RASUL HINUNG O' SURA' ASEL MATE ERALO FALING UT
1
Mi tareng ifing, Imam mate Ananias, tumo'bar med name mateng ei pirnu ani Tertulus sipi hel. Sipi Gubernur a'bung Paulus a'taain te'eng.
2
Paulus o'lofe, Tertulus mateng Paulus o'ahal lap ubang ho, "Mate, ni no'ham tining talaj fe a'hol, mad saten sahome ernu ma bang pali' a'raham fede' o'ukuru akala femi Mate,
3
ni med puin panen tofang mi, mong emele a'rian sariho mahen tofang om mi, Somimate somilafining Feliks.
4
Honi sobo o'sel ano' oh e feho, na om no' bang, a niamang u alepang, e lufang nene.
5
Fede' ni sam a'hol he'e, sari ai ho'o nasah panen, loil a'maain a'ra latel Yahudi tofang ong pali' mate taho o'a'nai homi. No' he'e, sari ai ho'o, name sarani oname tur.
6
Sa atino' panen puin Lahtal o' Bang Bolang omho, a'sahain horoba ni apuin. [Niom ho, ni hap maring ho a'taainfe, abullem ahal.
7
Sobo Lisias, bel lamuil o kapal ho', sa a'ri ing fail pun nitangmi barahi' med,
8
no' he'e name tofangba o' a'hal lapeh ho ahow olap ho'] A, a'tan honife, naba honi horo ni puin o' ahal lap eh ho, a a'holam."
9
Yahudi hinungdi sara pec a'ra naho' om mi, no' he'e, a'titino' an tofang ho, sipi o a'bul bit.
O BAANG KAAI ERNU MI SAM ERALO FALING TOW MIMENG
PAULUS MONG FELIKS A'PONG A'DANG SARI U TOLA SOHEI TARENG
10
Mang homi, afen seng aol satang tub Paulus a'how mateng, Paulus ubangho, "Nei aholmi sariho tun tana ap ariho hu' botang dasing ap o name bang pali' ho'mi, na napano' puin nariutola nohei tareng.
11
Aridi a'hol, o'tareng ernu faling alomi namid Yerusalem mi nom afoh namang a'tel.
12
Sipi e nahol a'pipite' di a'ai, mang anodi na e a'ra taburang nene, na e' name tofang om hoc nene, Lahtal o Bang Bolang om femi soeme, mong sipi o lubung ta' u'nung emele a'rian soeme mong nura rame emelefe miso.
13
Fed sipi no a'hal lap sobo, sano' pilangfe ho, sipi med etub eme ara mateng sah.
14
Honi sobo na o'a'tino' bit a'ra mateng sariho, se'bur ho arahamba sipi ubangho alol a'taain, nari ho'o pi bap pi bale o' Lahtal fe na nom afoh namang atel, udume tofang ma hap maring name bengfal turmi ei ba hul meng ho o'selol,
15
udume Lahtal mi ba sipidi a'danang eh, no' he'e fetangdi u'il ara, med name a'bul eme name a'hal ho a'raham sobarpi.
16
Na ho' a'raham, na ubaleta puin om ah gariang ma Lahtal a'raham med name tofang di a'raham.
17
Fed ho, tun den-den om mi na pite' habuden puin ho' nobang no pali' ere'eng, mahen sah di nafit ho.
18
Na sariho'o panen eh sipi ho' nahol, no' honi he'e na Lahtal o Bang om mi nano' bolang, name den e nari fading nene, loil a'maaindi a'ai, sobo o'anai mi Yahudi piralo tow Asia mi ho' di ara.
19
O' a'bultaho, sipiso a'ra apong a'dangmi no a'hal ho ubang, mang fede' sipi ei nanu ara sipi puin nari lafang.
20
A'ai he' seihoni sa sipi ubang, naba a'halfe na panen ho sipi a'hol ho a'rahamba na mong om hul a'raham tufeh homi,
21
sel ho a'raham sipi o'ham mi tufeho, namang pa' sah nu na ulofe he' no' fede' name min sofetang horoba, fed ho'mi i nara abul ahal lang eh."'
22
Honi sobo, Feliks ei na'hol ma se'bur ho a'raham somi a'bul, para kara sa o'sel a'luil sa ubang, "Lisias bel lamuil o kapal helfe, na i para kara ho o mateng bit, o pol amuj."
23
O' a'taain, Feliks so satang tanilol a'how Paulus ho dai sei tahang a'mihing, sobo filung om mi, Paulus e'dun e'fal hodi sa e u hap nene.
O BAANG KAAI ERALO FALING UT SAM ERALO FALING ITITO
PAULUS SO UDUME FA KRISTUS OM MI SONA U'MATENG
24
Mi tareng den, Feliks ob alopi, o'ob ani Drusila ho Yahudi ob, sipi ho' Paulus ahow sam sobangmi, Paulus so udume fa Kristus om mi ho umateng sipi alepang,
25
Paulus ara tanut totiling fa na abul ei a'raham, tom tahang, selnu mi ei hu' botang dasing ap ho biteh he', Feliks baroc empir, sa ubang, "Fedho' a sam. Sel il a'rafe, na foil olofe."
26
Selho a'raham, Feliks udumeho, Paulus uil seng en. Honife Feliks o'lofe sei masing, Paulus ho' a'ra mateng sei masing.
27
Honi sobo, mitun alo he'e, Perkius Festus foil Feliks tiling. No' honi he'e, om umaho, Yahudi hinung om gariangfe horo he'e, Feliks sa Paulus ho so med sapiri mi a'mihing meng.