KISAH RASUL O'ASEL AIRNU FALING TURLO
1
No' horo he'e, Paulus Atena pali' homi hel, foil sam mong Korintus bang leam.
2
Paulus sam he'e name Yahudi nu ani Akwila, sari ho, Pontus o'toh o'hamow, so ob ani Priskila ho a'ra dai mong Italia mi ho', fede' Klaudius name Yahudi tofang ba a'ra Roma mi ho, ahow sabor. Paulus ho' sipi a'bung.
3
Fede' sipi o' karesang ham, horo Paulus sipi a'ra ham-ham kaesang fede' sipi o' karesang ho, tenda fe panen.
4
Paulus labung ta'unung e'mele homi, tanut to tiling don ari an, sa se'bur lap taroni sa Yahudi med Yunani hinung o'atino' bit.
5
Honi sobo, Silas med Timotius, tong Makedonia mi hel, Paulus foil sadimang fom pa' mateng pa' horo ubang atitino' med Yahudi hinung a'ra mateng ubang ho, Yesus horofe Kristus.
6
Honi sobo, sipi Paulus lafang arahain tameng taputang, horo he'e Paulus so fen taro' no' he'e sipi a'ra mateng, "O foi ho ara elafung dor ta! Nari ho'o bolang. Fed ho'o mi so samfa, na foil sam bang beng pali' beng leam."
7
Mang horo he'e, sa emele homi hel, sa sam mong ai nu ani Titus Yustus o'bang mi, sari aiho, e Yahudi hinung nene sobo sa Lahtal u ada a'hol, o bang ho Yahudi o lubung ta'unung emele edenle mi.
8
Yahudi o' lubung la'ol o' Kapal ani Kristus med name ba o bang om mi ho, sadimang Lahtal o'atino' u'bang, foil med Korintus hinung tofang ba Paulus ei ma'eh ho, Lahtal o'atino' bit horo he'e sipi a'foil.
9
Pana nu puin Paulus o' a'hol mi Lahtal a'ra mateng, "Ha'ai baroc eh, a mateng sei masing, ha'ai por nene,
10
fede' Na a'ra ara, mang ano horodi, e ari lafang nene, e ari beh ari par nene, fede' Nei name no' udume tofang ara pali' ho'o mi."
11
Horo he'e, Paulus ho mi mih mitar Lahtal amang pa' u mateng med sipi a'ra mateng o' lufang tun nu ul talang om mi.
PAULUS MONG GALIO O'SE AR MI
12
Honi sobo, sel ho a'raham ho, Galio sano' Akhaya bang ho o' ham nome, Yahudi hinung som nu sahir toh Paulus lafang, sipi ara sam name a'bul lap a'hal lap o sear mi,
13
sipi ubang ho, "Ai ho'o name tofang om hoc fa Lahtal u'ada a'hol sobo, Yahudi o' Sura' Bolang om ho a'lahain."
14
Hoi sobo, Paulus e'dai sat a'be' mateng honi he'e, Galio Yahudi tofang a'ra mateng, "Yahudi hinung mang fede' sari nu ho'o ta do' pi la' eme panen sah a'ten sah so honi he'e, Na i para kara u mateng.
15
Honi sobo mang fede' na ho' mateng lurung, name ani, med i hap maring so ho'e ina umateng. Na nano' name ham mi ina ho' ubang na naain."
16
No horo he'e, Galio name ho a'lol ahow luling lehel.
17
Mang homi, sipi lubung ta'unung o' kapal Sostenes ho a'puin med parenta bang se'ar homi beh. Honi sobo Galio foil midun mi alepang di a'ai.
PAULUS SABOR MONG ANTIOKHIA LEAM
18
Paulus homi tareng den den no he'e, sa so di ail bar udume na homi sa a'ra mateng no' he'e, sa Priskila med Akwila a'ra ham-ham kapala ta mong Siria leam. Mong Kengkrea mi he'e, Paulus selafung ta'oin no' am, fede' sa pa ha' na panen no' am.
19
Sam mong Efesus mi he'e, Priskila med Akwila ho Paulus med homi ad, sobo Paulus solo sam Yahudi hinung a bung tanut to tiling.
20
Sipi Paulus a'bang honi e sa Paulus homi lufang, soba Paulus sa'ain,
21
sipi a'ra mateng ubang ho, "Lahtal inung he'e Na foil nabor iolap ho'am." Mang honi sa Efesus mi kapala hil.
22
Kaisarea mi sa hel, sa mid ada mahen bit Lahtal o' name homi ho a'raham no he'e sa hel Antiokia lehel.
23
Sa homi tareng den den om mi, sa hel mong e'leme nun ba Galatia med Frigia pali' mi ho, sa e'dun o' malil, sakola ai bar nun ho, a'no' kufa' a'no' ara, om a'no' dume.
APOLOS MONG EFESUS MED KORINTUS BANG MI
24
Sel nu mi ho, name Yahudi nu ani Apolos, sariho Aleksandria o sel u po' tupe u haluh, sa ho' Efesus mi. Sariho name ompo' name at petang, Sura' Bolang om ho sa a'hol milil.
25
Lahtal o'se' burfe ho, name sari ai ho'o ou atang ta sa aholam, Roh om mi sari ho do' tabi. Yesus o' karesang o'baleta sa ubang umateng sobo sa u a'le' u tara' rupa, sobo sei tuling tow ho, Yohanis ei fe sa a'hol.
26
Sa lubung ta'unung mi mateng lurung ho, sa e baroc nene, sobo Priskila med Akwila ma eh horo he'e, sipi baring satote mi a'tuhuin se'bur Lahtal ei o a'bul a'bul ho sipi u a'ra mateng.
27
Sel homi, Apolos di om ho kapala hil mong Akhaya bang leam, diail bar ba udume nu ho, a'no' kufa' no' he'e sura' hul med sakola ai bar hemo mi en sipi a'how a'danang ari med. Sa mang sam horo he'e, name tofang ba untu ada ahol o'atino' bitam ho sa ukarang sobarpi,
28
fede' sa tofang apong adang mi Yahudi hinung sa a'titino' lafang, Sura' Bolang sipi e'tub ubang ho, Kristus horofe Yesus.