RASUL HINUNG O' SURA' ASEL MATE ERALO FALING TOW
1
Paulus bengfal ernu edun no' a'ra mateng, "Fetang om na milame eh ho'o, nom nah o'no' puin Lahtal a'raham, sam fed ho' mimeng."
2
Imam mate Ananias, name Paulus a'bung tuh tufeh ho parenta sipi a'how Paulus at mi ba'.
3
No he'e, Paulus a'ra mateng, "Lahtal so ma' iri par, iriba sameng afel nun ho! Abul em a'hal i mih, no a'bul lap no a'hal lap salang Sura' a' ta'ain, honi sobo sura' om i lafang name a'how nari beh par?"
4
Name tofang a'bung tufeh a'ra mateng, "Honife a' Lahtal o dor buang mimate ho a ebit efaleng?"
5
Paulus ubangho, "Na e a'hol nene, diailbar ubang sari dor buang dor aneng. Fede' ara hulmeng, 'i ha'ai mateng o sah bit fa i bang i pali' o' buang o' aneng a'raham e.'''
6
Honin sobo Paulus a'hol, sariho sipi habuden Saduki hinung, o'beng ho, Farisi hinung, Paulus sa bengfal hinung o'ham mi lofe, "Diailbar nun, nari ho' Farisi hinung, name Farisi o'ai. Name no a'bul no a'hal lap eh fede' udume med name min sofetang ei a'raham!"
7
Paulus sari na ho' ubang eh he'e, dumingta utot ara latel Farisi med Saduki tofang anai homi, name ta u'nung om mi sabang o'den-den.
8
Fede' Saduki ubangho, name min sofetang e a'ra nene, malaikat di a'ai, med roh di a'ai, sobo Farisi hinung barpi o'atino' ubang.
9
Horo he'e, loil a'main mate latel med bengfal pirden ara Farisi hinung o lubung ta ho sahir toh u tetang atino' panen, "Niri ho' ai ho o' a'hal nudi e a'hol nene. Taro'ni, mang fede' roh em malaikat u a'ra matengam?"
10
Salahain a'biing ho mang mate ta horo, bel lamuil o kapal baroc ahal mi name tofang ho Paulus apeh ala'ang bahite, name efar nun sa parenta hel sipi o ham homi Paulus med ara buang bang leam.
11
Dilpaka omnumi, Lahtal ara Paulus atote mitoh a'ra mateng, "Om a'no' dume, fede' a Nariho u'mateng u'lurung a'titino' tong Yerusalem mi, honife, a foil sam Roma mi u'mateng u'lurung."
BAANG KAAI ERNU FALING ALO SAM ERALO FALING ALO MIMENG
PAULUS AMINE U GAHAIN U TAFOIR
12
Fed sah nu puin, Yahudi hinung ladimang labor som nu sato' nu, sara pec soki so a'rooin min na ade nene sei nabadi nanene sam sipi Paulus ho so amine.
13
Name pir erut a'lihing som nu ho panen.
14
Sipi ho' dor bu'ang o'name med tumo' bar a bung, sipi ubang ho, "Ni nira pecnu am, niniki, ni a'rooin min, mang naba horodi niat ator nene sam ni Paulus ho niso a'mine.
15
Fed homi, ari med bengfal ernu, lamuil o kapal a'ra mateng a'ra hel i bung, mang fede' a o'parakara upol amuj bit honie, sa e ho' ho'omi dai he'e ni amine am."
16
Honi sobo, Paulus o' uding ob o'ai lote gahain ho' ma eh horo he'e, sa sam buang bang lemid Paulus a'ra mateng.
17
Paulus lamuil fen puin ho a'ra mateng, "Ai a'for ho' arasam o kapal abung, fede' nanu o' tanut mi ho, sa u a'ra mateng fe."
18
Horo he'e, sari lamuil ho, ara sam so kapal abung ubang ho, "Paulus ba tahang om mi ho, nolofe no' nabang nahow ai a'for ho' ara olap ho' fede' omsa nanu u a'ra mateng."
19
Lamuil kapalho, ai a'for atang mipuin baring satote lol, sa a'tan, "nabafe om nabung bit uma?"
20
Ai a'for ubangho, "Yahudi hinung somnu sipi abang honie dilel he'e a Paulus a'rahel bengfal o'laphel honie sipi aba-aba a'tan a'bul-a'bulfe.
21
Honife ha ai sipi ei alepang e, fede' name pir erut a'lihing Paulus o'se'bur lap soki so a'rooin min, naade seina nene sam sipi Paulus so a'minefe. Fed ho' sipi u taro' no'am sipi dai o i nungfe a'danang eh."
22
No' horo he'e, lamuil o kapal ai afor ho a'how sam sobo, sa a'ra mateng, "Sarina ho'o, aha ai namenudi a'ra mateng nene, fede' a' unara matengam."
BAANG KAAI ERALO FALING TOW MI SAM ERTOW FALING IFING MIMENG
PAULUS NAME TAHOW KAISAREA BANG LEAM
23
O' a'taain, lamuil o' kapal sosefar piralo o' lofe a'ra mateng, "Mali o' nameho apir rat alo med, name kuda puin pir eritito, name balep puin pir rat alo, i barpi mong Kaisarea leam pane' od tow dilapaka.
24
Binanta Paulus tamihfe hodi ilap Paulus en, i buang rupa sanang, tining rameng om mi a'ra sam mong Gubernur Feliks abung."
25
No' sa sura' nu hul, o' pa' ho'oni:
26
Klaudius Lisias misam. Med Gubernur Feliks mate lafining e tahow. Ada mahen,
27
Ai ho'o Yahudi hinung a'puin e'dai amine, o'om homi na no nefar tofang na a'ra ho' ni ano' il mi ad, fede' ni a'hol he, sariho Roma o' serang.
28
Naridi nom a'hol uma, sipi o'tanut taro'nife sipi ai ho o'a'hal lap, horofe na a'rahel sipi o bengfal en.
29
Na lap sam a'hol, naba eilefe name o' ahal lap, sari ho'o seilal sipi o'salang sura' om, sobo naden e sano' sipi o' kufa'nu, sano' pilang matenu, puin ai ho a'minefe honiho a'ai.
30
Name nara matengho, ladimang labor nu ma' ara, puin ai ho' lafang, na hano ang nameba ai ho o'se'bur lap eho parenta, honie sipi a'taain fe engho arife abung.
31
Horo name nefarho parenta a'taain, sipi Paulus med ara dilpaka puin ho' Antipatris a'bung.
32
Hair o' a'taain, sipi name kuda puin horo ahow a'ra sam, sobo sipi sabor bu'ang bang leam.
33
Sipi sam Kaisarea mi, sura' med Gubernur en, Paulus di med en.
34
Gubernur sura'ho mang ta'an no, sa ta'ain Paulusho bang pali' taro mi ho. Sa a'hol he'e Paulus Kilikia mi ho',
35
sa ubangho, "Name o'se'bur lapnun a'ra oham he'e, a mateng na ma'eh a'hol." No he'e, sa ubang Paulus ara bu'ang bang mate Herodes leam.