RASUL HINUNG O' SURA ASEL MATE ERALO FALING ALO
1
"Diail bar med omang ernu, alepang na nohei tareng fedho'omi uiramateng."
2
Sipi lapang honi he'e Paulus sipi o lofe ho, Ibrani o' mateng fe puin, sipi por tining empir no' Paulus mateng,
3
Nari ho'o Yahudi hinung, Tarsis, Kilikia mi nafain, sobo na bang pali' ho'oro mimate, gurpel Gamaliel e'far atang far homi so a'tino' ma pi bap bale o' sura' om a'taain, ano' karesang mate med Lahtal a'raham, mang fede' iri sobarpi sel fed om mi honi.
4
Name Lahtal o' selol ho na aropa' beh par, sam somin, sipi a'pec mi ob milote arasam sapiri mi,
5
mang fede' Lahtal o' dor aneng, name ba Lahtal o dil om ubaleta u naramateng. Diail bar mong Damsik mi o' sura-sura' na sipi abung med, no' he'e na sam hemomi sipi a'pec ara Yerusalem leam sipi tahang no' he'e med sapiri om mi.
6
Mimeng mi ap napanen, no lame om ho mi, e'dai sam Damsyik mi, fed buirmi, seh-seh lel matenu tong burangtahel nari fading.
7
Na ol fa'ai tahel, na alepang name amang pa' nu nara mateng ubang ho, 'Saulus, Saulus, naba ey sofe a Nari horo Yesus, Nazaret o' name ba a a'no' sah-sah eh ho?'
8
No' na ey abor, 'Ari anoso Tuhan?' No' sa nara mateng, 'Nari horo Yesus Nazaret, o' name ba a a'no' sah-sah eh ho.'
9
Name naraho, lel ho a'hol, sobo name amang pa' nara mateng eh sipi e ahol nene, e pahang nene.
10
No' na ubangho, 'naba honi horo ma' napanen Tuhan?' No' Sa nei abor, 'Toh! sam Damsyik leam, hemo miam fe an tofang u ara mateng a panen.'
11
Sam hemomi he'e na dun na a'hol nene am, fede' lel mate ho eyle, name naraho, mang natang puin ni Damsyik bang lemid."
12
O' a'taain, ainu ani Ananias, name om a'bul salang sura' mi fetang, Yahudi tofang o' no' a'hol, sa ara hemomi,
13
sa ho' nabung natote mitoh, sa nara mateng, No diail Saulus, dun na ahol!' Mang horo he'e, nadun na ahol, dun saridi a'hol.
14
Sa nara mateng, 'Pi diing pi bap o Lahtal ari utub ale' med honie, O' inungho a a'hol med o' abul-abul hodi a a'hol, foil nuta, a'mang pa' at mihel hodi a alepang, fede'
15
sa ahow o' otabi ho u mateng lame med name tofang en ma eh med nabafe a' a'hol ma eham ho a'raham.
16
Fed ho', naba eyfe sel uta? Ahirtoh! obo' alorang, sei tuling tow ho med, o' doc o a'hal ho a'no' bolang, no' he'e Ani u lofe."
17
"Na nabor Yerusalem le ho' na Lahtal o bang om mi a'ome eh he'e, Roh Bolang nari baloil,
18
nadun aiba naramateng eh ho a'hol, Sa ubang ho, 'A hanoang Yerusalem ho' mi hel sam fede' Nani ho a umateng sobo sipi saking.'
19
Na ara mateng, 'Tuhan, sipi a'hol fede' sipiba O'atino' bitho, na med sapiri om mi, na sipi apec emele arian.
20
No' honi he'e, at afu' hamow o' name Stefanus, o' foi her o' ain tafoil nariso a'ra hemo mitoh u inung med name Stefanus amineho, na o'fen bu'ang.
21
Mang no' he'e Yesus nara mateng, 'Alame! fede' Na ahow lame let mong bang beng pali' beng leam."
22
Name tofang Paulus u alepang, med o mateng pa' hodi u alepang. Mang horo, sipi barpi amang mid ubang ho, "Name honi ho a'how pali' ho'o e' let, fede' sa fetang di ara no' nene!"
23
Sipi o' loil o' beat, sipi sokod laan mate hing few, maru a buil lulingham mi bahite,
24
berhade o kapal sipi ara mateng honie, Paulus ho a'ra sam bu'ang bang leam, sa ubang ho, Paulus ho beh paresafe honife pi olel a' hol minaba eysofe sipi beat aiho lafang honiho panen
25
Sobo sipi hei alalung om homi, Paulus sadimang bel lamuil o' matenu abung tufeh a'ra mateng, "Abulem a'ai, mang fede' Roma o' nameno'nu o'abul o'ahal e a'hol dai honi he'e i beh?"
26
Mang mateng ho ma eh aiho sam so kapal a'ra mateng ubang ho, "Nabafe ma' ni panen? Fede', ai ho'o Roma pali' o' serang."
27
Horo he'e, berhade o kapal ma Paulus a'ramateng ubang ho, "Nara mateng, ari ho'o Roma pali' o' serang?" Paulus ubang ho, "a'tino.'"
28
Kapal ho ubang ho, "Nari ho' nano' pali' ho'o o' serangfe honiho, na seng tofang seng mate puin fel." Paulus ubangho, "Nariho pali' mol ho' o' serang asel ho'omi nafain."
29
Horo he'e, nameba Paulus paresafeho tabite, bel lamuil o kapal hodi baroc empir, fede' sa aholam, Paulus ho Roma pali'ho o serang sobo, sa apecam.
PAULUS SA YAHUDI O PARENTA ANENG A'RA MATENG
30
Honi sobo, midilel he'e, lamuil o kapal om a'holfe, naba ei sofe, Yahudi hinung Paulus o' selap honin, sa Paulus ad no' he'e, sa dor bu'ang o mate ernu med bengfal ernu sa ta unung, sa Paulus a'ra hel sipi o ham lehel.