¹ Sasudah Yesus mambilankan hal-hal ni, pogilah Dio basamo murid-murid-Nyo ka saborang sunge Kidron, tompat adonyo sabuah taman dan Yesus masuk ka dalamnyo basamo murid-murid-Nyo. ² Yudas, salah saorang murid nang mangkhianati Yesus, jugo mangatahui taman tu karono Yesus soring bakumpul basamo murid-murid-Nyo di sanan. ³ Yudas, sasudah manarimo sajumlah pasukan dan hambo-hambo dari imam-imam kapalo dan orang-orang Farisi, tibo kataman tu longkap mambawa obor, palito, dan sanjato. ⁴ Yesus, nang udah mangatahuisamuo hal nang ondak tarjadi pado-Nyo, maju kadopan dan batanyak samo mareko, "Siapo nang kamu cari?" ⁵ Orang tu manjawab, "Yesus dari Nazaret." Yesus bacakap kepado orang tu, "Akulah Yesus." Dan jugo Yudas, nang mangkhianati Dio, badiri basamo orang tu. ⁶ Katiko Yesus bacakap, "Akulah Yesus," orang-orang tu mundur dan tasungkur ka tanah. ⁷ Torus, Yesus batanyak lagi samo orang tu, "Siapo nang kamu cari?" Orang tu manjawab, "Yesus dari Nazaret." ⁸ Yesus manjawab, "Udah Kubilang samo kamu, Akulah Yesus. Jadi, bilo kamu mancai Aku, biarkanlah murid-murid-Ku ni pogi." ⁹ Hal ni tarjadi bak supayo gonaplah parkataan Yesus: "Dari samuo nang Enghkau bagikan kepado-Ku, Aku tak kahilangan satu pun." ¹⁰ Simon Petrus, nang mambawak sabilah podang, manghunus podangnyo dan mancocangkannyo pado pambantu Imam Bosar, sahinggo tarpoting talingo kanan pambantu tu; namo pambantu Imam Bosar tu adolah Malkhus. ¹¹ Mako, bacakaplah Yesus samo Petrus, "Sarungkan podang tu ka sarungnyo! Mangkuk nang Ayah bagikan samo-Ku, tidakkah Aku harus maminumnyo?" ¹² Torus, para parajurit Romawi samo parwiro-parwironyo jugo para palayan orang Yahudi manangkap Yesus dan mangikat Dio, ¹³ dan talobih dulu dibawak Yesus kepado Hanas, mantuo Kayafas, nang adolah Imam Bosar pado tahun tu. ¹⁴ Dan, Kayafas lah nang manasehati orang-orang Yahudi adolah nang talobih baguno satu orang mati domi rakyat. ¹⁵ Simon Petrus dan saorang murid nang laen mangikuti Yesus. Murid nang laen tu dikonal samo Imam Bosar dan dio masuk basamo Yesus ka dalam halaman isatano Imam Bosar. ¹⁶ Tapinyo, Petrusbadiri di luar, di dokat pintu. Kamudian murid nang laen tu, nang mangonal IMam Bosar, balek kaluar dan bacakap samo parompuan panjago pintu, lalu mambawak Petrus masuk. ¹⁷ Lantas, batanyaklah parompuan panjago pintu tu samo Petrus, "INdakkah kamu jugo salah saorang murid dari Orang tu? Jawab Petrus, "Bukan!" ¹⁸ Sasudah mambuat api unggun, para palayan dan parwiro badiri di sanan karono udara taraso dingin, dan orang tu badiang. Petrus jugo basamo orang tu, badiri dan badiang. ¹⁹ Torus, Imam Bosar mananyakkan Yesus tontang murid-murid-Nyo dan tontang pangajaran-Nyo. ²⁰ Yesus manjawab dio, "Aku sudah torus torang bacakap kepado dunio. Aku salalu mangajar di sonagoge-sinagoge dan di Bait Allah, tompat samuo orang Yahudi bakumpul. Aku tak paronah bacakap secaro manyuruk-nyuruk. ²¹ Kenapo kamu batanyak kepado-Ku? Tanyakkanlah kepado mareko nang suah mandongar apo nang Aku bilang kepado orang tu; orang tu tau apo nang sudah kubilangkan." ²² Pas Yesus bacakap macam tu, saorang panjago nang togak disitu manampar muko-Nyo dan bacakap, "Bagitukah caro-Mu manjawab Imam Bosar?" ²³ Yesus manjawab dio, "Bilo Aku mambilangkan sasuatu nang salah, tunjukkanlah kasalahannyo; tapi bilo nang Kubilangkan botul, kenapo kamu manampar Aku?" ²⁴ Lalu, Hanas mangirim Yesus dalam kaadoan tarikat kepado Imam Bosar Kayafas. ²⁵ Samataro tu Petrus masih togak dan badiang. Lalu, orang tu batanyak samo dio, "Bukannyo kau salah satu murid Orang tu?" Petrus manyangkalnyo dan manjawab, "Bukan." ²⁶ Salah saorang pambantu Imam Bosar, nang adolah karabat dari orang nang talingonyo di cocang Petrus, bacakap, "Bukannyo kutengok kau basamo Dio di taman tu?" ²⁷ Sakali lagi, Petrus manyangkalnyo, dan katiko tu jugo bakokolah ayam. ²⁸ Kamudian, orang tu mambawak Yesus dari tompat Kayafas ka godung pangadilan, waktu tu masih dini hari, dan orang tu sandiri tak masuk ka dalam godung pangdilan bak supayo tak manajiskan diri sahinggo biso makan Paskah. ²⁹ Makanyo, Pilatus kaluar manjumpoi orang tu dan batanyak, "Apolah tuduhanmu samo Orang ni?" ³⁰ Orang tu manjwab dan bacakap samo dio, "Kalo Orang ni bukan panjahat, sudah pasti tak kami bawak Dio samo kamu." ³¹ Pilatus bacakap samo orang tu, "Bawaklah Dio dan hakimilah manurut hukum klen." Orang-orang Yahudi tu manjawab, "Adolah tak sasuai samo hukum kami buek maghukum mati sasaorang." ³² Ini tarjadi buek manggonapi parkataan Yesus, nang manunjukkan kamatian nang macam mano Dio ondak mati. ³³ Lalu, Pilatus masuk balek ka dalam gondung pangadilan dan mamanggil Yesus, dan batanyak samo Dio, "Apokah Engkau Rajo orang Yahudi?" ³⁴ Yesus manjawab, "Apokah partanyaan tu dari dirimu sandiri, ato adokah orang laen nang mambilangkan samo kau tontang Aku?" ³⁵ Pilatus bacakap, "Apokah aku saorang Yahudi?" Bagso dan imam-imam kapalo-Mu sandiri manyorahkan Engkau samoku. Apo nang sudah Engkau buek?" ³⁶ Yesus bacakap, "Karajaan-Ku indak dari dunio ni. Bilo Karajaan-Ku dari dunio ni, pambantu-pambantu-Ku pasti akan malawan bak supayo Aku tidak disorahkan kepado orang-orang Yahudi. Akan tatapi, karajaan-Ku bukannyo dari dunio ni." ³⁷ Pilatus bacakap, "Jadi, Engkau saorang rajo?" Yesus manjawab, "Engkaulah nang mambilangkan Aku adolah rajo. Untuk inilah Aku lahir, dan untk inilah Aku datang ka dunio, yakn i buek basaksi tontang kabonaran. Satiap orang nang barasal dari kabonaran ondak mandongarkan suaro-Ku." ³⁸ Pilatus bacakap kepado-Nyo, "Apokah kabonaran tu?" Dan, sasudah bacakap macam tu, Pilatus pogi lagi kaluar manjumpoi orangorang Yahudi, dan bacakap kepado orang tu, "Aku tidak mandapati kasalahan apopun pado-Nyo. ³⁹ Tapi, kamu mampunyoi satu kabiasaan bahawa aku harus mambebaskan saorang tahanan pado hari Paskah. Jadi, apokah kamu ondak bak supayo aku mambebaskan ''Rajo Orang Yahudi ni?" ⁴⁰ Orang tu manjawab balek sambil manjorit, "Jangan bebaskan Orang ni, malainkan Barabads!" Barabas adolah saorang parampok.