¹ Pilatus mangambek Yesus dan mamarintahkan bak Yesus disesah. ² Para prajurut manganyam sabuah mahkota dari ranting-ranting nang baduri lalu mamakekannyo ka kapalo Yesus, lau mamakekan jubah ungu samo-Nyo. ³ Orang tu maju mandokati Yesus dan bacakap, "Salam, hai Raja orang Yahudi!" Lalu, orang tu mandompang muko-Nyo. ⁴ Pilatus kaluar lagi dan bacakap samo orang tu, "Tengoklah! Aku akan mambawak Yesus kaluar kapado kamu bak kamu tau bahwa aku tak mandapat kasalahan apo pun pado-Nyo." ⁵ Lantas, Yesus kaluar dengan mamakek mahkota duri dan jubah ungu. Pilatus bacakap samo orang tu, "Tengoklah Dio!" ⁶ Pas imam-imam kapalo dan parwira manengok Yesus, orang tu batariak, "Salibkan Dio, Salibkan Dio!" Tapi, Pilatus bacakap ka orang tu, "Bawaklah Dio dan salibkan sandiri korno aku tak manomukan kasalahan apopun pado-Nyo." ⁷ Orang-orang Yahudi tu manjawabb Pilatus, "Kami mampunyoi hukum, dan manurut hukum tu, Dio harus mati korno Dio manganggap diri-Nyo adolah Anak Allah." ⁸ Waktu Pilatus mandongar parkatoan tu, dio pun samakain takut, ⁹ dan masuk balek ka godung pangadilan,dan batanyo ka Yesus, "Dari manokah asal-Mu?" Tapi, Yesus tak manjawabnyo. ¹⁰ Pilatus bacakap ka Dio, "Kau tak ondak bacakap samoku? Apokah Kau tak tau bahwa aku ni mampunyoi kuaso untuk malopaskan-Mu dan mampunyoi kuaso buat manyalibkan-Mu?" ¹¹ Yesus manjawab, "Kau tak punyo kuaso apopun atas diri-Ku, kacuali kuaso tu dikasikan samo kau dari atas. Itulah sobabnyo, orang nang manyorahkan Aku ka kau lobih bosar dosonyo." ¹² Sasudah mandongar hal tu, Pilatus barusaha untuk mambebaskan Yesus, tapi orang-orang Yahudi tu batariak, "Bilo kau malopaskan Orang ni, kau bukanlah kawan Kaisar; satiap orang nang manganggap dirinyoraja bararti malawan kaisar." ¹³ Pas Pilatus mandongar kato-kato tu, dio mambawak Yesus kaluar, dan duduk di kursi pangadilan, di suatu tompat nang namo-Nyo Litostrotos, tapi dalam bahasa Ibrani disobut Gabata. ¹⁴ Hari tu marupakan hari parsiapan untuk Paskah, maso tu jam kaonam. Pilatus bacakap ka orang-orang Yahudi, "Inilah Rajamu!" ¹⁵ Lalu, orang tu batariak, "Lonyapkan Dio! Lonyapkan Dio! Salibkan Dio!" Pilatus bacakap samo orang tu, "Haruskan aku manyalibkan Rajamu?" Imam-imam kapalo manjawab, "Kami tak mampunyoi raja salain Kaisar!" ¹⁶ Akhirnyo, Pilatus manyorahkan Yesus ka orang tu untuk disalibkan. ¹⁷ Yesus kaluar sambil mamanggul salib-Nyo sandiri manuju tompat nang banamo "Tompat Tangkorak", nang dalam bahasa Ibrani disobut "Golgota". ¹⁸ Disanan, orang tu manyalibkan Yesus basamo duo orang laen, nang disalibkan di kanan dan kiri Yesus, sedangkan Yesus barado di tongah. ¹⁹ Pilatus jugo manulis sabuah tulisan dan manompatkannyo diats kayu salib. Tulisan tu babunyi, "YESUS ORANG NAZARET, RAJA ORANG YAHUDI." ²⁰ Banyak orang Yahudi mambaco tulisan tu korno tompat Yesus disalibkan tu barado di dokat kota, dan tulisan tu ditulis dalam bahaso Ibrani, Latin, dan Yunani. ²¹ Lopas tu, imam-imam kapalo orang Yahudi bacakap ka Pilatus, "Jangan tulis, 'Raja orang Yahudi,' tapi tulislah, Orang ni bacakap, 'Akulah Raja orang Yahudi." ²² Jawab Pilatus, "Apo nang sudah aku tulis, akan totap tatulis!" ²³ Para prajurit, sasudah orang tu manyalibkan Yesus, mangambek pakaian-Nyo dan mambaginyo manjadi ompat, satu bagian buek masing-masing prajurit, jugo jubah-Nyo; jubah tu tak ado kelimnyo, hanyo ditonun dari atas ka bawah tanpa jahitan. ²⁴ Para prajurit tu bacakap samo nang laen, "Janganlah kito manguyaknyo, malainkan mambuang undi atasnyo untuk mamutuskan siapo nang bakal mandapatnyo." Hal ni tajadi bak gonaplah nang sudah tatulis dalam Kitab Suci: Orang tu mambagi-bagi pakaian-Ku diantaro orang tu dan buek jubah-Ku, orang tu mambuang undi." Bagitulah para prajurit malakukan samuo hal tu. ²⁵ Lopas tu, omak Yesus, saudaro parampuan omak Yesus, Maria binik Klopas, dan Maria Magdalena, badiri di dokat salib-Nyo. ²⁶ Pas Yesus manengok omak-Nyo dan murid nang Dio kasihi badiri disanan, Dio bacakap samo omak-Nyo, "Parampuan, tengoklah, ini anakmu!" ²⁷ Lantas, Yesus bacakap samo murid nang dikasihi-Nyo tu, "Inilah omakmu!" Maso tu, murid tu manarima omak Yesus tinggal di rumahnyo. ²⁸ Lopas tu, Yesus tau bahwa samuonyo sudah salose, untuk manggonapi Kitab Suci, Dio bacakap, "AKu haus!" ²⁹ Disitu ado sabuah tampayan ponuh anggur asam. Korno tu, orang tu manancapkan bunga karang dan nang sudah dicolupkan ka dalam anggur asam samo sabatang hisop dan mangocokkan ka mulut Yesus. ³⁰ Sasudah maraso anggur asam tu, Yesus bacakap, "Sudah Salose". Lalu, Dio manundukkan kapalo-Nyo dan manyorahkan nyawa-Nyo. ³¹ Korno hari tu hari parsiapan, dan bak mayat-mayat tu tak torus barado di kayu salib pado hari Sabat, korno Sabat adolah hari bosar, orang-orang Yahudi mamintak samo Pilatus bak kaki orang-orang nang disalib tu dipatahkan dan mayat-mayatnyo diturunkan dari salbi. ³² Lalu, para prajurit datang dan mamatahkan kaki orang nang partamo dan orang nang laennyo, nang disalibkan basamo Yesus. ³³ Tapi, pas orang tu sampek ka Yesus dan manengok Dio sudah mati, orang tu tak mamatahkan kaki-Nyo. ³⁴ Tapi, salah saorang prajurit tu manusukkan tombaknyo ka lambung Yesus, dan sakojap tu jugo, darah dan air mangalir kaluar. ³⁵ Orang nang manengok kajadian tulah nang mangkasi kasaksian ni, dan kasaksiannyo botul dan dio tau kalo dio mambilangkan nang sabotulnyo, bak kamu jugo pacayo. ³⁶ Korno, samuo ni tajadi bak gonaplah nang sudah tatulis dalam Kita Suci: "Tak satupun dari tulang-Nyo nang dipatahkan." ³⁷ Dan lagi, dalam bagian laen Kitab Suci bacakap, "Orang tu akan manengok Dio nang sudah ditikam orang tu." ³⁸ Lopas samuo tu, Yusuf dari Arimatea, nang jugo manjadi murid Yesus tapi sacara diam-diam korno takut samo orang-orang Yahudi, mamintak samo Pilatus bak dio dibolehkan mangambek mayat Yesus; dan Pilatus mangabulkannyo. Jadi, Jusuf dari Arimatea datang dan mangambek mayat Yesus. ³⁹ Nikodemus, orang nang dulu manjumpoi Yesus waktu malam hari, jugo datang dengan mambawak campuran minyak mur dan gaharu, nang boratnyo sakitar limo puluh kati. ⁴⁰ Lalu, orang tu mangambek mayat Yesus dan mambungkusnyo dengan kain linen nang sudah dikasi rompah-rompah, sasuai adat panguburan orang Yahudi. ⁴¹ Di dokat tompat Yesus disalibkan, ado sabuah taman dan di dalam taman tu ado sabuah kuburan baru nang tak satu mayat pun pornah dilotakkkan di sanan. ⁴² Korno hari tu adolah hari parsiapan buat orang-orang Yahudi, dan lotak kuburan tu tak jauh, orang tu malotakkan mayat Yesus disanan.