¹ Loil amain mate mang tafal he'e, Paulus sakola aibar o'lofe ta'unung, sipi om ano' dume, sipi a'ra mateng no' sasam Makedonia leam. ² Pali' tofang sami lame, fom pahang tofang sa sipi a'ra mateng, sam mong Yunani lehel. ³ Sa hemomi mih tar ultow om mi. Fede' sa kapala ta Siria leam bit he'e, Yahudi hinung gahain somnu ari lafang, sasom mi a'hi' sabor Makedonia lol. ⁴ Name ba ara tenang el sam ho, Sopater Berea o'name, Pirus o'ai, Aristarkhus med Sekundus Tesalonika o'name, Gayus Derbe o'name, Timotius, Tikhikus med Trofimus Asia o'name. ⁵ Sipi sotur sam Troas mi nidanang, ⁶ Sobo Roti Bolang o'hair mate a'raham ni Filipi mi kapalata lame tareng ifihing ho' Troas mi sipi ahol, ni hemomi tar mih tareng itito. PAULUS O' LAME O' TOH O' AMUJ MI MONG TROAS MI ⁷ Hair o' aainang don om homi, ni ta unung ham-ham roti ahid eh, Paulus sipi a'ra mateng honie, dil lel he'e salame honi sobo, somateng pa' ho sauta sam tun ham. ⁸ Lampu tofang ara bang om lafining nimi taunung eh homi. ⁹ Ai a'for nu a'ra sanele mi mieh sobo nop suhuin. Horo he'e Paulus mateng a'hi' nene so em, ai aforho sonop eh horo he'e tong bang om lafining omi towmi ho mimuj, name tefang he' minam. ¹⁰ Honin sobo Paulus hel tatar afa' ubang ho, "loil e, fede' o'aeng dai a'ra eh." ¹¹ Paulus sabor mid roti ahid ade, sa name a'ra mateng lufang o'sah sam lalami e' meng. No' he'e sa lame. ¹² Sipi ai afor ho sofetangam fe a'ra sabor, aiho apang no' empir. MONG TROAS MI SAM MILETUS LEAM ¹³ Honi sobo, mitur sam kapala ta mong Asos leam, niom Paulus hemomi ho sam med fede' sa bit honiam, om solo hemo leam sobo se'fa puin. ¹⁴ No, seh-seh sa ho' Asos mi nihol, ni a'ri med no' he'e nimong Metilene leam. ¹⁵ Ni hemomi lame mi dilel nisam Khios mi. Hair o' ata'ain nisam Samos abung, mi dilel nisam Miletus mi. ¹⁶ Paulus om Efesus lol honie sa haai mong Asia mi sel ano' oh e fede' sa hanoang sam Yerusalem mi, no'so honi he'e Roh hel o'sel a'raham. PAULUS SA EFESUS O' PENATUA BAR A'RA MATENG ¹⁷ Miletus mi, Paulus name a'how mong Efesus leam penatua nunho a'how olap ho'. ¹⁸ Sipi mang ho', sa sipi a'ra mateng, "Iridi a'hol, nari ho taro'ni fetang inai homi sel tana ap, hair o' a'ainang na ne'fa few Asia ho' mitoh, ¹⁹ na Lahtal ubaleta nom lamang puin, neng mari puin, med goda pate airnu naholdang narupa' sariho Yahudi hinung o' ladimang labor, ²⁰ taro' nife, na e nol holong nene med ong nano' airnuba na ubang eh, med fom pahang ba na mong tofang a'pong a'dang mi bit eh ho, med bangsel tana ap ho na u nol holong nene, ²¹ dume toh o' a'tino' ubang fa Yahudi hinung di a'ra mateng, sobo Yunani hiungdi a'ra mateng, sariho som afom fa Lahtal a'raham med afen Yesus Kristus ho udume. ²² Fed ho' mi, edun, Roh napec, na seham mi lame sam Yerusalem leam, sobo na e a'hol dai na sam hemo mi naba so ma'a a'ra naraham, ²³ seilal Roh Bolang a'titino' u nara mateng bang a'rian ubang ho, sapiri bang med ma ar mahip adanang eh. ²⁴ Honibo, na e'tanut bite fetang ho'o, e nafah nahir ofali nene, horoba, karesang baleta bolang na Afen Yesus abung med ho, na ulame na utoh sam o' amujmi, sariho, Lahtal o'fom pa' Sura' Bolang mi na a'tino toh umateng ulurung. ²⁵ Fed ho'mi e'dun, na ahol sariho, inai mi e ara nene, iri horoba na lame pali' fading bang mate pali' no' umateng, selnumi napongfa' foil edun. ²⁶ Honife, fed ho'mi na iramateng, ifoi sobarpi na e' u ahal nene. ²⁷ Fede', an tofang ba maa Lahtal panen fe ho niho na u iramateng ho na e u nol holong nene. ²⁸ Afah ahir med Lahtal o nub tofang ho u bu'ang, o'om mi Roh Bolang ari utub ano' bu ang no' honie Lahtal o serang buhuin ho u'bu'ang, fede' Saso foi bolang puin atiling. ²⁹ Na ahol, sariho nalame samam honi he'e, falefang tofang ho'ma inai mi, nub aibar ho sa e ukarang nene. ³⁰ Med inai hodimi den sahirtoh, an tofang sesah lol umateng puin sakola aibarho iputang med. ³¹ Honife, bu'ang rupa, uma seimasing dilel dilpana, o'lufang tun tow, na ino' nauma seimasing, na neng noife puin. ³² Fed homi, na ilorang ibole med Lahtal en, med o'mateng pa' bolang no' ham puin ifoh itel, med name bolang tofang o'a'nai homi, kafac so em sa med i en. ³³ Lahung afel, falofang hir med fen lelang ho mang ano' horo eidi, nom e uma nene. ³⁴ Iridi ahol sariho, natang horo napuin no kurang no bo' airnu u baleta med name nara fetang ho, barpi niraham. ³⁵ Airnu turlo om mi, na ietub oham sariho, a'titino' karesang mang fede' ho' oni, pi u'il-u'il o'moleng ukarang, med Afen Yesus o' mateng pa' uma, Sa ubang ho, 'Name en ho o'fali mate, sobo name ten ho, o'fali a'ai.'" ³⁶ Sa na airnu u'mateng no' horo he'e sa fa'ur muding sipi a'ra a'ome barpi. ³⁷ Mang no' horo he'e, sipi barpi morang so oh, sipi Paulus a'fa hil a'muning, ³⁸ sipi om muj empir, mitata o'mateng pa' ba sa ubang ho, sipi foil a'pongfa' ho a'hola neneam. No horo he'e, sipi Paulus o'lubung lubung a'rasam kapala ta ad.