RASUL NUN O SURA' ASEL ( 15 ) ERNU FALING IFIHING
1
Horo, name den Yudea mi hel di'ayil bar ba sara o udume nu gurpel, "Mang fede e iri sunat orupa Musa o hada damuhuin honi nene, ino' il lulig sah."
2
Horo, ho araham supi om salahain ara, Paulus med Barnabas name nun ho ara sara tutul mate, horo he'e supi samang amuj bite Paulus med Barnabas med supi obeng ta, uil-uil mid Yerusalem lemid Rasul med penatua nun olap e supi om salahin ho u hu'tang.
3
Horo, jumaat mang arasam seham mi, supi Fenisia med Samaria alaiy eleme homi supi bang pali' beng o safom ho u hu'tang petang, sari naho bad herang mate fito' diail bar o udume nu barpi araham.
4
Ho araham supi sam Yerusalem mi, jumaat, rasul e med penatua nun, supi apong'dang med, Horo supi afang rat ba Lahtal panen fa supi alaiy ho u hu'tang.
5
Sobo, name pir den Farisi ara der ba o atino' bitam ho toh horo ubang bite, "Mang taro'ni di supi ho' uil-uil sunat, fe supi parenta honie Musa o Hukung ata'ain!"
6
Horo Rasul med penatua nun u sahol honie na ho u hu'tang.
7
Mang hemomi sara tutul mate no, Petrus toh supi ara hu'tang ubang ho, "Diail bar nun, i ahol bite mong zamang tur ho mi, Lahtal Sa i anai homi iri u tara' am bite ma nat alaiy, pali'mate beng uil-uil Injil o maring pa' u alepang honie o atino' bit.
8
Fe Lahtal ba nameno' om ahol ho, sa o ta' ahol ta ma'eh ho bitam fa supi araham Roh Bolang med supi en, mang fede' Sa panen ma taraham am honi,
9
Fe Sa e ale' bite piri so em supi so honi nene, Sa mang o udume fe alol supi om ano' bolang.
10
Honi fe fed ho'o, mitaro'ni eiy fe i lahtal pate kuk tarofe med sakola aibar nun o doro ta haleng, pi bap bale med piri u ampo sah?
11
Sobo, pi o atino' bit bite pi il luling med ho Tuhan Yesus O hal tafoiy fe alaiy, o rupa mang fede' supi di huni."
12
Horo, name lafoh ba ta' unung nun ho por so'oh, supi Barnabas med Paulus fe ualepang, horo he'e Rasul alo ho tub maring med na o empir ba Lahtal panen supi alaiy ma bang pali' beng o'anaiy mi ho u hu'tang o lel bit
13
Supi mang hu'tang no' he'e, Yakobus mateng abor ubang ho, "Diail bar, nari u alepang.
14
Simon mong a'ainang mi ba taro'ni fe Lahtal dun bang pali' beng ata'ain ho, u hu' tang o lel bitam, mong bang pali' ho o anaiy mi So serang med fa ani mi.
15
Nabi nun o mateng pa' na ho'o u sofo, mang fede' hul olmeng,
16
'Ho'o mang no' Na uil nabor.
ho' Daud o bang hemang ba tari' laher am ho foiy bakung ano-no'.
Na o tarutung am ho foiy bakung ano-no', med Na foiy ano' mi rupa bi' ta,
17
Honie nameno' nun ba daiy ara eh ho Tuhan lap no', med bang pali' beng barpi olove Nani fe alaiy,
o ba na ho'o barpi panen am ho,'
Lahtal o fom pa', o ba na ho'o barpi panen am ho,
Amos 9:11-12 ( Amos o sura' asel tieinu o bang ka'aiy ernu faling nu sam ernu faling alo )
18
O ahol mi mong zamang o a ainang mi ara ham. Yesaya 45:21 ( Yesaya o sura' asel er ut faling ifihing o bang ka'aiy er alo faling nu )
19
Fe, na neiy tanut ho piri uil-uil ha'aiy name bang pali' beng nun ba sadimang Lahtal Araham am ho ano' malo e.
20
Sobo, piri mino' ho nahul supi en honie, supi sari med na an-an ba orupa, dil ah bang ah nun ho puin sa sahin e, med doc labuiy laete, no' na ba o doro apap am, med mong fuiy mi.
21
Asel, mong aiy bap o mi tur mi, Musa eiy mi di ara am, mong bang pali' mate arian, name no' nun u semaring asel aome bang nun mi sel Sabat arian ta'an." SURA' FA NAME BA E YAHUDI HINUNG NENE HO EN
22
Horo, rasul nun edun he'e no', penatua, med jumaat barpi, name nun ba supi ara ho tara', hunie supi ahow Paulus med Barnabas ara Antiokhia leam, Supi Yudas ba name ani bit Barsabas, med Silas, kapal nun ba di ail bar o udume ham ho o anani mi,
23
Supi satang puin sura' hul orupa ho' oni:
"Mong rasul med penatua nun, diail bar nun ba i udume ham, fa diail bar nun e Yahudi nene mong Antiokhia mi, Siria med Kilikia, ho salam!
24
asel ni ma'eh bite name pir den ni' anaiy mi, ba fa supi araham ni e supi parenta nene ho, supi mateng pa' ho ano' taro' ni e, ilaman ano' bol fe ho, puin iri silong am,
25
na ho' o ma nira ham ni edun he'e no', mang u sofo no', horo he'e, ni name tara' e supi ahow sam, ari e med ni diail bar nun ba ni esah, Barnabas med Paulus,
26
ba pi Tuhan, Kristus Yesus eiy araham supi so fetang fewu meng.
27
Honi horo eiy fe, ni Yudas e med Silas ahow, honi supi solo na an-an ba o saraham ho puin u ira mateng.
28
Sobo, mino' bi' so honi he'e, fa Roh Bolang med ma niri mi, honie na o tarofe ho med abare tameng bo e mi tarofe na ho' o emota nene.
29
Fe na oba ebang foiy ti faram ho i elet,
ma fuiy ho mi, med na ba o doro' apap amine, med ma doc labuiy laete homi.
Mang fede' na an-an ho' oni ho i u iri buang, i na o no' fe panen. sam ho'o mi meng, honiam fe pi foiy tahol."
30
supi mang supi mang sara meang sabor no', supi hel Antiokhia lehel, supi mang jumaat taunung no' supi sura' ho alorang.
31
Ho araham, name ba o atino' bit, sari sura' opa' ho ta'an, supi bad herang asel aluling ho eiy ara ham.
32
Yudas med Silas, ba supi hodiba nabi, mateng tofang puin supi ano' dume med ano' kufa'.
33
Supi hemo mi seleme med sel tareng den ho om mi. Name ba o atino' bit nun ho, no' ham fe puin supi ad atain sabor sam name ba supi ahow am ho olap sam.
34
[Honi sobo, silas bite mi no' so honi he'e, hemoro mi seleme med.]
35
Sobo, Paulus med Barnabas Antiokhia mi seleme med, homi gur pel med name lafoh beng ara, Tuhan o fom pa' u maring.
PAULUS MED BARNABAS SELET
36
Mi tareng den ani he'e, Paulus Barnabas ara hu'tang, "Mae pi foiy tabor bang pali' o mate mi, diail bar nun ba o udume teiy ham ho, o lelang lol, eleme ba pi mi Tuhan o fom pa' u maring, honie pi supi omid ohel ho edun."
37
Barnabas om ho, Yohanes ba name olove bite Markus ho adaiy bit.
38
Honi sobo, Paulus eiy om umang ho, name ba Pafilia mi supi elet, e supi ara ham-ham sam karesang baleta nene ho adaiy e.
39
Supi om salahin empir horo he'e supi selet barpi. Barnabas Markus ara ted Siprus o bang pali lefa,
40
Sobo diail bar o udume ham nun mang Tuhan o hal tafoiy puin supi alorang no', Paulus Silas adaiy supi sabor.
41
fe Sa Siria med Kilikia alaiy, homi jumaat nun ho ano' dume.