RASUL HINUNG O SURA' ASEL MATE ERNU FALING ITITO
1
Sel nu mi, Paulus med Silas lame Amfipolis med Apolonia ho a'lai, sam Tesalonika mi he'e, Yahudi o lubung eleme nudi ara ho mi eh.
2
Mang horo he'e, Paulus sipi o' a'nai lemid, sura' bolang ho u sipi a'ra mateng don tow om mi,
3
sura' bolang sa u a'fetang o'hir o'pa' sa bit ho'oni, "Yesus ho sa u'il-u'il ma'ar mahip ahol, no' honin he'e, sa name min tofang o' a'nai ho mi so fetang, no' honin he'e, sa u'bang ho, Yesus ba Na u ira mateng eh ho', Kristus."
4
Horo he'e, name no' habuden ba o' a'tino' bit ho, sadimang ma Paulus med Silas ara ta' u'nung, foil med Yunani hinung habuden mateba Lahtal u baroc am ho, med ob bar anita nun ho pi ta'an sah.
5
Honin sobo, Yahudi hinung om bune apang sah, sipi name a'ri ing pali' homi ho, a'dail, sipi name ta' u'nung lafoh bi', horo he'e sipi pali' homi dil a'sahain bang a'sahain, no' horo he'e sipi sam Yason o' bang fading om lemid Paulus med Silas lap, sipi om ho, baring hel name tofang ho lehel.
6
Paulus med Silas lap e' a'hol nene, horo he'e, sipi Yason med tenang bar pirden ara sipi baring mong parenta aneng abung, sipi u'bang ho, "Name ho'o, pali' ho'mi loil a'main rusa fa' eh ho, foil ara ho'mi am.
7
Yason sapano' puin sipi med, sipi barpi amang mid, mate pali' ta o'hap maring lafang, sipi u'bang ho, afen beng ara sari ho Yesus."
8
Mang mateng ho ma' eh horo he'e, name tofang med mate airnu bang homi ho, om lahun apang sah.
9
No' horo he'e, Yason med o beng bar udume nu med name ho en mang no' he'e name sipi ad.
PAULUS MED SILAS MONG BEREA MI
10
Di a'il bar udume nu ho, hanono ang Paulus med Silas a'how paka ho puin mong Berea leam, sonang alo sam pali' ho mi horo he'e sipi sam Yahudi hinung o lubung ta'unung e'mele leam.
11
Yahudi hinung homi ho, om no' bi' e mang fede' mong Tesalonika mi honi nene, fede' name sipi u'bad, name bad herang puin fom pa' mateng pa' ho med, an tofang bit eh ho a'bulem a'ai honin ho, sipi ulap uta'ain sel tana ap.
12
Horo he'e, sipi mi tofang o' a'tino' bit, o' a'nai ho mi ho, Yunani hinung mi ob mi lote ba ani ta nun ho somi tofang.
13
Honin sobo, Yahudi hinung mong Tesalonika mi ho, a'hol ma'eh bite, Paulus mong Berea mi Lahtal o' fom pa' mateng pa' ubang eh, sipi ho Berea mi na sah panen puin name tofang ho a'bite.
14
Mang horo he'e, diail bar o'udume nu ho, hanono ang Paulus a'how sam tut ta, sobo Silas med Timotius so mih.
15
Name Paulus ho e'bu'ang sam mong Atena mi, Paulus name a'ra mateng ubang ho, sam Silas med Timotius ara mateng sipi hano ang nolap ho', honin no' he'e name lame.
PAULUS MONG ATENA MI
16
Paulus mong Atena mi sipi a'dang eh he'e, sa u alepang he'e o'Roh ba a'fah a'hir mi om muj empir fede' Paulus e'dun he'e, name tibeh foi od ano' name no', med a'mihing a'tuhuin, sipi horo o'atino' bit a'no' so lahtal horofe pali' ho afeng.
17
Horo he'e sa mong Yahudi hinung o lubung ta'unung emele leam, bang beng pali' beng o'name ba Lahtal u baroc am ho, med name ba a'ra homi fetang eh ho a'ra tanut totiling sel tan ap.
18
Name tanut huding ba a'ra lubung ta'unung a'ni Epikuros med Stoa om mi hodi sa a'ra u'tatang. Anai homi, piralo tow sara mateng, "Ai o'tanut luling ham fed lame eh ho' om naba ubang sobe?" Beng u'bangho, "Ai ho'o mang fede' name ti ah foi ah empir u'mateng lame honi," fede' sa Yesus o fompa fe u'bang eh.
19
Horo he'e sipi a'dail a'ra sam mong pali' ho o'bu ang o'aneng a'bung sipi a'tan ubang ho, "Niridi niom a'hol uma, na ahol dil ma'eh habar taro' ni horofe a bit lame eh?
20
Fede', naba u tahoir ei horo a fit ho' nifel mi. Airnu turlo ba a'bit eh ho niri a'hol fe niom uma."
21
(Sari sel ho a'raham ho, Atena pali' o'name med name se ho' nun ba a'ra homi ho, sipi sel hair oh fe a'danang, sipi e'naden panen nene, sei lal ho na habar nu a'ra sipi u'mateng u'lurung a'ai he'e sipi u'ma eh u'a'lepang.)
22
Horo he'e, Paulus pali' aneng airnu a'nai homi sahir toh sa u'bang ho'oni, " Oo.... Atena hinung, airnu turlo na midun honi he'e, iom' u'te'eng na a'tino'.
23
Fede', na lame pali' ho' fading an-an tofang ba i' u'ada a'hol eh ho na edun lame sam eleme mi lubung mi ta'unung ei nudi sam ahol, o na hul ubang ho, 'MED LAHTAL BA AHOL NENE HO A'RAHAM.' Honife, naba i' e a'hol nene sobo i' u'ada a'hol eh horo na u ira mateng eh.
24
Lahtal pali' mate med lelang airnu ba a'ra om mi ho a'ten a'home, fede' Sari horo burang med pali' mate o'afen, Sa e mong leng ba'un ba name no' Satang puin aten, honi mi nasah gur pel eleme ho sa e homi nene,
25
Sari di name tofang e u'karang nene mang fede' Sa nanu u'dume eh honi, fede' a'eng, fetang farufing med airnu turlo ho Sari med name no' sariho mang ano' Sa med en.
26
Name nu om mi, Sa aten a'home med name tofang bang airnu mi pali' mate ho' ta ho' en, sel tapeng, o ha' o' manang Sa ano' dume ano' emele elafeng sipi mi fetang,
27
honin e, sipi Lahtal lap, mang fede' sam ahol a'rupa' masiki Sa e telet te lihing nene tari an.
28
Fede', Sari fe om mi pi fetang farufing so dai a'ra.
Mang fede' bow rapo' airnu u'bang ho,
'Niri ho'odi O bap O bale.'
29
Fede' piri ho'o Lahtal o'toh o'po', pi o' abul ha'ai tanut bite, huring madal ho falofang hir so eme, lahang afel so eme foi so, naba dun a'hol ho, name no'so u tanut, no' honi he'e satang molang ho puin a'ten a'home.
30
Honife, bodo kamuke o'sel tapeng med meng, fed ho'o, Lahtal name no' airnu taro-taro miho a'ra mateng honin e, som a'fom,
31
fede' Sa sel nu u'bang am, sel homi hu' botang dasing ap Sa puin pali' mate tahel, abul lang puin name ba Sa u tub am ho a'lai, Sa o'pilang o'tanaj me name no' en so barpi, sari ho, name min o'a'nai homi Sa ai nu ho a'no' fetang."
32
Ma' eh he'e, name min a'nai ho mi fetang di so horo he'e, name pir nu alo e'bit eng el, honi sobo o'beng ho u'bang ho, "naba a u'bang eh ho niom foil alepang uma."
33
Mang honi, sipi o' a'nai mi Paulus sahir toh sam.
34
Honi sobo, name pir deden ma a'ra ta' unung o' atino' bit, o' a'nai mi ho Dionisius di a'ra, sari hodi bengfal airnu ho op'name, med obnu ani Damaris med o'beng bar ba sipi a'ra ham-ham homi eh ho foil ta.