RASUL NUN O SURA' ASEL MATE ( 14 ) ERNU FALING UT
1
Fe, ara mong Ikonium mi, Paulus med Barnabas ham-ham mid Yahudi hinung a'ome bang mi, hu'tang taro'ni honi e name lafoh, Yahudi hinung em Yunani hinung, o atino' bit.
2
Sobo, Yahudi hinung ba e o atino' bit nene, name Yahudi hinung nene ho om duke, supi o tanut ho osah med mi fa name ba o atino' bit ho lafang.
3
Horo, supi hemomi seleme med so em supi baroc nene hu'tang fa Lahtal araham, supi O ukarang ba ta' ahol ta ma'eh ham ho u mateng, fa O ukarang ma utub maring o atino' med na empir nun ba supi atang alaiy.
4
Honi sobo, Name nun bang pali' o mate mi ho saba'ang, den mong Yahudi hinung eiy ta med den foiy mong rasul nun eiy ta.
5
Ho araham name Yahudi hinung nene med name Yahudi hinung, foiy med supi o kapal nun sara gahin, honie rasul nun ho beh par med supi od,
6
Paulus med Barnabas mang naho ahol supi sari fit te'eng sam Listra med Derbe mi, bang pali' mate nun mong Likaonia mi, fa pali' ba o abung hodi mi.
7
Hemomi, supi Injil ho u maring seiy masing.
PAULUS MONG BANG MATE LISTRA MED BANG MATE DERBE MI
8
Mong Listra mi, name e'fa moleng nu homi mi eh, e'fa ho moleng mong ofo daiy e' fo'oiy eh ta.
9
Name ho Paulus hu'tang e sa u alepang eh, Paulus edun mi ti'tining fe sa edun name ho' o o udume ara ma' ano' birang no,
10
Paulus ara hu'tang abang der mate, "Toh ema e'fa ho ano' mulang." Horo, name ho do' horo he'e lame.
11
Ho araham name tofang mang na ba Paulus akala ho edun, supi samang atel horo Likonia o mateng mi hu'tang, "Dewa nun hel pi ham mi sano' mang fede' nameno' honi!"
12
Namenun ho ubang bite Barnabas ho Zeus med Paulus ho Hermes asel sari so hu'tang mi tutung.
13
Imam dewa Zeus, eleme mi na ah eiy ho mong bang pali' mate elet, sa sapi lote nun med krans bunga fito' bang pali' mate o sear mate mi. sari med name lafoh ho supi om naho alorang ano' kurban fa Paulus e med Barnabas araham.
14
Honi sobo, ho araham rasul Barnabas med rasul Paulus na ho maeh, supi so fen apeh no' te'eng name lafoh o ham lefa, horo beat,
15
ubang ho, "Diail bar nun, taro'ni fe i na an-an nun ho' o panen? Niridi nameno orupa iri honi so, maring pa' ono' fito' ien honie ibor ma na o ha'aiy ho'o elet, ma Lahtal fetang, ba burang fa'aiy, med tang med na afang rat ba ara om mi Sa aten ho, olap ma.
16
Mong aiy bap tur mi, bang pali' sarian so se'bur ata'ayin bo Sa e u hap nene.
17
Sobo, Sa e mang honi nene sobo o ta' ahol ta ma'eh eiy ara. Asel, Sa na o no' panen med en, noy burang mi her med sel sari tiling na o' ade eiy om lal med bad herang."
18
Masiki na an-an ho barpi bit oham bo, supi name lafoh ba kurban alorang med supi araham ho e hap sah.
19
honi sobo, Yahudi hinung Antiokhia med Ikonium mi ho', mang name lafoh ho om lehel no', supi foy puin Paulus od no' a do-do baring bang pali' mate ho elet asel supi eiy om bite Paulus minam so.
20
Sobo, ho araham sakola aiy bar nun Paulus fading, sa toh no' sabor bang pali' mate ho lefa. mi dil lel, sari e med Barnabas sam Derbr leam. SABOR ANTIOKHIA O BANG PALI' MATE, SIRIA O DOR KOC LE HO'
21
Supi mang bang pali' mate homi Injil u maring med supi o sakola aiy bar di lafoh, supi sabor Listra mi, med fa Ikonium, no' he'e fa Antiokhia mi,
22
sakola aiy bar nun o laman ano' kufa', supi adado hunie udume om mi ata'ain horo bit, nao foiy ubang bite pi Lahtal Eleme Elafeng lemid ho musti ma'ar ma hip lafoh alaiy fe.
23
Ho araham Paulus med Barnabas a'ome med atep no', supi jumaat arian penatua nun u tub fa saraham, supi penatua nun ho alorang Tuhan en, ba fa Araham supi o atino' bit am.
24
Horo he'e, Supi Pisidia alaiy sam Pamifilia mi.
25
Ho araham supi Perga mi fom pa' ho bit no' horo he'e, supi hel Italia mi.
26
Hemomi, supi ted mong Antiokhia mi, eleme ba Lahtal supi alorang So ukarang mi karesang baleta, fe karesang baleta horo supi panen noam.
27
Ho araham supi ho' horo he'e jumaat ara taunung, supi na ba Lahtal supi ara ham-ham panen, med mi taro' ni eiy fe sa bang pali' beng o udume sear during am ho bit.
28
Horo, supi sakola aiy bar nun ara homi seleme med soem.