RASUL HINUNG O SURA' ASEL MATE AIRNU FALING TIEINU
1
Na ho ara honi he'e Apolos dai mong Korintus bang mi, Paulus ho bair lol sam mong Efesus i am. Hemo mi sa sakola ai bar pirnu alo a'hol.
2
Paulus sipi a'ra mateng, "i o' a'tino' bit om homiho, Roh Bolang i medam em dai?" Sipi ubang ho, "A'ai, Roh Bolang ho a'ra so honiho, a'titino' ni ma eh dai."
3
Paulus foil ubangho, "Naba fe om mi i sei tuling tow med?" Sipi ubang, "Yohanis o sei tuling tow om mi."
4
Paulus ubangho, "Yohanis o sei tuling tow ho, tom a'om ei sei tuling tow, no' horo he'e, sa name tofang a'ra mateng honi e, Yohanis ho no'am he'e ainu ho'eh ma rh horofe o' a'tino' bit Sariho Yesus."
5
Sipi na ho ma'eh no horo he'e, sipi Yesus ani puin sei tuling tow ho med.
6
Paulus satang sipi ta puin meng he'e, Roh sipi tahel horo he'e, mateng a'fang-a'fang ho sipi ubang, na faning tapai di sipi u mateng.
7
Sipi o' tofang ho, lotebar pir airnu faling alo.
8
No' horo he'e, Paulus mid lubung la'ol eleme lamid, baroc banibung e a'ra a'fah mi nene sa mateng lurung atino' panen, ul tow om mi, tanut to tiling sipi om a'no' dume ma Lahtal o'bang bolang manep huring madal ho a'raham.
9
Honi sobo, name pir nu alo som a'no' adobe, o'atino' ubang ho bahut alil, name tofang a'pong adang homi, na o'sah mareh, a'ri ing ta fail ta fe bit med se'bur no' ho a'raham, Paulus sipi ad a'tain, sadimang sakola aibar a'dail sam mong Tiranus o'sakola mi tanut to tiling sel a'rian.
10
Sari na ho'o, lame tun alo om mi, horo he'e Yahudi hinung med Yunani hinung mong Asia mi ho, Lahtal o' fom pa' o' mateng pa' ho u alepang.
SKEWA O' AI BAR
11
Lahtal na u tahoir o'karang tofang panen Paulus a'tang a'lai,
12
tatang luh o'napah puin ho' name mode o'lap ho', sipi mode suhuin, nop' honi he'e, setang darah ba sipi tamang ho hel te eng.
13
Sobo, Yahudi o' setang a'lol o'nae pirden ho lame pali' fading se'bur lap afen Yesus ani puin fa name setang halap ho a'raham ubang ho, "Yesus ba Paulus umateng eh ho, na ani puin i ki i a'ro oinmin bit!"
14
Skewa o'ai lote bar pir itito ho, pir nuba Yahudi dor bu'ang o'mate horofe naho panen.
15
Sobo, setang darah nun sipi ei a'bor ubangho, "Yesus ho na a'hol, Paulus di na a'hol, ari ho ano?"
16
Horo he'e name setang om tamang ho, sipi o' do o' lahel med so kufa om mi, sipi a'no' moleng malaj horo he'e, sipi bang ho el te'eng sobo, a'boi tang oh, baed foihal puin te'eng.
17
Sarina ho'o, name tofang efesus bang miho barpi a'hol, sariho Yahudi hinung med Yunani hinung. Sipi barpi baroc oh, afen Yesus sipi afoh atel sel tana ap.
18
Tofang sipi o' a'nai homi ba o' atino' bitam ho, ho' ma sei masing, sipi so panen so aten ho umateng ulurung o' atino' bit.
19
No' he'e sipi halimang lapar panenam ho, so sura' nun ho a buil ta unung med tofang eng adang apong adang homi apew. Sipi sura'-sura' o fali ho t'an sa he'e seng hir rib eir ifing ho o'hir.
20
Honife, Lahtal o' fom pa' mateng pa' ho' a'bow med nimate milafining.
PAULUS SOLAME SOTOH U TARO' U ALAP
21
An tofang ho no' oh horo he'e, Roh om mi, Paulus o' tanut ho, sa Makedonia med Akhaya lol sam Yerusalem leam, sa ubang ho, "mang fede' Na sam hemo miam honi he'e, na u'il-u'il Roma e'dun."
22
Na name piralo utub mong Makedonia leam karesang baleta, sariho, Timotius med Erastus, sa solo Asia mi tareng den-den.
DEMETRIUS MONG EFESUS BANG MI LOIL A'MAIN
23
Ma' sel ho a'raham, loil mate a'ra hemomi ma se'bur ho a'raham.
24
Fede' ainu ani Demetrius, lahung huring mera' panen ho ei karesang, lahung ho sa puin aung ob sah ani Artimes o bang aten a'home ip a'tuhuin mid a'tuhuin, name molang sa o'fali ka'ai nene.
25
Atang molang airnu sa ta unung sa a'ra mateng, "Di ail bar nun, iri di ahol ho, tofang lu'ung so ara pi fetang mi, asel pi karesang pibaleta mate om horo mi.
26
No' he'e, iridi ahol ma' eh sariho e' Efesus solo mi nene, sobo e'dai Asia so mipir, Paulus name tofang om a'dimang o' atino' ubang, sa ubang ho, Lahtal ba name no' satang puin atenho, e Lahtal nene.
27
Sari ho' sano' om sah, puin tamuj fa sah lahal lefa, e horo solo nene sobo puin apung Artimes mate lafining hodi e utaan apite' di a'ai, no' honi he'e, sari ba pi uada ahol Asia ho'mo med pali' mate ho'ta, o' mate o' lafining selnu mi he'e suhuin."
28
Sipi mang ma eh horo he'e sipi ari'ing empir, sipi lofe beat ara ip a'ra mid ubang ho, "Efesus hinung, o' apung Artemis somi mate!"
29
Pali ho loil amain mate afeng, horo he'e sipi barpi hanonoang mong dal orang suku sabea bang leam, sipi Makedonia o'name piralo, sariho Paulus o'diail senulol ai Gayus med Aristarkhus ho sipi beh baring.
30
Sobo Paulus omho, name tofang omho lemid bo, sakola aibar mang sa'ain.
31
O' mitata Asia o' mate airnuba Paulus ara tenang el ho samang tahow talamelol a'ra mateng honie, sa ha'ai safah sahir ho fisam mong suku sabea bang homi a'lorang nene.
32
Horo habuden nanu u beat fa habun a'raham, fede' loil a'main om mi, no' he'e sipi habuden mate e'ahol nene naba ei sofe, sipi ho' ta unung.
33
Tofang a'nai homi den u tanut, Aleksander Yahudi hinung a' dodo fa name apong a'dang a' tuhuin am, Aleksander satang a'kala, om ho name tofang a'pong a'dang homi sari utola fe.
34
Sobo, sipi a'hol he'e, Aleksander ho Yahudi hinung, o' lufang od alo om mi, sipi barpi beat amang nu hel ubang ho, "Efesus o' apung Artemis somimate!"
35
Abul ahal lang o'nahul ei ho, sa name tofang ho e'hap sipi ano' por sa ubang ho, "Iri Efesus hinung, Efesus ho, apung Artemis tong burang tahel ho o'bang buang ano' honi horo e a'hol dai.
36
Fede' sari na ho' pi u'ariing sah honife, i tining talaj, mang tanai name o' ahal lap nene.
37
Fede' name nun ba i ara ho'am ho'o, pi apung o' bang ho utot u kalaping nene.
38
Honife, mang fede' Demetrius med o' name a'tang moleng nun horofe om tarofe fa namenu a'raham, name hukung puin med ham name o' se'ar sari during. Sei honi sipi so tanut fa nu a'raham ma nu a'raham ho ubang.
39
Honi sobo, mang fede' i nanu'le u inung, sarinaho, mong serang buhuin o' lubung ta'unung mi umateng hukung ata ain.
40
Fede', pi karak omi, name pi a'hal lap ma loil amain sel fed ho' a'raham fede' loil amain ho'o pi umateng a'lelfe sobo pilang ahap a'ai."
41
Sa na an tofang ho'o sa umateng no' he'e, sa name barmate ho a how tabite.