¹ Itulah kato-kato Yesus, lalu Dio manengok ka langit dan bacakap, "Ayah, sudah tibo masonyo, muliankan Anak-Mu supayo Anak-Mu jugo bisa mamuliakan Kau. ² Samo macam Kau sudah mangasih Dio kuaso atas samuo orang, supayo buek samuo nang Kau kasih buek-Nyo, Dio bisa mambuek hidup kokal. ³ Macam ni lah hidup kokal, yaitu orang tu mangonal Kau, satu-satunyo Allah nang botul, dan mangonal Kristus Yesus nang sudah Kau suruh. ⁴ Aku sudah mamuliakan Kau di bumi dengan manyiapkan karojoan nang Kau kasi samo-Ku buek dikarojokan. ⁵ Dan sakarang, ya Ayah, muliakanlah Aku basamo-Mu dengan kamuliaan nang Kumiliki basamo-Mu sabolum dunio ado. ⁶ Aku sudah manogaskan namo-Mu ka orang-orang nang Kau kasih samo-Ku dari dunio ni. Orang tu punyo-Mu dan Kau sudah kasihkan orang tu samo-Ku, dan orang tu sudah manaati firman-Mu. ⁷ Sakarang, orang tu tau bahwa samuo nang Kau kasihkan samo-Ku datang dari-Mu. ⁸ Korno, Aku sudah mangasihkan ka orang tu firman nang Kau kasihkan buek-Ku, dan orang tu sudah manarimanyo dan botul-botul tau bahwa Aku suruhan Kau, dan orang tu pacayo bahwa Kaulah nang manyuruh Aku. ⁹ Aku badoa buek orang tu, Aku tak badoa buek dunio, tapi untuk orang nang sudah Kau kasihkan samo-Ku; korno, orang tu adolah punyo-Mu. ¹⁰ Samuo nang Kupunyo adolah punyo-Mu, dan samuo nang Kau punyo adolah punyo-Ku; dan Aku sudah dimuliokan di dalam samuo tu. ¹¹ Aku tak ado lagi di dunio ni, tapi orang tu masih ado di dunio ni, dan Aku datang buek-Mu. Ayah nang Kudus, jagolah orang tu di dalam namo-Mu, namo nang sudah Kau kasihkan samo-Ku, sahinggo orang tu manjadi satu samo macam kito. ¹² Selagi Aku basamo orng tu, Aku sudah manjago orang dalam namo-Ku nang sudah Kau kasihkan samo-Ku. Aku sudah manjago orang tu dan tak saorang pun dari orang tu nang hilang kacuali sianak nang ondak dibinasokan, supayo Kitab Suci digonapi. ¹³ Tapi saat ni, Aku akan datang buek-Mu; dan samuo ni Kucakapkan di dunio ni supayo orang tu biso mandapat sukacito-Ku nang dimasukkan di dalam diri orang tu. ¹⁴ Aku sudah mangasihkan firman-Mu ka orang tu, dan dunio mambonci orang tu korno orang tu tak dari dunio, samo macam Aku tak barasal dari dunio. ¹⁵ Aku tak maminta-Mu mangambek orang tu dari dunio, tapi buek manjaga orang tu dari nang jahat. ¹⁶ orang tu tak datang dari dunio, samo macam Aku tak datang dari dunio. ¹⁷ Sucikanlah orang tu ka nang botul; firman-Mu iolah kabonaran. ¹⁸ Macam Kau sudah manyuruh Aku ka dalam dunio, bagitulah Aku manyuruh orang tu ka dalam dunio. ¹⁹ Demi orang tu, Aku manyucikan diri-Ku biar orang tu disucikan dalam nang botul. ²⁰ Aku tak hanya badoa buek orang tu, tapi jugo buek orang-orang nang pacayo samo-Ku dari carito orang tu, ²¹ Biar samuo orang tu manjadi satu, samo macam Kau; ya Ayah, di dalam Aku dan Aku di dalam Kau; biar orang tu manjadi satu samo Kito sampek dunio pacayo bahwa Kaulah nang sudah manyuruh Aku. ²² Kamuliaan nang sudah Kau kasih samo-Ku, sudah Ku kasihkan ka orang tu biar orang tu jadi satu, samo macam Kau dan Aku adolah satu. ²³ Aku di dalam orang tu dan Kau ado di dalam Aku, biar orang tu sampurna jadi satu. Dengan bagitu, dunio akan tau bahwa Kaulah nang manyuruh Aku, dan Kau mangasihi orang tu, samo macam Kau mangasihi Aku. ²⁴ Ya Ayah, Aku ondak agar orang tu, nang sudah Kau kasihkan samo-Ku, jugo ado basamo-Ku dimana pun Aku barado, biar orang tu manengok kamuliaan-Ku, nang sudah Kau kasihkan samo-Ku, korno Kau mangasihi Aku sabolum dunio jadi. ²⁵ Ya Ayah nang adil, walopun dunio tak mangonal Kau, tapi Aku mangonal Kau; dan orang tau bahwa Kaulah nang manyuruh Aku. ²⁶ Aku sudah mangasih tau namo-Mu ka orang tu dan akan torus mangasihtaukannyo biar kasih nang Kau bori samo-Ku ado dalam orang tu, dan Aku ado di dalam orang tu."