RASUL NUN O SURA' ASEL ( 26 ) ER ALO FALING TALANG
1
Horo, Agripa Paulus ara hu'tang, "Iri ho ihow hu'tang iri u alang." Horo he'e, Paulus satang aha bu hu'tang sari u alang
2
"Ma afang rat nun ba Yahudi hinung u nano' ahal eh ho, na ukuru he'e na untu, Afen agripa, asel fed ho' o na uil araham hu'tang nari u alang,
3
mi ta-ta fede' ari horo Yahudi hinung o anaiy mi asala med na o ahal nun ho ahol. Honin fe na u abang, om tahang e neiy u alepang.
4
Yahudi hinung no fetang daiy afor ta ho ahol, ba mong o a'ai nang mi no fetang horo mi oh, ma no bang pali' o anai ho mi med Yerusalem mi.
5
Asel nari ho'o supi nahol em am, mang fede' supi inung, supi no fetang, mong lubung la'ol mi, o sah karang ernu fe u tu-tung gur pel, ma teiy agama ala hain horo fe na ata'ain eh ho bit, nari ho'o Farisi hinung o fetang fe mi.
6
Fe fed ho'o, na ho'o mi toh honie no' abul no' ahal lap, asel no udume ho paha' ba Lahtal panen ara med pi bap bale mi.
7
Paha' ho' oro sano' o udume ma pi bang pali' lelang ernu faling alo sa mimeng em ha'aiy, horo eiy fe supi som abul-abul puin dal orang, afoh atel Lahtal araham dil lel, dil pana om ho mi eh. Fe sari ong udume ho' oro Yahudi hinung o' ahal med nari tameng eh ho, o Afen.
8
Mitaro'ni eiy fe Lahtal name min ano' fetang bite iom upir?
9
Horo eiy fe, neiy nom bite na uil na lafoh ahal panen ma Yesus Nazaret mi ho' ani lafang.
10
Fe horo na Yerusalem mi panen. Na e name bolang nun mang med sapiri solo mi nene, sobo na mang imam-imam o lafung abung o u nahow eiy ho med, ho araham name supi hukung amine bit, na u sofo.
11
Horo, na seiy a'ome bang arian di mi supi hukung masing, med na o se' bur lap taro'ni e, supi ahow ebit eng el. med nom ari' ing fail bi fa supi araham, na supi beh par, mita - ta sam mong bang pali' beng di mi."
PAULUS YESUS ARA SAHOL HO U FALENG
12
" Fa sari na ho eiy araham hodi, ho araham na lame sam Damsyik leam om homi, na ba imam-imam o lafung u nahow med u baleta eiy ho u lame.
13
Fed buir mi araham, kaey o Afen, na seham lame eh he'e, na lel nu burang mi hel ho edun, mi lele fed eiy emota, horo o lel hel nari e med name nun ba nara lame eh ho fading.
14
Horo, ho' araham ni barpi ol hel fa' aiy ta dod oh, na alepang he'e amang der nu Ibrani o mateng mi nara hu'tang ubang ho, 'Saulus, Saulus, mi taro'ni eiy fe i Nari asara? Ganasing bi fa ara ham mang fede' a Lahtal lafang.'
15
Horo na u ta'ain, 'Ari ho ano, Tuhan?' Horo he'e, Tuhan no mateng abor, 'Nari Yesus, ba i asara eh ho.
16
Sobo, ari bakung toh e'fa ho puin toh. Asel, Na nari med etub am, ma tanut nu ho'o eiy ara ham, honie Na a how karesang baleta med na o ahol ma'eh eiy ho u hu'tang, e fa na o ba a edun am horo solo mi nene, sobo na o ba ma' Na med etub hodi.
17
Na uil o bang pali' ho' o mi ano' il med bang bali' beng di mi, ba fa supi araham Na u ahow,
18
honie supi e'faiy during e sa supi sabor pana mi ma lel lema med setang o malang homi ma Lahtal olap, honie sa supi doc ahal o u ampo ho med, no' ma name ba udume ma Nari mi o bolang med am ho, o anai mi seiy med.'" PAULUS SO KARESANG BALETA U AFETANG
19
"Honin fe, Afen agripa, ha'ai bite sorga o tub maring ho na e ata' ain eh honi nene,
20
sobo, o a'aiy na-nag mi, supi mong Damsyik mi ho na u emaring, no' Yerusalem mi med Yudea o bang pali' mi' alol barpi, ma bang pali' beng di mi, hunie supi musti safom sabor ma Lahtal ata'ain, e panen aten o no' fe akala mang fede' supi safom am honi.
21
Honi horo eiy fe, Yahudi hinung Lahtal o Bang mi napuin med supi namine bit u latitil.
22
Sam fed ho o mi, na Lahtal o u alang med am honie na ho o mi toh hu'tang, fa name o ka'aiy em name o mate nun araham bo na e nabeng u hu'tang nene, sobo naba nabi nun med Musa u hu'tang am ma na ba ma' uil ara fe ho ara ham,
23
bite ma'ar ma hip uil Kristus aru pa' med bite, o mi asel he'e, a ainang name min o anai mi fetang sahir toh, Sa lel no' u maring fa Yahudi hinung eme bang pali' beng di araham." PAULUS SATI TING AGRIPA OM ANO' DUME
24
Paulus daiy na ho u hu'tang sari u alang eh he'e, Festus hu'tang amang der lafining, "Paulus, a tabur am! a mi na' ahol lafoh bi'am horo eiy fe o tanut e' abul nene am."
25
Sobo, Paulus mateng abor, "Mate Lafining Festus, na e tabur nene, sobo na na o abul med mateng pa' o tanut lefa eiy fe na u hu'tang so.
26
Asel, Afen na an-an ho'o ahol horo eiy fe nari di hu'tang fa araham ho u tutung. Asel, no udume ho bite na an-an ho'o nu di sa dun ata' ain apong adang suhuin nene fede' na an-an ho' o e mong bang pali' kapuh fe mi ara nene.
27
Afen Agripa, ahal a nabi nun udume so? Na ahol a udume."
28
Afen Agripa Paulus ara hu'tang, "Sel to'ang om ho'o mi ho, a nom ano' dume nano' name sarani am."
29
Horo, Paulus mateng abor, "Na Lahtal abang honie ber em pac, e ari solo nene, sobo name barpi ba fed ho'o no hu'tang ma'eh ho, mang fede' nari honi no', seiy lal na'ol o heiy ho oro."
30
Horo he'e, Afen toh. sobo Gubernur Bernike med name barpi ba supi ara mieh hodi.
31
Horo, supi bang om ho elet eh he'e, supi sara hu'tang ubang ho, "Name ho'o e nanu di panen nene ba pi ara meng fa hukung amine eme med sapiri mi."
32
Horo he'e, Agripa Festus ara mateng, "Name ho'o pi ad no' am mang fede' sa e mid Kaisar o de' ta para kara nene.'