RASUL HINUNG O SURA' ASEL MATE ERNU FALING TALANG
1
Paulus sa ho' Derbe med Listra mi. Sa edun he'e, sakola ainu ani Timotius ho, ara ho mi, o'fo ho Yahudi ob sobo Lahtal o' a'tino' bitam, honin sobo o'mang ho, Yunani hinung.
2
Diail bar o' udume ham ba ara mong Listra med Ikonium mi ho, sipi Timotius o no' a'hol.
3
Paulus om ho sa Timotius a'ra sam, horo he'e, sa Timotius a'dail, no' he'e, sa a'no' bolang a'no' manep, fede' name ba ara bang pali' ho mi ho, barpi Yahudi hinung mamang. fede' name homi barpi a'hol Timotius omang ho Yunani hinung.
4
Sipi o lame om homi, sipi bang tofang lelang tofang a'lai, o om homi panen aten, mateng lurung o no' ba name Lahtal at hamow ei ba ara Yerusalem mi u lubung u ta'unung, u inung ham oh, sipi bit med name tofang ba o' a'tino' bit am ho a'ra mateng honin e, supi a'lol ata'ain.
5
Horo he'e, rei ala ernu ho, u dume om mi kufa med ara med lubung taunung no' ho u teeng ho mang tofang ta ho sel tana ap.
LAHTAL PAULUS O' LOFE MAKEDONIA LEAM
6
No' horo he'e, sipi foil lame sobo, sipi Frigia med Galatia ho a'lai, fede' Asia mi Lahtal o'fom pa' mateng pa' hemo mi u' mateng u' lurung fe ho, Roh Bolang sipi o' se tel.
7
Sam Misia mi he'e, sipi se'bur lap sam Bitinia leam, sobo Yesus o' Roh e' u inung neno.
8
Horo he'e, supi lame Misia ho alai hel mong Troas le hel.
9
Dil pana om ho mi, Paulus nanu a'ho. Sari ho, Makedonia o name nu a'bung tufeh, no' honi he'e, a bang u'bang ho, "A' ho' Makedonia leho niri u'karang fe."
10
Paulus mang na ho a'hol no' horo he'e, ni se'bur lap hano'ang mong Makedonia leam, ni u tanut he'e, Lahtal so ni olofe sam honi e fom pa' mateng pa' Sura' Bolang om mi ho, u sipi a'ra mateng.
LIDIA SOM A'FOM
11
Ni tang mate a'peh sam mong Troas mi horo he'e, ni a'bul puin tang mate ho a'peh mong Samotrake mi, tar dilel horo he'e ni Neapolis leam,
12
homi ni foil mong Filipi leam. Filipi ho'o, Makedonia ho o'bang asel, Roma o' parenta e'far. Ni pali' ho mi tareng alo tou.
13
Sel palol a'raham, ni hel sam mong se'ar mate ba mol adi ta am ei ho mi, ni tanut he'e a'ome e'mele ara homi lubung eh horo, ni sipi ara mateng-mateng.
14
O' a'nai homi, Tiatira ob nu ani Lidia. sari ho'o napah duil ou ho fail o' name, sari di Lahtal ho o'ati no' ubang u ada a'hol. Lahtal om during ah during, sa mih Paulus o' mateng pa' ho e'dun u a lepang.
15
Mang no' horo he'e, Lidia med name ba Lidia o' bang om mi ho Paulus a'foil, Lidia nibang ubang ho, "A nedun mang fede' nari ho'o Lahtal o'a'tino bit, u a'b toh dume so he'e, a ho' no bang leho', honi e, hemo mi mih tar." Sa a'ti tino' u nibang.
PAULUS MED SILAS SAPIRI OM MI
16
Ni sam niom atel Lahtal a'ra mateng e'mele leam bit, sobo ni sam seham he'e, ai ob nu ho pali' mate o' kufa' fe puin ho sam niri ta toh. Sari ai ob ho'o, pali' mate o' kufa' o' ara, pali' mate o' ladimang o' labor puin so name mate nun ba sa o' karesang o' baleta eh ho a'no' untu mi taat.
17
Sari ai ob ho, sa Paulus med niri ho sa nita ain, sa lofe id sanang ahel ubang ho, "Name ho'o Lahtal mate lafining at hamou a'fu' hamou ei, sipi se'bur ba lol sam il luling med ho fitho' fit ma u ira mateng!"
18
Sa sari na ho' panen tareng den den om mi. Paulus a'ri ing horo he'e, sadimang setang darah ba ai ob ho tamang ho ara mateng, "Na Kristus Yesus ani puin ahin alol! a ai ob om ho mi hel!" Mang horo he'e, sari setang darah ho hel te'eng.
19
Honin sobo, ai ob o name mate nun ho midun he'e, sipi o' udume fa ai ob ho mi e, untu senang kafac mi ta'at ho med fe ho suhuin am, sipi Paulus med Silas a'puin baring lubung ta' u'nung mate e'mele leam, mong bu'ang aneng airno eng adang apong adang ho mi.
20
Sipi Paulus med Silasa ara sam mong name ba hu' botang dasing ap puin abung, sipi ubang ho, "Name ho' Yahudi hinung, sipi ara pi bang pi pli' ho'omi loil a'main horo solo panen eh.
21
Sipi hada damuhuin a'hal fe u tara mateng, u tau tatang ta, honin e, piri Roma hinung ho med puin panen aten."
22
Name tofang sahir toh, Paulus med Silas eng ba' afel ba' hu' botang dasing ap o'name Paulus med Silas o'fen a'peh ala'ang, no' horo he'e, sipi name a'hou dob bo' puin Paulus med Silas ho beh.
23
Sipi Paulus med Silas ho beh par, eng ba' afel ba', sipi ahel feu mong sapiri om lefa no' horo he'e, sipi sapiri o' kapal a'hou name alo ho bu'ang.
24
Mang horo he'e, sapiri o' kapal Paulus med Silas ara mong sapiri om lefa no' horo he'e sipi e'fa name a'pec nod mong sapiri om mi a'mihing.
25
Tun ham lala ham he'e Paulus med Silas toh som a'tel med dal orang Lahtal ani u tarain, sobo name sapiri om mi nun ho sipi u safel meng.
26
Seh-seh honin he'e, ta fufui mate toh, sapiri bang od sel mi dor mi, sapiri se'ar sari during, name no' ba name nod hei to fi' to lein ho sobobom tafetang.
27
Sapiri o' kapal sahir toh dun he'e, sapiri o se'ar airnu sari during am, sa so nei baring e'dai sari hor samine fede' sa tanut he'e name sapiri om mi ho, te'eng, oh am.
28
Sobo, Paulus a'titino' beat ubang ho, "ha'ai o bobom ano' bamed fui hal nene, amine nene a tubing nene, fede' ni barpi a'ra ho'o mi!"
29
Mang horo he'e, sapiri o kapal lampu med te'eng bang om lamid, bibil dada' sam Paulus med Silas apong a'dang ho mi, hel fa'ur muding name alo ho uli' aming fa'ai leam.
30
Mang no' horo he'e, sa name alo ara pong luling lehel, sa name alo ho ara mateng, "No mate nun, naba fe na panen honin e, na il luling ho med?"
31
Paulus med Silas ubang ho, "A Tuhan Yesus om mi Lahtal ho o' a'tino' ubang honin he'e il luling ho, ari med name no' ba o' bang mi barpi med.
32
No he'e, Paulus med Silas Lahtal o'fom pa' mateng pa' ho ubang med sapiri o' kapal med name ba o' bang om mi ho ara mateng.
33
Mang no' horo he'e, so dilpana ho puin sa Paulus med Silas sa arasam o' ba'med a'no' bolang, mang horo he' sari med ob ai o bang om mi ho, Paulus med Silas sipi a'foil a'no' name sarani.
34
No' he'e, sapiri o kapal sa Paulus med Silasa sa ara sobang leam, na dou na pu sipi ara ade na. Om sanang apa no' o'sah, loil asal bad herang ara a'fah a'hir mi, fede' sari med name no' ba o'bang om mi ho, Lahtal a'hol o' a'tino bit am.
35
Honin sobo, fed sah he'e, a'bul lang a'hal lang o' name so bel lamuil a'hou ubang ho, "Name alo ho ad a'tain!"
36
Sapiri o' kapal Paulus a'ra mateng u'bang ho, "Name ba iri hu' a'bul lap a'hal lap eh ho, so name a'hou ubang ho, iri ho e sapiri mi nene am, sari ho i holong am. Honin fe, fed ho' mi i no' ham, bad herang om mi hel sam!"
37
Sobo, Paulus sipi a'ra mateng, "Sipi nun ho, name tofang eng adang ho mi e ni a'bul a'hal a'hol dai he'e, sipi niri beh niri par tofang eng adang ho mi. niri ho'o, Roma hinung, no' he'e sipi niri med sapiri mi. Sam ho'o mi sipi por-por ni hou hel? A'ai! sei hairta, honin e, sa sipi so ho' nihou hel."
38
Bel lamuil a'irnu mateng ho fisam mate nun a'ra mateng, Paulus med Silas o' mateng ho ma eh ho. Mate airnu baroc empir fede' ma eh he'e, Paulus med Silas ho Roma hinung.
39
Mang horo he', sipi ho' Paulus med Silas a'bung so a'hal bit sipi e'fa fan. Sipi Paulus med Silas ahou holong no', foil sipi a'bung honin e, Paulus med Silas foil hel beng leam.
40
Mang sapiri mi holong no' he'e, sipi a'bul Lidia o'bang leam, hemo mi ho sipi dun so diail bar ba udume nu ho a'hol, he'e, sipi so beng bar ho a'ra mateng om a'no' dume, no' he'e foil lame honi.