¹ Sel nu araham, mong jemaat Antiokhia o anaiy mi, nabi nun med om hul nun sariho Barnabas, Simeon ba name ani bit Niger, Lukius Kirene mi ho', Menahem ba ham-ham Herodes ara mate, bang pali' o Afen, med Saulus. ² Name ho'o ni nun ho daiy Lahtal afoh, atel med atep eh he'e, Roh Bolang ubang ho, "Barnabas med Saulus ho ano' seiy afaling med Naraham karesang baleta fede' ho araham Na u supi olove am." ³ Horo he'e, supi mang atep med a'ome no', supi satang med Barnabas e Saulus tameng, supi sonang lo ahow sam. BARNABAS MED PAULUS MONG NUH SIPRUS MI ⁴ Horo, Roh Bolang mang supi ahow sam no', Barnabas med Saulus hel Seleukia mi, hemomi supi ted fa Siprus mi. ⁵ Ho araham supi sam Salamis mi, supi Yahudi hinung a'ome bang arian, Lahtal o fom pa' u maring, horo supi di yohanes ara ho' supi u baleta. ⁶ Ho' araham supi lame nuh arian ho' Pafos mi, supi ho' name halimang lapair nu ahol, Yahudi hinung o nabi abul nene nu, ani ho Baryesus. ⁷ Sari e med Prokonsul Sergius Paulus, name tanut lel nu, horo barnabas med Saulus abang e ho' olap ho bit, fede' om Lahtal o fom pa' ho alepang umang am. ⁸ honi sobo, Elimas, halimang karang nu ho, asel honi horo ani ho name o araham bit, Barnabas med Saulus lafang, sa u labi'ing e ladimang gubernur o udume adimang ata'ain. ⁹ Sobo, Saulus, ba name di ahol bite Paulus, Roh Bolang afeng, Elimas edun mi ti-tining, ¹⁰ horo ubang ho, "Hoiy iri ba ladimang labor med ari'ing fai iri afeng ho, iri ho setang o'aiy, iri ho he'e na abulta nun o falefang, Tuhan o se' bur mulang ba i ano' palel ho, i om sono' umang em ha'aiy ¹¹ fed, edun ema, Lahtal atang ho' arita honie, sa e' faiy ho maru med a' e dun fed ahol nene tareng den-den om mi.' mang horo, tafi'ing med paka hel ta hel, horo sa lame na fading name lap name ahow atang apuin. ¹² Horo, gubernur ho'ra ham na ho edun sa o atino' bit, asel sa Tuhan o gur pel ho u tarain. PAULUS MED BARABAS SAM ANTIOKHIA LEAM MONG PISIDIA O PALI' MI ¹³ Selnu mi, Paulus name ba ara ted Pafos mi sam Perga, Pamfilia mi, Sobo Yohanes supi ata'iyn sabor Yerusalem mi. ¹⁴ Sobo, Saulus med Barnabas so lame ho u hamow mong Perga mi med sam Antiokhia, Pisidia mi. Fe, sel sabat araham, supi sam a'ome bang mi, hemo mi mih. ¹⁵ Taurat o Hukung med nabi nun o sura' ho mang ta'an no, a'ome bang o lafung nun name ahouw rasul alo ho aramateng ubang, "Diaybar nun, mang fede' mateng pa' o no' rupa eiy ara so honi he'e, hu'tang name nun ho' o araham ema." ¹⁶ Horo, Paulus toh satang puin o utub nu akala no' hu'tang ubang ho, "Hoiy Israel hinung med iri ba Lahtal el baroc, Alepang! ¹⁷ Israel o Lahtal ho'o pi bap bale tara' am, med pi bang pali' ano' lafining, ho araham supi Mesir o fa'aiy mi seleme med, Sa so tor atel supi epuin atang puin homi hel. ¹⁸ Tun erut om mi ho, Sa Som tahang fa supi o panen aten tong padang belantara mi ho araham. ¹⁹ Sa mang Kanaan ofa' aiy mi bang pali' itito ano' ki' butung no', Sa fa'aiy ho med supi en. ²⁰ Na nun ba ara am ho'o o em honi he'e tun ( 450 rat ut er ifihing ). Mang no' he'e, Lahtal hakim-hakim alorang supi en sam Nabi Samuel o sel-o tapeng mi. ²¹ Horo he'e, supi afen nu bang, Lahtal Saul med supi en, Kish o aiy lote, name mong Benyamin o lelang mi, o lufang tun er ut om mi. ²² Lahtal Saul amuj no', Lahtal Daud afoh atel ano' supi o afen, fa eiy araham Lahtal ho ahol med ubang bite, 'Na Daud aholam Isai o aiy lote bar, aiy horo Nom tamuj, horo o ba na u'inung ho panen no'.' ²³ Ma name ho'o o aiy o bap mi, Lahtal, O paha' eiy araham, il luling o name nu fito', horo ba Yesus. ²⁴ Yesus e ho' ma daiy he'e, Yohanes foiy no' e safom eiy u Israel hinung barpi emaring am. ²⁵ Yohanes daiy so karesang baleta ano' an eh he'e, sa ubang ho, 'iom bite nari ho ano so? Nari ho'o, e Sari nene. Sobo edun ema, Na mang nabor he'e namenu ho' ma, sandal e'fa mi di na during med sah." ²⁶ Uding bar nun, abraham o di'ing bap med name nun inaiy mi ba Lahtal el baroc, ma taraham maring pa' il luling ho' o, u tara mateng am. ²⁷ Asel, Supi ba eleme Yerusalem mi med supi o kapal nun, ba e' Ahol nene med e nabi nun o hu'tang pa', ba sel sabat arian name ta'an ho pahang nene, Yesus hukung ho mi he'e, nabi nun o hu'tang pa' ho ano' an am. ²⁸ Masiki, supi ahal asel nu di ahol nene bo hukung amine fe, supi Pilatus abang honie amine. ²⁹ Fe, supi na ba hul fa araham am ho ano' an eh honi he'e, supi tabang bo' ho ta' ara hel med dere om mi atarang ³⁰ Honin sobo, Lahtal name min o' anaiy mi ano' fetang, ³¹ tareng den-den om mi, Yesus Sari med name nun ba ara ham-ham Galilea sam Yerusalem mi, ba fed sano' O ta' ahol-ta ma'eh bang pali' ho'o mi ho o petang. ³² Med, ni maring pa' no fito' abung Lahtal o paha' fa pi bap bale araham, ³³ bite Lahtal So paha' ho alol at'ain med tenam, supi o aibar, ma Yesus ano' fetang homi, urupa sura' Mazmur o asel alo mi hul olmeng honi: 'Ari ho he'e noaiy. Fed he'e, Nariho Imang am.' Mazmur 2:7 ( mazmur o ba'ang asel mate alo, o ba'ang ka'aiy itito ³⁴ Lahtal name min o anaiy mi Yesus ano' fetang eiy araham, e sabor osah karang lehel nene am, Lahtal ubang am, 'Na musti hal tafoiy o bolang ba name o atino' bit no', ba Daut en ho med en.' Yesaya 55:3 ( Yesaya o sura' asel mate er ifihing faling ifing, o bang ka'aiy tow ) ³⁵ Honin horo eiy fe, Sa mong Mazmur beng di mi hu'tang eh, ' O name bolang ho na o sah karang edun A u a'ain.' Mazmur 16:10 ( Mazmur o ba'ang asel mate ernu faling talang o asel ka'aiy ernu ³⁶ Horo, Daud, so aiy so bab nun mang u baleta no', fede' Lahtal eiy inung, horo sa min name med o bap bale o anaiy mi atarang, hunie sah karang edun, ³⁷ sobo Yesus ba Lahtal name min o' anaiy mi ano' fetang ho, e sah karang ho edun nene. ³⁸ Honin fe, sohoni e aridi ahol, med uding bar nun, bite ma Sari Alaiy fe, doc ahal u ampo eiy ho panen ara ham, ³⁹ fe fa Alaiy honi fe sa, name ba o atino' bit il luling med so afang rat homi, ba pi Musa o hukung Taurat mi med sah. ⁴⁰ Fe, na uma-mang honie na an-an ba nabi nun o sura' mi bitam ho ha'aiy a rupa' e: ⁴¹ 'Edun ema, hoy name-name ebit karang! si'ud med min tabang ema, asel Na eiy sel mi No karesang ano' lame, karesang nu ba i e o' atino' bit nene, masiki name den u hu'tang ano' lel iraham."' Habakuk 1:5 ( Habakuk o sura' asel mate nu o bang ka'aiy ifihing ⁴² Paulus med Barnabas hel eh he'e, supi foiy abang honie sel Sabat ma eh honi he'e, sari fom pa' u hu'tang. ⁴³ Lubung a'ome bang mi ho mang tafal honi he'e, Yahudi hinung lafoh med name Yahudi hinung o agama ata'ain ba Tuhan el baroc ho Paulus med Barnabas ata'ain, ba supi ara mateng med supi a do-do hunie ha' aiy Lahtal o ukarang ho elet e. ⁴⁴ Foiy Sabat o ata'aiyin he'e, edaiy bang pali' mate ho o nameno' taunung e Tuhan o fom pa' alepang. ⁴⁵ Honi sobo, ho araham Yahudi hinung lubung la'ol ho edun, supi om ari'ing horo supi naba Paulus u hu'tang am ho lafang med ebit eng il. ⁴⁶ Horo, bo Paulus med Barnabas e baroc nene, supi mateng abor ubang ho, "Na ho'o na' atino', fe Lahtal o fom pa' o'abulta mi sotur u ara hu'tang. Asel i i'ain bite ipainsah fetang soem ho med, edun ema, ni nidimang bang pali' beng en. ⁴⁷ Asel, Ho'oro Lahtal niri u parenta: 'Na ino' nalel fa bang pali' beng araham hunie il luling fisam pali' mate o tapor mi no.'" Yesaya 49:6 ( Yesaya o sura' asel mate er ut faling tieiynu o bang ka'aiy talang ) ⁴⁸ Ho araham name ba e Yahudi hinung nene na ho'o ma'eh, supi bad herang bi horo sipi Tuhan o fom pa' u tarain. Fe milafoh ba fetang so em u ere'eng am ho, o atino' bit. ⁴⁹ Horo, Tuhan o fom pa' tafoiy bang pali' ho mipir. ⁵⁰ Honi sobo, Yahudi hinung supi ob bar ba parenta ernu u ada ahol ho, om duke med no' name o atino' bang pali' mate mi ho, ahow toh Paulus med Barnabas ho beh par, honie supi atetel ahow fa'aiy ba bang pali' o tapor ho mi hel. ⁵¹ Horo, maru butung supi e'fa mi ho supi mi par-par fa Yahudi hinung araham no', Paulus med Barnabas sam Ikonium leam. ⁵² Sakola aiybar ho bad herang med Roh Bolang supi om afeng.