham foiy Lahtal emele e lafeng ho u hu'tang ano' taro' ni e Yesus ho supi o atino' bit, mong Musa o Hukung Taurat eiy ho araham ho' ma nabi nun o sura' homi meng.
24
Name pir den ho o atino' bit ma na ba Paulus bitam ho araham, sobo o beng ho apain sah e o atino' bit nene.
25
Ho araham supi e u sara sofo nene, Paulus mang na ho'o ubang no' supi sabor, "So abul so na ba Roh Bolang u i bap bale ara hu'tang Nabi Yesaya lol,
26
'Sam bang pali' ho'o mi e ubang ho: I ma' maeh ham, sobo i e pahang nene, med i ma' edun fe so, sobo iom so upir.
27
Asel, bang pali' om ho' tapah am med afel na alepang eiy hodi tarofe. Supi se'faiy utel am.
Honie, supi ha'aiy se'faiy puin dun e, safel puin na ma'eh e,
som puin na pahang hunie sadimang.
Horo he'e, Na supi ano' birang.'
Yesaya o sura' 6:9-10 (asel talang o bang ka'aiy tieiynu sam ernu)
28
Honin fe, sohoni e naho' o, i ahol bite il luling ba Lahtal mi ho' am ho' o, u bang pali' beng nun di ara hu' tang am, hunie sa supi so u alepang."
29
[Paulus mang mateng pa' nun ho bit no', Yahudi hinung nun sanaiy homi tanut pa' o salahain lafoh puin sabor.]
30
Paulus bang ba sa sona mana ho mi seleme med tun alo om mi, med name ba ho' abung nun ho, sa apong adang med barpi,
31
Bo Lahtal eleme elafeng di u maring eh, med som abul puin sati-ting gur pel Tuhan Yesus Kristus eiy araham ho ubang sobo o u alang eiy fe ho ha'aiy.