¹ Ho' araham, mong Kaiseria mi, namenu ani Kornelius, Italia o Soldaj lubung nu o mate nu, ² sari Lahtal u ada'ahol, sari med supi bang om nu ho Lahtal el baroc, o na an-mi lafoh sa med name kurang bo' eiyta. sa a'ome Lahtal abang seiy masing. ³ fed hel nu mi, ma' od tieiynu sel ho araham, sa nanu edun ahol lel, Lahtal o malaikat nu ho e aramateng ubang ho, "Kornelius!" ⁴ Horo, sa malaikat ho edun sa baroc, no' sa ubang ho, "Naba soba ho' o Tuang?" horo malaikat ho aramateng, "O a'ome pa' med o na an-an ba a puin name kurang bo eiyta ho, sano' tanut nu Lahtal apong adang. ⁵ Fed ho'o, name ahow mong Yope leam, honie namenu ba ani Simon ba name ubang bite petrus ho olove, ⁶ sa aiy ani Simon ba binangta o uiyl u karesang eh ho ara bang nu, obang pong tang adi ta." ⁷ Ho' araham malaikat ba ara hu'tang eh ho mang sabor he'e, Kornelius so name baleta pir alo olove med soldaj ada'ahol nu ba supi o'anaiy mi baleta eh hodi, ⁸ mang na afangrat nun ho u supi ara hu'tang no, sa supi ahow Yope leam. ⁹ Ho araham Mi dil lel, supi lame se'ham dele pali' ho ohir, ma'od talang ani Petrus mid bang ado ta a'ome. ¹⁰ Horo, sa malihing om na'ade umang, sobo name daiy namej ho amihing eh honi he'e, petrus nanu ahol, ¹¹ sa edun burang sari during sa dun nanu orupa napah habu mete honi ho'hel, saba'ang ting ut mi hel sam fa'aiy ator. ¹² Binangta afang rat e'fa ut ara om mi, no' binangta hod lame nun pali mate ta, med hiuw lelang ernu lulig ham mi di ara. ¹³ Horo he'e, amang pa' ho' ara mateng bite, "Toh ema, Petrus, ta'oin amine e' ade!" ¹⁴ Honi sobo, Petrus ubang ho, "Ha'aiy, Tuhan. asel, na e na o sah med na o, u nepur-nehap am ho ade ahol daiy." ¹⁵ Horo, mateng pa' ho foiy ho' abung o mialo mi, "Naba lahtal u sofo am ho, ha'aiy bit bite u epuram e." ¹⁶ Na ho'o ara o mitow mi, horo mi se-seh barpi ho latel burang lemid. ¹⁷ Ho' araham, petrus om upir e, daiy mih na ba sa edun am ho o lel orupa taro'ni u tanut eh honi he'e, name nun ba Kornelius ahow simon obang lap eh ho' ma, fo o sear mate araham tufeh, ¹⁸ horo supi love, supi u ta'ain ahal simon ba name ubang Petrus ho hemomi aer eh. ¹⁹ Petrus daiy na ba sa edunam ho ukuru eh he'e, Roh ara hu'tang ubang ho, "Edun ema, name lote pirtow ari lap eh. ²⁰ Toh e hel ema, supi ara sam ha'aiy om atan e, asel Na supi ahow am." ²¹ Hoeo, Petrus hel name nun ho abung e ubang ho, "edun, nari ho'oro name ba i lap eh ho. I om naba so fe i ho' ma?" ²² Supi ubang ho, "Kornelius, soldaj o mate nu, name abul e lahtal el baroc, mong Yahudi o bang pali' mi, mang taromi name ahol, malaikat bolang awu am, honie ahow ho' obang leho' e, o hu'tang sa alepang." ²³ Horo Petrus supi olove mid daiy homi aer. Mi dil lel am fe, sa toh horo supi ara sam, diay bar pirden Yope mi ba, o udume ham ho supi ara tenang el sam. ²⁴ Sel o ata'ain mi he'e, supi Kaiseria lemid. Kornelius so aiy, so uding bar med tenang el bar o abung nun ho sa taunung no', supi adanang eh. ²⁵ Ho'araham Petrus mid, Kornelius olap ma, horo he'e, e'fa sel mi parih mudig e u ada'ahol. ²⁶ Honi sobo, Petrus ahow toh ubang ho, "Toh ema! Nari ho'o di nameno' nu so." ²⁷ Petrus daiy Kornelius ara hu'tang eh he'e, Petrus bang om lemid name lafoh ta'unung eh ho arupa'. ²⁸ Horo, petrus supi ara hu'tang, "I ahol bite Yahudi hinung ar'ing bi, mang fede' name ba e Yahudi hinung nene ho sara pec naba fe foiy solelang lol, sobo Lahtal u netub am,nari ho ha'aiy ubang bite anoso sah eme u nepur nehap am honi. ²⁹ Honin horo eiy fe, ho araham i nahow ho' ho, nom e terofe nene. Sari horo fe na u ta'ain bite i naba eiy araham ho nolove?" ³⁰ Horo, Kornelius ubang ho, "o tareng ut mi sam od ho'o ni, od o ti'eiy nu mi, na nobang mi a'ome eh, edun ema, namenu ara naraham tufeh fen lel madal mang. ³¹ Horo, ubang ho, 'Kornelius, o a'ome pa' ho ma'eh ham, o kurang bo' ho, Lahtal apong adang atel am. ³² horo eiy fe, Yope leam Simon ba bite Petrus ho ahow ho'. Sa simon obang mi ayer eh, namenu ba uiy u karasang eh ho, tang adi ta.' 33 honin horo fe, na er name ahow sam abung, om no' horo ba a ho'am. fed, pi barpi ho' omi, Lahtal apong adang, hunie afang rat ba tuhan u ahow am ho u alepang." PETRUS KORNELIUS O BANG MI INJIL U MARING ³⁴ Horo, Petrus sat abe' e hu'tang ubang ho, "Fed, na abul-abul pahang bite Lahtal e nu solo eiy ta nene. ³⁵ Sobo, bang pali' arian, name ba El baroc med na o no' akala, apang u no'. ³⁶ Fom pa' ba Lahtal Israel bang pali' mi u hu'tang ho, maring pa' ono' il luling ma Kristus Yesus lol eiy, Sari horo piri barpi o Tuhan. ³⁷ Hamoiy nu ba ara Yudea bang pali' mi pir, a'aiy nang galilea mi, Yohanes mang name afoiy eiy ho u maring no' iridi aholam, ³⁸ I yesus ahol, Nazaret hinung, taro'ni fe Lahtal Roh Bolang med kufa' ho med En. Sa sam na no' panen bang pali' ho mipir med name ba roh ari'ing fail om tamang ho ano' birang asel Lahtal so ata'ain eh. ³⁹ Niri ho'o he'e, na afang rat nun ba Yesus panenam, mong yahudi hinung o pali' mi em'e Yerusalem mi ho ta' ahol, ta maeh barpi. supi Yesus med tabang' bo' ta haleng amine. ⁴⁰ Sobo, mi tareng taow om mi Lahtal ano' fetang no', u'ahow Sari med name o petang, ⁴¹ fa nameno' nun barpi araham nene, sobo ma niri ba daiy eh ta Lahtal u ale' tara', nihow ta' ahol ta ma' eh eiy, niri ba Sa mang name min o' anai ho mi fetang sahirtoh he'e Ara ham-ham na'ade seiy na ho. ⁴² Sa u niri parenta honie name no' nun ho emaring, honie abul-abul u hu'tang bite Sari horo Lahtal utub atining, ano' na o abul ahal u hu'tang eiy, fa o min mi, ma o fetang mi. ⁴³ Fa Eiy Araham, nabi nun barpi u hu'tang bite, nameno' nun ba o atino' bit ho, o om mi he'e, Ani alaiy o u ampo med." LAHTAL UTUB BITE NAMENO' NUN HO MANG EIY MAMANG ⁴⁴ Paulus daiy mih mateng pa' nun ho u hu'tang eh he'e, Roh Bolang hel nameno' nun ba fom pa' alepang eh ho ta hel. ⁴⁵ Horo name oatino' bit nun ba sunat am , ba petrus ara ham-ham ho' ho, sahoir asel Lahtal O ukarang Roh Bolang lol ho helam, honie med pali' mate beng di araham. ⁴⁶ Asel, supi neme nun ho alepang honi he'e, mateng afang rat mang u hu'tang no' mamang med Lahtal ani utarain. Horo Petrus ubang ho, ⁴⁷ " Ahal name nu di e seiy ho u hap nene, hoinie puin name ba roh Bolang medam ho afoiy mang fede' piri honi?" ⁴⁸ Horo, Petrus supi parenta honie, Yesus kristus ani puin supi afoiy. horo he'e name nun ho Petrus abang honie daiy supi ara tareng alo tow om mi.